Pakiramdam niya ay kinurot ng libong beses ang kanyang puso sa imahinasyong nabuo sa kanyang isipan para sa kanyang lolo at lola. Hindi niya alam ang kwentong ito sapagkat ngayon lamang nagkalakas ng loob ang kanyang ina na buksan ang ganitong topic tungkol sa kanyang ama. Nanatili siyang tikom ang bibig habang patuloy na nakikinig sa kwento ng ina.
"Hanggang sa mailibing ang kanyang mga magulang ay hindi na ako masyadong kinakausap ng iyong ama. Hanggang tuluyan na siyang nagbago. Araw-araw na siyang naglalasing. Hindi ko na rin muling nasilayan ang kanyang matatamis na ngiti at ang dati niyang paglalambing sa akin. Pati ang kasabikan sa mukha ng iyong ama na masilayan ka ay maging iyon ay biglang nawala. Noong una ay inintindi ko na lamang siya dahil sa isipan ko ay baka gawa lamang iy
