The TWIN Brothers And The Beautiful Nerd

Chapter 14 -Nagseselos daw-

Ezekiel's POV

Nandito ako ngayon sa penthouse ni Dark. Ayoko munang manatili sa condo ko dahil nandidiri ako sa babaeng 'yon. Ayoko muna siyang makasama dahil baka kung ano pa ang magawa ko sa kanya. Hindi ako makapaniwala sa mga sinasabi niya sa akin. Anong klaseng babae ba ang ipinakasal sa akin ng aking mga magulang?

"Are you kidding me, man? Your wife was really picking her nose while she was cooking? That’s absolutely disgusting! I honestly can’t believe you ended up with someone like her. If my wife did something like that, I would be out of there in a heartbeat. Just think about it... ang pangit-pangit na nga niya, and to make matters worse, she has zero sense of hygiene. It’s just way too much to handle! Damn!" Sabi ni Dark. Apat ang kaibigan ko, si Dark, Randle, Carlos at si Dave. Lahat sila ay hindi makapaniwala na pinakasalan ko ang babaeng 'yon.

"Pinakasalan ko lang naman siya dahil sa mana ko. Hindi naman ako makakapayag na mapupunta lahat kay Enzo ang mga pinaghirapan ko sa mga negosyo ng mga magulang namin. Dalawang taon lang naman at maaari ko na siyang hiwalayan, at saka wala ka pa namang asawa. Grabe bro, nasusuka pa rin ako sa tuwing maiisip ko ang nangyari kaninang umaga. Kaylanman ay hindi ko kakainin ang mga pagkaing lulutuin niya. Nakakadiri siya! Parang gusto ko na siyang sukuan." Sagot ko. Kumisig pa ako, kasi parang naiimagine ko ang lahat. Bwisit talaga ang babaeng 'yon. Napapatingin tuloy ako sa ilong ni Drake at baka may makita ako. Kasalanan niya ang lahat ng ito.

"Huwag mong tignan ang ilong ko, gago ka! Malinis ako sa katawan ko, sira ulo ka talaga!" Natawa naman ako sa tinuran niya. Si Genevieve ang dapat niyang sisihin at hindi ako.

"Alam mo ba na kagabi ay inaakit niya ako habang lasing ako? May napansin pa ako sa kanya na ipinagtataka ko. Dati kasi hindi ko napapansin dahil sa mga damit na isinusuot niya. Nuong kasal namin ay napansin ko na malaki ang bilbil niya dahil medyo hapit ang suot niyang damit pangkasal, kaya alam ko na malaki ang balakang at bilbil nya. Kagabi, nakasuot siya ng manipis na pantulog at kitang-kita ko ang magandang hubog ng kaniyang katawan at sobrang kinis ng kanyang balat. Kung nakatalikod siya at hindi mo titignan ang mukha niya ay iisipin mo na napaka ganda niyang babae." Wika ko na ikinatawa ni Dark. Nakitawa ako kahit hindi ko alam kung bakit siya tumatawa.

"Lagi mo na lang siyang patalikurin, o kaya naman ay takluban mo ng paper bag ang mukha niya sa tuwing kasama mo siya. Ikama mo, baka naman masarap sa kasama 'yan kahit pangit." Tumatawang ani ni Dark. Maging ako ay natawa sa kanyang tinuran, pero hindi naman iyon ang ibig kong sabihin sa kanya.

"Hindi mo nakukuha ang ibig kong sabihin sa'yo bro. Nagtataka ako kung bakit nuong kasal namin ay ang laki ng bilbil niya, pero kagabi ay napakaganda ng kaniyang katawan, para nga itong pang modelo. Ano nangyari sa bilbil niya? Sigurado ako sa nakita ko, tinitigan ko pa ito dahil napakaganda ng katawan niya. Maging kaninang umaga habang nagluluto siya at nakatalikod sa akin. Bilugan ang puwit niya at talagang may kurba ang katawan niya." Paliwanag ko sa kanya. Kagabi ko pa kasi iniisip kung bakit parang nagbagong bigla ang tingin ko sa katawan niya. Ganuon din kaninang umaga kahit malaki ang suot niya. Hindi ko nakikita ang malaking balakang niya at ang malaking tiyan niya.

"Baka naman namalikmata ka lang. Hindi ba sabi mo ay lasing ka kagabi? Maaaring dala ng kalasingan mo eh tingin mo sa asawa mong pangit ay isang seksing babae. Baka 'yun ang pinapantasya mo sa kanya kaya 'yon ang nakita mo kagabi. At kung 'yung kanina naman, kasi bagong gising ka at pwedeng iyon pa rin ang pinapantasya mong katawan niya kaya iyon ang nakikita mo. Pwedeng ganuon, hindi ba?" Sagot niya na ikinatahimik ko. May punto nga siya sa sinabi niya, maaaring ganuon nga ang nangyari sa akin kagabi at kaninang umaga.

