DALAWANG LINGGO MULA noong nililigawan ni Hiro si Yvony ay agad lumalim ang paghanga ni Yvony sa manliligaw. Hindi na basta paghanga ang nararamdaman niya rito. Aminado siya na sobrang bilis ng pangyayari at mahal na niya ito. Ninanais na niya na magkaroon na talaga sila ng relasyon—maging opisyal. Iyong matawag na nilang dalawa ang isa’t isa na “Akin ka na”.
Sa oras na ibinibigay ni Hiro sa kaniya, doon siya tinamaan ni kupido. Mas nabihag siya rito. Wala na siyang ibang hiniling sa lalaking mahal niya kung hindi iyong tinatawag na consistency. At hindi naman siya binigo nito. Bagaman minsan, may kunting ilang lang siya na nararamdaman dito. Nagiging agresibo ito. Palagi nitong sinusubukan na may mangyari sa kanila kahit ilang beses na niyang sinabi rito na hindi pa talaga siya handa.
