لاقيس

لاقيس البارت الخامس والثلاثون

لاقيس

البارت الخامس والثلاثون

بقلم : غادة سعيد

انا ابنك انتي مش عرفاني يا ماما ولا ايه .. هند كانت مخضوضه من منظر وشه في نفس الوقت كانت متعاطفه معاه لأنه طفل صغير ملوش اي ذنب في حاجه .. استجمعت قواها بدأت تسأله : طيب مين الي عمل فيك كده وانت ابني ازاي يعني قعد يضحك و مكنش بيردد غير كلمه واحده بس لاقيس ...

هند صحيت مفزوعه من النوم اول ما سمعت الاسم وقعدت تصوت و تنادي علي محمد و تقوله : جات تاني يا محمد لاقيس رجعت تاني ...

محمد : اهدي بس يا هند لاقيس مابقاش ليها وجود خالص الشيخ كان مأكد لك الكلام ده بنفسه انتي بس تعبانه اليومين دول ... ومش بتنامي كويس وكل شويه يغمى عليكي عشان كده حاسه ان في حاجه غريبه بتحصل لك .. فا اكيد حلمتي بكابوس ...

هند : جايز اكون حلمت بكابوس فعلا بس انا حاسه اني رجعت و ما بقتش طبيعيه ثاني ...

محمد : ده تاثير الحمل يا هند ماتدلعيش بقى قومي يلا عشان عملت لك حاجه تاكليها ... قامت هند وهي عندها صداع رهيب من الحلم اللي شافته ومش مصدقه يا ترى هي فعلا رجعت ولا ده مجرد كابوس وصوره الطفل اللي كانت شايفاه في الحلم ما كانتش بتفارق خيالها وصوته وهو بيقول لها انت ماما وانا ابنك ... وهي قاعده تاكل كانت فرحانه وقالت لمحمد : انا عاوزه اروح عند دكتور ثاني ويعمل سونار يشوف وضع الجنين ...

محمد : ما احنا لسه جايين من عند الدكتور يا هند هي سيره .. وبعدين وضع الجنين في ايه ده انت لسه يادوبك في الشهر الثالث ...

هند : عاوزه اعمل سونار 3d اشوف ايه الوضع عشان انا كنت باخذ وسائل منع حمل كتير جدا احسن تكون مأثره على الجنين اللي في بطني ولا حاجه ...

محمد : زي ما تحبي يا هند اعملي اللي يريحك وانا معاكي في اي حاجه تعمليها ... قعدت هند تاكل وايسل جات تقعد على رجليها لقت ان محمد قال لي ايسل : تعالى عندي انا عشان ماما تعبانه شويه ... هند دخلت الحمام ما قدرتش تدوق طعم الاكل و للمره الثانيه قعدت ترجع جامد .. وفي الاخر نزلت حاجه سوداء من بوقها واول ما شافت المنظر غمضت عينيها ثانيه واحده و اول ما فتحت كانت الحاجه دي اختفت كالعاده ...

دخلت هند جوه عند محمد وقالت له : انا مش طبيعيه يا محمد انا برجع حاجه سودا

محمد : ازاي يعني يا هند وفين الحاجه اللي انتي رجعتيها دي طيب ..

هند : بارجع واول ما بشوفها بتختفي فجاه ... انا خايفه قوي يا محمد و حاسه ان الموضوع بدا يرجع لي ثاني ...

محمد : ايه رايك تروحي للشيخ اللي رحتي له قبل كده واشوف فيكي ايه .. اكيد هيفهم اكثر واحد ايه الي عندك ...

هند : فعلا عندك حق بكره الصبح هاروح له على طول عشان اشوفه هيقول لي ايه .. المهم دلوقت خليك جنبي انا عاوزه انام ومش عاوزه ابقى لوحدي لو حسيت باي حاجه او اني باتكلم وانا نائمه صحيني على طول ما تسبنيش اكمل نوم ...

محمد : خلاص يا هند نامي هنا ما تقلقيش وانا هساعدك وافضل جنبك ومش هاسيبك خالص نامي وارتاحي شويه ... انا هقعد هنا انا و ايسل قدامك .. هلاعب ايسل وانت نائمه ولو حصل اي حاجه هصحيكي على طول ...

هند : اوعي تقوم من جنبي مهما حصل ...

هند حطت دماغها علي السرير و كانت دماغها تقيله جدا واول ما غمضت عينيها وراحت في النوم لقيت الطفل اللي بيعيط ده قدامها و كان عمال يعيط برده ويقول لها : رحتي فين يا ماما وسبتيني .. انتي مشيتي بسرعه كده ليه ... انا من ساعتها قاعد مستنيكي و عمال اعيط ... ليه سبتيني ومشيتي ..

