لاقيس

لاقيس البارت الرابع عشر

كتابات ل ghada saeed

لاقيس

البارت الرابع عشر

بقلم / غادة سعيد

هند اول ما فتحت الباب لقت محمد قاعد كان مستنيها باين على وشه ملامح الرعب والقلق وبيقول : لها انتي كنتي فين يا هند كل ده و واخده ايسل معاكي وازاي ما تتصليش بيا ولا تقولي لي انت رايحه فين و نازله ومش بتردي على تليفونك خالص ... انا كنت قلقان جدا عليك وعلى ايسل انت ازاي ما ترديش على كل ده انا سبت الشغل وجيت بسببك ...

هند : انا نزلت اشم شويه هواء انت هتمنعني اني انزل انا وبنتي نتمشى شويه ...

محمد : عاوزه تنزلي انزلي براحتك بس ما تاخديش بنتي معك انا ببقي قلقان عليها و خايف منك عليها وبعدين انت ما اتصلتيش بي ليه وقلت لي انك عاوزه تنزلي وما قلتليش انك هتاخدى ايسل ... حتى تليفوناتي مش بتردي عليها انا كنت قاعد هموت من الرعب عليكم انت تصرفاتك ما بقتش طبيعيه يا هند عشان تاخذي ايسل وتنزلي ...

هند : بس انا حره انزل زي ما انا عاوزه وفي الوقت اللي انا عاوزاه انت مش هتمنعنى عن بنتي ...

محمد : خلاص اقفلي الموضوع ده يا هند و بعد اذنك لما اتصل بك ثاني ابقي ردي على تليفوناتي انا داخل انام دلوقت عشان انا اتخنقت من كثر الكلام بتاعك ... دخل محمد ينام واخذ ايسل معاه ... هند قالت له : انت بتاخذ ايسل .. ايسل هتنام جنبي .. قال لها : لا بنتي مش هتنام غير جنبي بعد كده انت ما بتشوفيش نفسك وانت نايمه بتعملي ايه ... انا اخاف اصحى من النوم الاقي بنتي جرالها حاجه بسببك .. قفل على نفسه الاوضه بالمفتاح وهند كانت بره قاعده تعيط بسبب تصرفات محمد معاها ... قعد محمد على السرير هو وايسل وبدا ينيمها وماسك تليفونه .. لقي رساله جايه له من ساره بتقول له فيها : ازيك يا محمد عامل ايه انا كنت باكلمك اسال عن هند هي رجعت من المستشفى ...

محمد : ايوه رجعت امبارح .. ساره كانت بتقول له كده عشان تفتح معاه اي كلام و هي اصلا كانت عارفه ان هند في البيت من مكالمه هند لها ...

ساره : طب وهي عامله ايه دلوقت بقت احسن ..

محمد : والله يا ساره انا مش عارف اقول لك ايه بس انا بقيت قاعد قلقان جدا من هند وخائف اسيب ايسل معها ممكن اطلب منك طلب ..

ساره : اه طبعا اتفضل ..

محمد : ممكن تيجي تقعدي معنا هنا كم يوم تخلي بالك من ايسل عشان انا عندي ضغط شغل ومش هاعرف اقعد في البيت ..

ساره : طب انا ممكن اخذ ايسل معايا في البيت لحد ما هند حالتها تتصلح شويه بس انا مش عارفه هي هند هتوافق ولا لا ...

محمد : اكيد طبعا مش هتوافق انها تسيب بنتها تعالى انت اقعدي معنا كم يوم واعملي حجه ان بيتك في حاجه مش هتقدري تقعدي فيه واكيد هند مش هتمنع انا بطلب منك الطلب ده كاخ بيطلب منه اخته ارجوكي ساعديني في المحنه اللي انا فيها ...

سارة : والله يا محمد انا اعمل اي حاجه عشان احافظ علي ايسل و عالعموم انا هاجيلكم النهارده بليل و اقولها اني هبات معاكم كام يوم و هشوفها هتقول ايه ...

