HINDI mapalis ang ngiti sa labi ni Chrislynn habang nakatitig sa isang partikular na bagong release na libro sa book shelves ng isang Mall sa may EDSA. Kinuha niya ang isang kopya niyon at binuklat-buklat.
"Buti na lang may kopya pa," masayang wika ng isang Ginang na agad kinuha ang isang kopya ng libro ni Steffi sa book shelves. Isa na lang ang natira doon. Napatingin pa ito sa kanya at sa hawak niyang pocketbook. Lalong lumawak ang ngiti nito. "Paborito mo rin ba, hija, si Steffi?"
Nakangiting tumango siya. "Opo."
"Naku, ako rin. Lahat ng libro niya ay meron ako sa bahay. Gusto ko nga siyang ma-meet pero ang balita ko ay hindi pa siya pumapayag para sa isang booksigning." Bumuntong-hininga ito at muling ngumiti.
Kung hindi mamamansin ang Ginang ay iisipin ni Chrislynn na suplada ito.
