Masaya silang nag-uusap habang pinagsaluhan nila ang simpleng ulam sa hapag-kainan. Magkahalong kangkong at talbos ng kamote na ginawang adobo, pritong isda at paksiw na baboy. Lihim siyang natuwa nang makita ang paborito niyang mangga na nakapwesto sa gitna ng lamesa na agad niyang nilantakan.
"Ate, matanong ko lang po. Napansin ko po kasi iyong picture frame ninyo na nakalagay sa bandang itaas ng inyong TV. Mga anak po ba ninyo ang mga batang kasama ni Pau roon? At iyong lalaki po, asawa niyo rin po ba iyon?" sa wakas ay tanong niya kay Ate Dulce sa kalagitnaan ng kanilang pagkain.
"Ay, iyon ba? Oo, Miles. Napansin mo pala. Mga anak ko iyong mga batang tinutukoy mo. Tatlong lahat ang anak ko at si Pau ang panganay. Iyong asawa ko naman ang pangalan ay si Teodoro. Sayang dahil hindi mo
