Dumiretso si Danilo sa labas ng kusina para magtungo sa banyo. Ililigo niya ang sakit ng ulo para matanggal na rin ang hang-over. Tuloy-tuloy niyang binuksan ang pintuan.
“Ahhhh!” sigaw ni Nadielyn na noon ay naghuhubad na ng pang-itaas na damit.
“Anak ng-” palatak ni Danilo at kaagad na napatalikod. Halos nakita na kasi nito ang panloob ng dalaga. Kulay pink!
“Bakit ka namamasok?” sita ni Nadielyn at mabilis na ibinaba ang t-shirt
“Bakit hindi ka nagkakandado?” pasermon na tanong niya sa dalaga. Parang pinagpawisan bigla ang pakiramdam niya.
“Nakalock ‘yan! Kaso ang lakas yata nang pagkakahatak mo. Malubay lang ‘yang lock. De kawit lang naman ‘yan di ba?” pagtataray pa ni Nadielyn na pulang-pula naman ang mukha.
