"GANITO ka ba kasipag na pati sa pagbabakasyon mo ay nagtitinda ka pa rin?" tanong sa kaniya ni Jared habang hinihintay nilang i-serve sa kanila ang arroz caldo. Nakaupo sila sa mahabang upuang kahoy na may espasyo sa gitna.
"Sanay kasi akong rumaket. Para akong magkakasakit kapag nakatunganga lang tapos walang pera. Kahit nga sa trabaho ko, nagsa-sideline pa rin ako." Nakangiting binalingan ito ni Jheann. "Kung gusto mo ng extra income, magsabi ka lang. Marami akong alam na kumikitang kabuhayan. Pati nga pagbebenta ng kidney ay pinasok ko na rin." Nang umasim ang mukha ni Jared ay nag-peace sign ang dalaga, sabay ngisi. "Char lang, Kapitan."
"Akala ko pa naman, totoong nagbebenta ka rin ng kidney. Gusto ko rin sanang ibenta ang puso ko."
Bumunghalit ng tawa si Jheann at hinampas sa br
