Hindi na ito sumagot pa o muling nagtanong. Gwapo naman talaga si Vins at mabait rin ito. Sa tingin ng iba ay masungit siya, mukhang kabaligtaran naman noon ang pagkakilala ko.
“Ikaw nagugustuhan mo rin ba siya, Miura?”
Sa kanyang naging katanungan ay agad kong naramdaman ang pamumula ng aking mukha. Hindi ko man iyon tahasang aminin ay alam ko na gusto ko nga siya, kaya lang ay hindi pa iyon pwede sa akin. Masyado pa akong bata sa relasyong nais ko nang pasukin sa ngayon.
“Siguro ay oo at siguro ay hindi, Kuya Geron.”
“Ang labo naman ng sagot mo sa tanong ko.”
“Malabo ba?” mahina akong tumawa, lalo pang naramdaman ang pag-iinit ng buong mukha. “Ganito, gusto ko siya pero hindi iyon pwede.”
Sa aking sinabi ay agad na kumabog ang aking dibdib, pakiramdam ko ay narinig iyon ni Vins.
