“Congratulations, Ma’am.”
“Congratulations, Ma’am Yvonne.”
“Best wishes, Ma’am.”
“Congratulations, Ma’am.”
Panay lamang ang ngiti ni Yvonne sa mga empleyadong bumabati sa kanya habang siya’y naglalakad. May idea na siya kung bakit siya binabati ng mga ito.
‘Paano kaya nila nalaman?’ sa isip-isip pa ni Yvonne. Naging biglaan ang lahat kaya naman hindi rin nila ito ipinaalam sa kahit na sino. Kahit sa secretary nga niya na si Fora ay hindi niya pa ito nasabi.
Nagkibit-balikat na lamang si Yvonne. Patuloy siyang naglalakad hanggang sa makarating siya sa elevator.
Nang bumukas ang pintuan ay pumasok na sa elevator si Yvonne. Walang siyang kasabay sa kanyang pagsakay. Nang makita ni Yvonne na wala ng ibang sasakay bukod sa kanya ay pinindot niya ang button para magsarado na ang pintuan.
