chapter 12
1661 Words
"Let's find out kung hindi ka nga ba talaga masarap," pabulong na anas ni Killian na muntikan nang nagpabuway sa pagkakatayo ko.
Kakaibang kilabot ang naramdaman kong lumukob sa'kin kasabay nang pagkawala ng lakas ng mga binti ko. Hindi rin nakatulong nang pumaikot sa baywang ko ang mga braso ni Killuan upang saluhin ako mula sa muntikan ko nang pagkatumba.
Pero iglap lang, mula kay Killua ay natagpuan ko ang sarili sa mga bisig ni Killian.
Bago pa ako makahuma ay biglang binihag ni Killian ang nakaawang kong mga labi.
Iyong first kiss ko!
Ni sa hinagap ay hindi ko naisip na sa ganitong paraan ko maranasan ang first kiss at sa tao pang hindi ko boyfriend!
Dahil unang halik ko nga kaya hindi ko napaghandaan ang iba't ibang emosyong nagsalimbayan sa buo kong katawan.
Gano'n pa man ay ramdam na ramdam ko kung gaano kalambot ang pangahas na mga labi ni Killian habang humahagod sa sarili kong mga labi. Pakiramdam ko ay biglang lumutang mula sa sahig ang mga paa ko habang nagsipagsabugan ang fireworks sa paligid.
Tama bang maramdam ang ganitong pakiramdam kahit na hindi ko naman nagugustuhan ang nangyayari?
Pero, hindi nga ba?
Sa kabila ng sitwasyong kinasuungan ko ay nagawa pa talaga akong tuyain ng sarili kong isip. Kasi naman, kahit pilit ko pang itanggi ay talagang nakakawala sa katinuan ang paraan ng paghalik ni Killian sa'kin.
Hindi ko na maintindihan pati ang sarili kong katawan. Hindi ako makahinga, pero gustuhin ko mang kumawala mula sa kanya ay walang lakas ang mga braso kong itulak siya. Nang lusubin ng dila niya ang loob ng bibig ko ay nanlaki ang mga mata ko habang unti-unting naramdaman ang tuluyang pagkaubos ng hangin sa baga ko.
Kasunod niyon ay dumilim na ang paligid kaya pakiramdam ko ay tuluyan na akong naialay.
Goodbye, world, I'm dying!
======
Bigla akong napabalikwas ng bangon dahil sa masamang panaginip. Ang lakas ng kabog ng puso ko habang binabalikan ang napanaginipan ko.
Wala sa sariling napahawak ako sa tapat ng dibdib upang pakalmahin ang nagwawala kong puso.
Agad akong natigilan nang makapa ang suot ko at nang tingnan ko ito ay bumalik sa'kin ang mga huling pangyayari.
Nang mapansin ko kung nasaan ako ay napagtanto ko na ang panaginip at ang reyalidad ko ay wala naman palang kaibahan.
Nandito pa rin ako sa loob ng vip room at kasalukuyang nakaupo sa malaking couch habang parang mga guwardiyang nakatunghay sa'kin ang magkapatid na Carson.
Nag-iinit bigla ang magkabilaan kong pisngi habang bumabalik sa isip ko kung paano akong nahimatay habang hinahalikan ni Killian.
Hindi naman siguro nakakahiya ang gano'n! Kahit anong pilit kong pangungumbinsi sa aking sarili ay kabaliktaran pa rin ang nararamdaman ko.
"Sana ay malinaw na isip mo para maintindihan mo na hindi kasali sa tradisyon ng pamilya namin ang virgin sacrifice o kung ano pang kababalaghang tumatakbo riyan sa utak mo," kamadong pahayag ni Killua. "At hindi rin namin alam na virgin ka pa," pabulong pa niyang dugtong.
Bigla akong napaubo at nag-iwas ng tingin sa kanilang dalawa ni Killian. Pero bago iyon ay hindi nakaligtas sa paningin ko ang tinging ibinigay sa'kin ni Killian.
Hindi ko alam kung dapat ba akong makahinga nang maluwag o mas mabahala pa. Hindi ko na kasi kayang basahin ang naroong emosyon sa kanyang mga mata, pero tila ba kusang nagre-react doon ang katawan ko.
