Tawang-tawa si Luther nang maabutan ng sinasakyan niyang kabayong si WindWalker ang kabayo ni Anemone na si MoonCherub. Magaling sa pakikipagkarera ang kanyang kababata kaya kahit bigyan niya ito ng patas na laban ay mahihirapan siyang basta-basta na lang itong talunin.
“Talo ka!” malakas niyang sambit, nakangiti.
Sa pagitan ng mga paghingal ay tumango si Aneng. “Oo na, panalo ka na.”
Ibinalik na nila sa kuwadra ang mga kabayo at sabay na silang naglakad pabalik ng malaking bahay. Natigilan siya nang mapansing hindi tumuloy sa loob ng mansiyon ang babae at nanatili lang itong nakatayo sa tapat ng pintuan.
Nilingon niya ito, nakakunot-noo. “Bakit, Ane?”
Bumuntong-hininga ito. “W-wala naman si Nazaron dito kaya hindi siguro tamang dito ako manatili sa mansiyon ng mga Altieri.” May bahid