"Buti hindi ka ginapang ng asawa mo kagabi? Grabe bro, sa ating lahat na magkakaibigan, ikaw ang kilalang chick magnet, at lahat ng babaeng nakaka-date mo ay mga mukhang diyosa ng kagandahan. Kapag nalaman ng lahat na 'yan ang asawa mo, maghukay ka na sa bakuran ng mansion ninyo upang itago ang sarili mo sa kahihiyan." Pang-aasar sa akin ni Dark.

"Gago, alam na nila." Sagot ko kaya tumawa lang ito. Natahimik na lamang ako, hindi na ako ulit nagsalita pa. Ngayon pa lang ay pinag-iisipan ko na agad na mag-prepara ng divorce paper na pipirmahan ko agad para pagdating ng tamang oras ay ilalatag ko na lang ang dokumento sa harapan ni Genevieve. Isang pirma lang niya ay tapos na rin ang paghihirap naming dalawa, lalong-lalo na ako. Atat na talaga akong hiwalayan ang pangit kong asawa.

"May nangyari ba sa inyo kagabi? Bumigay ka ba sa pang-aakit ng asawa mo?" Tanong niya. Tumawa ako. Hindi ko makalimutan ang pagkaripas niya ng takbo kaya ikinuwento ko ito sa kanya. Tawa siya ng tawa, hindi siya makapaniwala sa nangyayari sa buhay ko.

Napatingin ako sa aking orasang pambisig, mag-aalas diyes na ng umaga ay hindi pa dumarating sila Dave. Tinawagan namin sila upang kumain sa labas, mukhang tanghalian na kami makakakain. Okay lang din naman dahil gusto ko pang maalis sa aking isipan ang nangyari kanina sa kusina ko.

Alas onse 'y media na ng dumating sila Dave. Gutom na gutom na talaga ako kaya umalis din agad kami at nagpunta kami sa isang mall upang duon na lang kami kumain. Habang naglalakad kami sa mall ay napansin namin ang mga taong may pinag-uusapan at nagbubulung-bulungan. Sumisilip pa sila sa isang restaurant kaya napatingin din kaming magkakaibigan sa isang European restaurant. Ganoon na lamang ang gulat ko ng makita namin si Genevieve na kasama ang kaniyang kaibigan at isang lalaki na naka-akbay sa asawa ko. Sino ang tarantadong umaakbay sa asawa ko?

"Akalain mo nga naman, kahit pala pangit ay nanlalalaki din." Sabi ni Dark. Kinilala kong mabuti ang lalaki hanggang sa naalala ko kung sino ang lalaking ito, siya lang naman ang kapatid ni Tami na balitang may gusto nuon kay Genevieve. Tarantado din ang isang ito, kahit alam niya na kasal na si Genevieve ay inaakbayan pa. Kung maka-akbay pa siya sa asawa ko... akala mo dalaga pa ang inaakbayan niya.

Naririnig namin ang mga bulung-bulungan sa paligid, ang mga pang-iinsultong ginagawa nila sa aking asawa pero hindi ko na pinansin pa dahil nakatitig lamang ako sa dalawang magkaakbay na akala mo ay sarili nila ang mundo.

"Bakit salubong 'yang kilay mo? Jesus! Don't tell me na nagseselos ka? It's written all over your face, man." Sabi ni Dark na ikinalingon ko sa kanya. Ako magseselos? Of course not!

"Baliw! Nagtataka lang ako kung bakit sila magkasama." Muli kong tinignan sila Genevieve, pagkatapos ay tumalikod na ako para umalis, pero muli kong nilingon ang kinaroroonan nila. Narinig ko pa ang mahinang pagtawa ng mga kaibigan ko, pero ayokong patulan ang pang-iinis nila dahil kaylanman ay hindi ko magugustuhan ang pangit kong asawa.

Nakarating kami sa isang restaurant at umorder agad kami ng makakain. Ako naman ay kinuha ko ang aking telepono, hinanap ko ang numero ni Genevieve na ibinigay niya sa akin kahapon after ng kasal namin. Wala akong balak kuhanin sa kanya ang kanyang numero, pero kinuha niya ang telepono ko at siya na mismo ang naglagay ng numero niya sa aking phone. Pagkatapos ay nagpa-misscall siya sa kanyang telepono upang ma save niya ang aking numero. Mautak na babae.

"Nasaan ka? Bakit wala ka dito sa condo?" Mensahe ko sa kanya at hindi ko alam kung bakit ko ito ginawa. Gusto ko rin malaman kung ano ang isasagot niya sa akin.

"Nasa mall, kumakain ng lunch. Pakialam mo ba ha?" Sagot niya na ikina-iling ng aking ulo. Maldita talaga ang asawa ko. Nakakainis kung sagutin ako.

"Sino ba kasama mo?" Reply ko sa kanya. Gusto kong malaman kung ano talaga ang isasagot niya.