Nang maalala ang halik ay pinigilan ko ang sariling mapahawak sa sariling mga labi. Parang may kumislot sa bahaging iyon at ramdam ko nag mumunting kiliting naiwan ng mga labi ni Killian kaya bigla ko tuloy nakagat ang pang-ibaba kong labi.
Nang sulyapan ko ulit si Killian ay napansin kong nakatingin ito sa ginagawa ko kaya agad ko iyong tinigil at patay-malisyang nag-iwas ng tingin.
Ang awkward! Bakit niya kasi ginawa iyon?
"Are you thinking about the kiss?" mahinahong untag ni Killua sa'kin.
Bigla akong nasamid dahil sa kawalan niya ng preno sa pagsasalita.
"It's just a kiss, Beverly," dugtong pa niya. Unang pagkakataon na tinawag niya ako sa pangalan ko. Hindi ko mapigilang punain kung paanong parang ang sarap pakinggan ng pangalan ko mula sa kanya. "Normal ang gano'n batian sa pagitan ng mga magkakilala sa pinanggalingan naming bansa," pagpapatuloy niya.
Agad kong naalala na galing nga pala sa ibang bansa ang angkan ng mga Carson. Alam kong may mga bansang gano'n nga ang kaugalian pero hindi ko alam na gano'n din ka- liberated ang bansang pinanggalingan nila.
Dapat ko na bang kalimutan ang kasawiang dinanas ng first kiss ko sa pangahas na mga labi ni Killian?
Iyong first kiss na sana ay ibibigay ko sa first boyfriend ko ay napunta pa sa taong lumaki sa bansang normal lang na pagbati ang halik.
Gusto kong magdabog dahil sa inis, pero hindi na niyon maibabalik ang nawala sa'kin kaya nagkasya na lang ako sa lihim na pagluluksa.
Ang nakakainis lang ay ang napansin kong munting ngiti sa mga labi ni Killian na akala siguro nito ay hindi ko nakita. Pakiramdam ko tuloy ay alam niya kung gaano kahalaga sa'kin iyong ninakaw niyang halik kaya lihim din siyang nagbunyi.
Nakakaasar talaga ang bwesit na ito!
"Mas mahalaga nating pag-uusapan ngayon ay ang offer naming trabaho sa'yo," pukaw ni Killua sa naglalakbay kong diwa.
Hindi yata talaga ako lulubayan ng isang ito! Sa rami ng mga nangyari at nahimatay pa nga ako sa huli ay nanatiling composed itong si Killua. Binabalik niya palagi ang usapan tungkol sa offer nila!
Tutal ay hindi naman pala nila kailangan ng virgin sacrifice at malabong nakipagkasundo ang pamilya nila sa demonyo ay mabuti pang pumayag na lang ako. Maganda naman iyong offer, ang pinapangarap na sariling bahay at lupa ng mga katulad kong nangungupahan sa apartment ni Tita Ava.
Wala naman talaga kaming magagawa kung sakaling magbebenta si Tita Ava, kaya mas mabuti nang pumayag ako sa offer ng magkapatid na Carson na ito.
Kapag may sariling bahay at lupa na ako ay magagamit ko iyong ipon ko sa pandagdag sa pagtubos sa nakasanglang bahay ng mga magulang ko. Gagaan nang konti ang pamumuhay namin ni Violet, at baka sa pagkakataong ito ay magagawa na naming magbakasyon doon sa probinsya nila. Makapagpatayo na rin siguro kami ng legit na negosyo at hindi ko na kailangan pang manloko ng ibang tao.
Kung demonyo man ang magkapatid na ito, ay walang mawawala kung makipagkasundo ako sa kanila.
Lihim akong napangiwi nang maalalang meron na palang nawala, ang first kiss ko! Paano kaya ako makakagante sa aroganteng si Killian?
Kapag malaman ko ang tungkol sa kung anong pinaniniwalaang tradisyon ng pamilya nila, ay humanda sa'kin ang Killian na ito. Pasimple kong bubulungan ang Lola nila para maipit siya! Deserve niya iyon, dahil magnanakaw siya ng halik!
