Kabanata 16 - Persistent
Pagkadilat ni V, ang tanging nakikita niya ay isang lalaking nakaupo sa upuan hindi kalayuan sa kinatatayuan niya. Nakayuko ito at maraming sugat ang mga paa at ang dibdib.
Para itong nilatigo dahil sa dami nitong sugat sa katawan. Kulay puti ang buhok nito na natatakpan pa ang mukha. Nakagapos ang mga kamay sa kaniyang likuran at parang wala na itong buhay.
Lumapit siya sa lalaking nakaupo pero unti-unti itong nagtaas ng ulo. Laking gulat niya nang makita niya ang isang lalaking kamukhang-kamukha niya ngunit kakaiba ang mga mata nito. Kulay itim iyon na may kulay pula sa gitna. Ang paligid pa ng buong mata niya ay may pulang ugat na para bang nagagalit.
Nang makita siya nito ay bigla na lang itong nagwala na para bang gustong sunggaban si V na kaharap niya.
