PINASOK na nina Lava ang kagubatan ng Zubath at isang kadiliman ang mabilis na sumakop sa kanilang mga mata. Mabilis ngang pinagliyab ng mga Flammanian ang kanilang mga apoy pagdating sa loob. Pasimple pa ngang sumulyap si Lava sa Sero na kanyang kasama. Tiningnan niya kung may kaba ba itong mararamdaman sa pagpasok sa loob ng gubat.
“Ganito pala ang loob ng Zubath? Totoo nga na tila gabi rito. Ni isang liwanag mula sa labas ay hindi nakakapasok dito,” namamanghang winika ni Mars habang iniikot ang mata sa paligid. Sinusubukan niya kung may makikita ba siyang kakaiba, ngunit isa lang itong tipikal na kagubatan na naiiba lamang dahil madilim dito kahit hindi pa naman gabi.
“Hindi ka ba kinakabahan Sero?” pasimpleng tanong ni Lava at nginitian lang siya ni Mars nang marinig iyon.