هند : ماما مين هو انت بتكلمني انا ! انا مامتك انت ازاي ومين اللي قال لك اني مامتك ...

رد عليها وقال لها : لاقيس قالت لي بس هي مش هتجيلك ثاني انا بس اللي هاجي لك .. او ممكن تجي لك في يوم لسه مش عارفين ... انتي قربتي تشوفيني عشان انا في بطنك دلوقتي وهتشوفيني قريب قوي ... ردت عليه هند قالت له : بس انا لسه في الشهر الثالث يعني قدامك ست شهور .. ضحك لها وقال لها : انتي مش في التالت الشهر عندنا هنا بشهرين .. يعني هتشوفيني كمان ثلاث شهور قريب قوي ... هاجي و هنعيش مع بعض طول العمر ..

هند : هو انتم بتعملوا كده ليه معايا انا عمري ما اذيت حد خالص ... ومين اللي اذاني تاني ...

رد عليها وقال لها : ما فيش حد اذاكي بس انتي اللي دخلتي عندنا بنفسك ومش هينفع تخرجي لانك نفذتي شروط وعامله عهد معانا ولازم تكملي اللي كنت بتعمليه ..

هند : هو انت فاكرني هنفذ شروط ثاني من اللي كانت بتقولها لي مستحيل ده يحصل ...

رد عليها وقال لها : مش هتنفذي الشروط .. بس انتي هتقعدي معانا و تربيني غصبا عنك لاني ابنك يا ماما ومستحيل تتخلي عني ...

هند صحيت من النوم على صوت محمد بيصحيها وبيقول لها : هو انتي كويسه يا هند ..

هند : انا مش كويسه خالص يا محمد هو انت صحتني ليه هو انت سمعت اني باقول حاجه ...

محمد : لا بس حسيتك بتتنفسي بصعوبه ومش قادره تتنفسي كويس .. لكن انتي ما قلتيش اي حاجه .. هو في حاجه حصلت ولا ايه ..

ردت هند عليه وقالت له : اللي في بطني ده مش انسان ولا حتى ابننا هم اللي زرعوه في بطني اللي في بطني ده لازم ينزل يا محمد ...

محمد : لا يا هند انتي كده اتجننتي على الاخر بقى ما فيش حاجه من اللي انتي بتقوليها دي ... يعني ايه زارع في بطنك مين اللي دخل بطنك اصلا زرع جنين احنا بكره نروح للدكتور اول ما تصحي من النوم ونعمل اشاعه 3 دي عشان تتاكدي ان اللي في بطنك ده جنين مكتمل وما فيهوش اي حاجه ولا عيوب خلقيه .. لو زي ما انتي بتقولي ده مش هيبقى جنين طبيعي وشكله هيبان جدا في الاشاعه ...

هند : عندك حق فعلا بكره نروح نعمل الاشاعه بس انا مش هاقدر انام خالص ... انا هاقوم اعمل لك كوبايه قهوه عشان مش عاوزه انام واحلم ثاني مش عارفه ايه اللي حصل ده ما انا كنت كويسه وما كانش في اي حاجه ... بس انا كنت بكره كنت هاروح عند الشيخ يعني نروح نعمل الاشعه ولا اروح للشيخ ...

محمد : نروح نعمل الاشعه الاول وبعد كده لو في وقت نروح للشيخ لو ما فيش نروح له بعد بكره اكيد هيبقى موجود يعني هو هيروح فين ... بس نروح نعمل الاشاعه ونطمن الاول عشان انت كده مش متطمنه خالص ...

هند : والله يا محمد ما تزعلش مني بس غصب عني اللي انا شفته الفتره اللي فاتت دي كثير قوي عليا اعذرني بس انا فعلا اعصابي تعبانه و نفسيتي تعبانه جدا ...

محمد : ولا يهمك يا هند وممكن برده يكون الحمل عامل فيكي كل ده انا اسمع انه بيغير هرمونات الجسم و بيخليكي تعبانه على طول ومش طايقه نفسك واكيد قله النوم هي اللي عامله فيكي كل ده .. ان شاء الله بكره هنروح ونطمن ان الوضع كويس والجنين وضعه كويس وساعتها هتبقى متطمنه وكل اللي في بالك ده هيروح لما تشوفي ابنك او بنتك قدام عينك في الاشاعه ... وتعرفي انهم ما فيهومش اي حاجه وكويسين ...

يتبع