هند كانت قاعده في الاوضه لوحدها حزينه مش عارفه تعمل ايه في الي هي فيه ده ... مسكت تليفونها و اتصلب ب دكتور علي ...

هند : ازيك يا دكتور انا كنت باكلم حضرتك عشان اشوفك عملت ايه في الموضوع اللي انا قلت لك عليه انا عارفه انك قولتلي اكلمك بالليل بس انا بجد مخنوقه جدا ومش عارفه اعمل ايه محمد بيعاملني معامله وحشه قوي وانا عاوزه اخلص من كل اللي انا فيه ده و بفكر في الانتحار ...

دكتور علي : اهدي بس يا هند لازم تخلصي الي انتي عملتيه من الاول طالما بدأتي يبقي لازم تكملي الي بدأتيه معلش يا هند انا عارف ان الموضوع صعب عليكي بس للأسف مش هينفع تتراجعي تاني خلاص ..

هند : يعني انت بتقولي لازم اكمل و مرجعش بس انت في نفس الوقت مش عاوز تساعدني طيب انا هعمل كده لوحدي ازاي قولي هقدر اعمل الطلب ده ازاي اصلا .

دكتور علي : خلاص يا هند انا قررت اني اساعدك مش هسيبك تعملي كده لوحدك ولا هيجيلي قلب اخليكي تروحي المكان ده لوحدك اصلا ... احنا هنروح مع بعض و زي ما تيجي تيجي بقي قوليلي انتي هتروحي عالساعه كام يا هند ...

هند : هروح عالساعه ٢ كده بليل لما يكون البيت كله نايم و مفيش حد خالص صاحي و هي كمان طالبه مني اني اروح في الوقت ده ..

دكتور علي : يعني هي كمان بتتشرط عليكي تروحي في الوقت ده طب منروح بالنهار احسن ايه الرعب ده ..

هند : والله انا قولت الكلام ده قالتلي لازم بعد نص الليل مش عارفه ايه وجهة نظرها والله بس هي قالتلي كده فا لازم اعمل الي هي قالتلي عليه عشان ميحصلش مشاكل ... انا بجد مش عارفه اشكرك ازاي انك هتقف جنبي و تساعدني اني اعدي المحنة دي انت عملت الي جوزي معملهوش معايا والمفروض انه ضهري و سندي لكن للأسف مصدقنيش ولا صدق اي كلام من الي انا قولتهوله بس هيجي اليوم و يعرف ان انا كان عندي حق بس انا مش مسمحاه و زعلانه منه اكتر واحد فالدنيا كلها ...

دكتور علي : بس انتي لازم تعذريه برضو عشان هو ميعرفش الي انتي بتمري بيه و لا دارس الكلام ده زيي .. فجأه الجرس رن عند هند و قفلت مع دكتور علي عشان تشوف مين الي بيخبط عالباب ...

راحت هند عشان تفتح الباب لقت سارة جايه و جايبه شنطه هدومها معاها ... هند كانت مستغربة جدا خصوصا ان ساره عايشه لوحدها ايه الي هيكون جايبها تبات عندهم ...

سارة : شوفتي الي حصلي يا هند المية قطعت في العمارة كلها ملقتش مكان اروحه غير عندك بس لو هيضايقك انا همشي طبعا مش عاوزه اتقل عليكي بس هما يومين بس و بعد كده هروح بيتي ...

هند : ايه الي بقوليه ده يا سارة خدي راحتك البيت بيتك طبعا

سارة : انا بس خايفه اكون بتتاقل عليكم يا هند بس انتي عارفه ان بابا و ماما الله يرحمهم و مليش اخوات حتي قرايبي ميعرفوش اي حاجه عني ملقتش قدامي غيرك و قولت اجي اقعد عندك يومين يكون المية جت

يتبع