Nakabalik na sila Angelo at Dominic. Nasa harapan na sila ngayon ng pintuan ng condo unit ng una. Kanina pa sila rito at bitbit-bitbit pa ang kanilang mga bagpack na kanilang dala sa bakasyon.
Tinitingnan ni Angelo si Dominic. Nakikita niya sa mukha nito ang kaba na nararamdaman. Napansin rin niya ang bahagyang panginginig ng mga kamay nito. Ngumiti siya ng maliit saka inabot at hinawakan niya ang kanang kamay ng nobyo at bahagyang pinisil. Napatingin naman sa kanya si Dominic.
“Huwag kang masyadong kabahan dahil naniniwala akong magiging okay lang ang takbo ng lahat. Maniwala ka, magiging maayos lang ang lahat,” pagpapagaan ni Angelo sa loob ng kasintahan. Ito rin ang dahilan kung bakit hindi pa sila pumapasok sa loob, mistulang ayaw muna kasi ni Dominic dahil kinakabahan ito ng sobra.