"Pumapayag na ako!" maya-maya ay sigurado kong anunsiyo.
Naningkit ang mga mata ko nang makita ko ang pagkislap ng mga mata ni Killian.
Wala akong tiwala sa kislap na iyon, pero hindi na ako nabigyan ng pagkakataong magkomento dahil naagaw na ang atensiyon ko nang pagtayo ni Killua.
Kapag ganitong nakaupo ako ay mas lalong naging malaki silang pareho sa paningin ko at kailangan ko pang tumingala.
"It's a deal then," nakangiting kausap sa'kin ni Killua.
Napatingin ako sa kamay nitong inilahad sa harapan ko. Hindi na nito hinintay na abutin ko iyon dahil ito na mismo ang kumuha sa kamay ko upang kamayan ako.
Napatutok ako sa kamay niyang sumakop sa kamay ko. Sa laki ng kamay niya ay sakop na sakop niya ang buo kong palad. Siguro kayang-kaya niyang pisain ang kamay ko nang walang kahirap-hirap.
"Ipapahanda ko ang kontrata para sa kasunduan natin," wika ni Killua na nagpaangat ng mukha ko mula sa pagkahugpong naming palad pabalik sa mukha niya.
"Kontrata?" kunot-noo kong tanong.
"Kailangan natin iyon para maprotektahan ang interes ng bawat partido," paliwanag niya. "Huwag kang mag-alala, I'm always fair. Mag-isip ka ng mga gusto mong ipalagay sa gagawing kontrata."
Habang nakatitig ako sa asul na mga mata ni Killua ay bumalik na naman iyong kakaibang pakiramdam na parang malulunod ako.
Paano ko bang hindi maisip na may bumabalot na kababalaghan sa kanilang magkapatid gayong tingin pa lang nila ay para na akong nahihipnotismo!
Nagising ako sa bahagyang pagkatulala sa mukha ni Killua nang maramdaman ko ang bahagyang pagpisil niya sa palad ko. Tsaka ko lang din napansing hawak-hawak niya pa rin ang kamay ko.
Palad ko iyong pinisil pero buong katawan ko iyong apektado. Katulad nang pagkakadikit ng balikat ko sa braso ni Killian kanina, ay muli na namang nagkagulo ang sestima ko dahil sa pagkakalapat ng mga palad namin ni Killua.
Hindi ako komportable sa ganitong pakiramdam dahil palagay ko ay kakainin ako nito nang buo kaya hinila ko ang kamay mula sa pagkakahawak ni Killua.
No'ng inakala kong tuluyan ko na itong mababawi ay biglang hinigpitan ni Killua ang pagkakahawak dito kaya hindi ko napigilang mapasinghap.
Nang muli akong tumingala ay kasalukuyan nang nasa mismong tapat ng mukha ko ang mukha ni Killua. At muli ay parang nagrigodon na naman ang puso ko at gustong tumalon mula sa dibdib ko.
Sa sobrang lapit ng mukha ni Killua sa'kin ay humahampas sa mukha ko ang mabango niyang hininga. Anong oras na pero fresh breath pa rin siya na para bang kagagaling lang mag-toothbrush.
Bigla kong naalala ang amoy ng hininga ni Killian no'ng hinalikan niya ako kanina. Pakiramdam ko kasi ay dumikit pa rin sa'kin ang bango ng hininga niya, medyo confident tuloy ako sa posisyon namin ni Killua.
Tiyak na ang mabangong hininga ng kapatid niyang si Killian ang naaamoy niya mula sa nakaawang kong bibig.
"In our country, we always seal every important agreement with a kiss," paanas na wika ni Killua sa mismong tapat ng mga labi ko.
Hindi ko napansin kung paanong sobrang lapit na agad niya sa'kin. Hindi ko rin magawang kumilos upang lumayo dahil para akong napaparalisa na ewan.
"Don't faint on me, Beverly," pabulong niyang usal bago ko naramdaman ang tuluyang paglapat ng mga labi niya sa sarili kong mga labi.
- Writer
