لاقيس

لاقيس البارت الخامس عشر

لاقيس

البارت الخامس عشر

بقلم / غادة سعيد

سارة : انا عارفه اني رخمه جدا وعارفه كمان انكم مش هتبقوا قاعدين براحتكم في البيت خصوصا محمد بس انا مليش اي حد غيركم دلوقتي خالص كل اهلي مبيسألوش عني من ساعة ما بابا و ماما ماتوا الله يرحمهم انتو اهلي و كل حاجه ليا ...

هند : قولتلك ملوش لزمه الي بتقوليه ده ... و بعدين انتي جيتي في الوقت المناسب جدا انا كنت محتاجاكي تقعدي مع ايسل عشان انا تعبانه و نفسيتي تعبانه اليومين دول ولازم تيجي تقعدي مع ايسل .. عشان هي بتحبك جدا لو ما كنتيش جيتي انا اللي كنت هاكلمك اقول لك تيجي اصلا ... انا با منك امانه يا ساره لو جرا لي اي حاجه تخلي ايسل في عينيك ولما تكبر ابقي قولي لها ان انا كنت باحبها قد ايه ... وعمري ما عملت حاجه عشان اأذيها ... واني كنت بحافظ عليها من اي حاجه ممكن تأذيها انا با منك امانه عشان انا اليومين دول نفسيتي تعبانه جدا .. وحاسه انى هيجرالي حاجه ...

سارة : ايه الي بتقوليه ده يا هند محدش يربي بنتك غيرك انتي و بس بلاش تقولي الكلام ده عشان قلبي بيوجعني جدا عليكي و حاسه اني مش متطمنه خالص عليكي ... و قعدت تعيط و تحضن في هند و تقولها انتي فيكي ايه بس يا هند انا نفسي اساعدك بس مش عارفه ... نفسي اخد ب ايد*كي و مش مدياني اي فرصه ... احكيلي الي فيكي جايز اقدر اساعدك و احللك المشكله ... انتي عندك مشاكل مع محمد ؟؟؟

هند : مكنش عندنا اي مشاكل والوضع اتغير معرفش ازاي و امتي بس دلوقتي المشاكل كلها بقت فوق راسي يا ساره وما حدش حاسس بي حتى انت مش مصدقاني في اي كلمه باقولها لك انا والله ما بجنونه ولا كذابه زي ما انت فاكره انت ومحمد اقرب اثنين لي وانتم برده مش مصدقاني انا باشوف حاجات غريبه وبسمع حاجات اغرب وبامر ب ازمه نفسيه حاده ومش لاقيه حد جنبي ... بس مسيركم تعرفوا ان انا كنت مظلومه ما فيش احد فيكم وقف جنبي وبت اعتبروني مجنونه انت لازم تخلي محمد يثق فيا وفي كلامي عشان انا كده مش هاقدر اكمل حياتي وانا حاسه ان ما حدش واقف جنبي في المحنه اللي انا فيها ...

سارة : ما لك بس يا حبيبتي ايه اللي حصل لك انت كنت عاقله يا هند والله انتم شكلكم اتحسدت اصلا طيب هاجي معك وهاقول لك ماشي انت معمول لك عمل مين بقى اللي عامل لك العمل ده يا هند انت كل الناس اللي حواليك بيحبوك جدا هيكون مين يعني ...

يمكن يكونوا اهل جوزك اللي عملوا كده عشان انت عزلت من البيت وسبتيهم قالوا يعذبوكي عشان تحرمي تسيبيهم وتمشي ... ولا يمكن سلفتي غيرانه منك ومش عاوزاك تكوني احسن منها مش انت كنت تحكي لي انها على طول في مشاكل هي وجوزها يمكن شافت عيشتك حلوة ومستقره قالت لما ابوظ لها حياتها ..

هند : اللي بتقوليه ده مستحيل يا ساره لان انا مشيت وسبت البيت لما حسيت ان حياتي مش مستقره وكان بيحصل لي اللي بيحصل لي ده يعني كنت كويسه معهم جدا ومستحيل حماتي تفكر تعمل في كده او سلفتي ..

احنا كنا عيله حلوه جدا و كويسين مع بعض وعمري ما احد فينا زعل الثاني ازاي بقى هيعملوا في كده وانا عمري ما حسيت من ناحيته منهم بيكرهوني ولا بيتمنوا لي اي حاجه وحشه ... الكلام ده مش داخل دماغي خالص يا ساره و حاسه ان في حد ثاني اللي اذاني ..

سارة : والله يا هند انت هبله اصلا و طيبه و بتصدقي اي احد يعاملك كويس و بتفتكري انه بيحبك لكن انت ما تعرفيش ايه اللي جواهم من ناحيتك من حسد وحقد الله اعلم بهم بس انا عاوزاكي تصحي معاهم شويه و تروحي تزوريهم كده زيارة في البيت و تحاولي تدوري وراهم ب اقصي سرعه لأن اللغز الي انتي فيه هتلاقيه عندهم مش عند حد تاني ....

هند بدأت تقتنع بكلام سارة صاحبتها لأن الزن عالودان امر من السحر و بكده هند بدأت تشك في اهل جوزها انهم ورا كل الي بيحصلها ده عشان ممكن جدا يكونوا بيحقدوا عليها او اي حاجه في دماغهم من ناحيتها ...

لكن كل الي كان في دماغها دلوقتي ازاي هتنفذ الشرط التالت و سارة عندها و هتسيبها نايمه ازاي في البيت لوحدها و محمد كمان هيكون نايم هتسيبهم ازاي مع بعض لوحدهم تنزل ... دا حتي ميصحش اصلا ...