"Si Tami, kaming dalawa lang. Huwag ka ngang istorbo at kumakain kami. Hindi na ako magre-reply kaya huwag ka ng sumagot pa." Natawa ako ng pagak. Nagsinungaling pa talaga siya sa akin. Bakit kailangan niyang magsinungaling sa akin?

Mabilis kong naitago ang aking telepono sa bulsa ko habang nakatingin pa rin ako sa menu. Humugot ako ng malalim na paghinga. Hindi ko maintindihan ang mga nakasulat sa menu, iniisip ko kasi kung bakit nagsinungaling siya sa akin.

Ano kaya niya si Mathew? Siguro magkasintahan sila at hinihintay lang din niya na ma-divorce kami. Ibang klase din si Mathew, walang taste pagdating sa babae. Hindi ako makapaniwala na papatol siya sa isang katulad ni Genevieve.

"Bakit ba napaka-tahimik mo ha? May iniisip ka ba?" Si Carlos, titig na titig pa sa akin. Idinahilan ko na lamang ang importanteng meeting ko bukas para hindi na nila ako kulitin pa. Sabi ko ay iniisip ko kung magagawa ko ng maayos ang meeting bukas at naniwala naman sila. Dumating naman ang pagkain namin at kahit nagugutom ako ay hindi naman ako nakakain ng marami, marahil ay nalipasan na ako ng gutom. Marahil ay nawalan din ako ng gana dahil sa nangyari kaninang umaga.

Pagkatapos naming kumain ay nagsimula kaming maglakad palabas ng mall. Nagulat ako ng makita ko na makakasalubong namin sila Genevieve ng hindi sinasadya. Nakaakbay pa rin sa kanya ang sira ulong Mathew na ito.

Napahinto ako sa paglalakad at nakatitig lamang ako sa kanila. Isang ngisi at ngiti ang ibinigay sa akin ni Genevieve bago ito nagsalita.

"Akala ko ba nasa condo ka? Sabi mo sa message mo sa akin ay nasa condo ka. Ano ang ginagawa mo dito? Nagsisinungaling ka?" Wika niya na ikinatingin sa akin ng mga kaibigan ko. Hindi ko sila pinansin at nakatitig lamang ako kay Genevieve.

"Umuwi ka na dahil kailangan mong linisin ang condo natin, hindi gawain ng isang may asawa ang magpa-akbay sa ibang lalaki." Hindi ko alam kung bakit iyon ang isinagot ko. Nagulat ako at napatingin pa ako sa mga kaibigan ko na may panunuksong ngisi sa akin.

"OMG! Nagseselos ang asawa ko." Sabi ni Genevieve. Akma itong lalapit sa akin na nakatulis pa ang nguso ng bigla akong parang natauhan at napaatras ako ng ilang hakbang. Napahinto siya sa paglalakad at ngumiti sa akin, at muling itinulis ang kaniyang nguso kaya napaatras akong muli. Marami ng tao ang nakatingin sa amin kaya bigla na lamang akong nagmadaling umalis at halos takbuhin ko na ang exit ng mall makaalis lang sa lugar na ito. Tinatawag ako ni Genevieve, pero para akong biglang nabingi at hindi ko na siya pinansin pa.

"Bilisan ninyo!" Sigaw ko sa mga kaibigan ko na walang ginawa kung hindi ang tumawa ng tumawa. Hindi ako makapaniwala na iniisip niya na nagseselos ako. Hell no! Kahit makipaglampungan siya sa kahit na sinong lalake ay wala naman akong pakialam.

Nakakatawa siya kung iniisip niya na nagseselos ako sa lalaking kasama niya. Kaylanman ay hindi mangyayari 'yon.

Dinadala niya ang apelyido namin kaya kailangan niyang ingatan ito at huwag niyang sirain ng dahil lamang sa panglalalaki niya. Unbelievable! Sa hitsura niyang 'yon ay nagawa pa talaga niyang mang-lalake?

"Bro, baka madapa ka." Sabi nila. pero hindi ko sila pinapansin. Bawat hakbang ko ay may pagmamadali. Ni hindi ko na nga nilingon pa ang kinaroroonan nila Genevieve. Bahala siya sa buhay niya, hindi ako nagseselos sa lalaking 'yon.

"Bilisan ninyo. Ayokong mapahiya sa mga tao at isipin na totoong asawa ko ang babaeng 'yon." Sabi ko.

Pagkarating namin ng parking lot ay nagmamadali akong pumasok sa loob ng aking sasakyan. Sa ibang mall na lang kami pupunta, o kaya naman ay mag-iinuman na lang kami. Mas okay pa 'yon kaysa naman umuwi ako ng condo ko at makita ko lang ang mukha ni Genevieve.

"Relax. Para kang may tinatakasang aswang." Sabi ni Dark kaya ang lakas ng pagkakatawa nila.

"Sumakay na kayo ng sasakyan ninyo at ng makaalis na tayong lahat dito. Bilisan ninyo." Sabi ko at pinaandar ko na ang makina ng aking sasakyan.