ANG malamig na dampi ng sahig sa aking balat ang unang pumasok sa isip ko bago tuluyang nagising. Ramdam ko ang pagkakabugbog sa itaas na bahagi ng aking likod. Minulat ko nang dahan-dahan ang mga mata ko. Kumilos ako upang bumangon, pero natigilan ako nang makitang may kutsilyo sa kamay ko.
Ilang segundo akong natulala at nakatitig sa madugong talim ng kutsilyo. Hindi ko alam kung naapektuhan rin ba ang utak ko sa pagkakahampas sa'kin, pero ang tagal bago ko na-realize na iyon mismo ang kutsilyong nakita kong nakabaon sa tiyan ni Drei.
Kasabay ng pagsalakay ng matinding takot ay nasinghap ako nang malakas at basta na lang binitiwan ang kutsilyo. Nagmamadali akong bumangon, pero pagbangon ko ay namataan ko naman ang katawan ni Drei sa aking tabi- nakatihaya, umaagos ang dugo at halatan