بس هي كانت متضطرة انها تعمل كده عشان تنقذ بنتها .

سارة : مالك يا هند سرحانه في ايه توهتي فجأه كده ..

هند : ابدا يا سارة سرحانه في الي بيحصلي ده و مش عارفه اخره الي انا فيه ده ايه والله ...

سارة : متقلقيش ان شاء الله ربنا هيف*جها ... انا بعد إذنك هقوم ادخل الحمام و اغير هدومي والله انا محرجة منك جدا ...

هند : قومي يا حبيبتي مفيش احراج ولا حاجه اعتبري البيت بيتك و اعملي الي عاوزاه ...

قامت سارة تدخل الحمام و هند مسكت تليفونها و بعتت رساله لدكتور علي قالتله فيها : علي ميعادنا يا دكتور و لا غيرت رأيك ؟

دكتور علي : لا طبعا يا هند انا مبرجعش في كلامي الساعه اتنين بالدقيقه هستناكي في المكان الي قولتيلي عليه متقلقيش انا عمري ما هسيبك في مكان زي ده لوحدك ... وبعدين مش انا اديتك كلمه خلاص متقعديش كل شوية تسألي انا كلمتي سيف علي رقبتي .

هند : اكيد طبعا انا عارفه حضرتك كويس بس انا قولت اأكد عليك بس لا تكون نسيت بس مش اكتر ... انا دلوقتي عندي مشكله كبيرة اصلا فيه واحده صاحبتي جاتلي تبات معايا وانا مكنتش عاملة حسابي خالص و كده هتضطر اسيبها هي و جوزي هنا و انزل انا اروح المشوار ده ... و كده ميصحش يعني فاهمني ...

دكتور علي : هند اوعي تكوني بتلمحي انك تسيبيني في المكان ده لوحدي اروح اجبلك الورقه مستحيل هقدر اعمل كده من غيرك انا اخري هاجي معاكي .. انورلك كشاف .. افتحلك باب .. غير كده انسيني ..

هند : لا والله يا دكتور انت كده فهمتني غلط خالص انا بس مجرد اني بفضفض معاك لكن انا اكيد لازم اروح بنفسي .. انا لو ما رحتش هتعتبرني معملتش المهمة دي خالص و كده ممكن تأذي ايسل انت متعرفهاش ...

دكتور علي : خلاص يا هند انا هستناكي في المكان والميعاد حاولي تتصرفي و متتأخريش لأني مكلف واحد صاحبي يقعد مكاني في المستشفي الساعتين دول و مش هقدر اسيب العيانين يوم تاني انتي عارفه طبعا الظروف الي انا بمر بيها اليومين دول ...

هند : اه طبعا يا دكتور متقلقش انا مش هتأخر ...

قفلت هند معاه وقعدت تفكر هتعمل ايه وهتسيب سارة ازاي لوحدها في البيت مع محمد بس قالت هتنفذ الي قالتلها عليه و زي ما تيجي تيجي بقي و خلاص ...

هند كانت في دنيا تانية في اوضتها و سارة كانت في الحمام غيرت هدومها و رشت بيرفيوم و حطت ميكب خفيف .. و هي خارجه لقت محمد في وشها ..

محمد : ازيك يا سارة عاملة ايه ... انا بشكرك اوي انك جيتي زي ما طلبت منك ... انتي كده طمنتيني علي ايسل و هتخليني اروح الشغل و انا متطمن عليها ...

سارة : مكنتش اقدر ما اجيش انت متعرفش غلاوتك عندي اقصد يعني غلاوتك انت و هند عندي انا جيت عشان حسيت ان فعلا هند محتجالي و ايسل كمان محتاجه حد طبيعي يخلي باله منها عشان البنت ميجلهاش عقده نفسية .. انا مش عوزاك تقلق خالص يا محمد انا هفضل جنبكم لحد ما هند تخف و تبقي كويسه ... بس انا شايفه ان حالتها بتسوء اكتر من الاول انا اتكلمت معاها شويه و يا عيني عقلها بقي مفوت خالص و بتقول كلام غريب جدا ... انا خدتها علي اد عقلها و لما جيت قولتلها اني هقعد معاكم يومين عشان الميه قاطعه عندي في البيت كله و مش هقدر اقعد في البيت من غير مياه ... ملقتش حجه اقولها غير دي انا قولت اقولك احسن تتلغبط معاها بالكلام ... فجأه باب الاوضه بتاع هند اتفتح و هند خرجت لقت سارة واقفه تتكلم مع محمد ...

سارة : انا قولت اعتذر ل محمد يا هند ان انا هاجي اقعد معاكي كام يوم عشان حاسه ان انا متقله عليكم اوي ... و بصراحه م**وفه منكم ..

هند : متقوليش كده يا سارة البيت بيتك و تيجي في اي وقت انتي مش مجرد صاحبة انتي اختي ...

سارة : ربنا يعلم انا بحبك اد ايه انتي اكتر من اختي و راحت حضناها ... يلا يا جماعه تصبحوا علي خير بقي انا هنام جنب ايسوله عشان واحشتني جدا بجد ده بعد اذنكم طبعا ...

هند : اتفضلي يا حبيبتي نامي مكان ما تحبي ...

دخلت سارة تنام جنب ايسل و هند و محمد قعدوا يتكلموا ...

يتبع

كتابات ل ghada saeed