MARAHANG dumilat si Yu nang mapagtanto niyang tumigil na sa pagtugtog ang kanyang discman. Umayos siya ng upo at tumingin sa kanyang relo. Kalahating oras pa lamang ang lumipas ngunit tila napakahabang panahon ang dumaan. Marahil dahil iyon sa pag-alala niya sa nakaraan. Huminga nang malalim si Yu at iniligpit ang discman. May silbi pa bang alalahanin si Matt ngayong nagdesisyon na siyang itigil na ang umasa na magkikita pa sila? Ni hindi na nga malinaw sa alaala niya ang mukha ni Matt dahil sa tagal ng panahon mula nang magpunta ang binata sa lugar nila.
Minsan pa nga ay naiisip ni Yu na baka gawa na lang ng kanyang imahinasyon ang mukha ni Matt na sumusungaw sa kanyang isip kapag naaalala niya ito. Paano kung gawa lang pala ng isip niya ang hitsura nito? Paano kung ibang-iba pala ang m
