Masakit ang ulo at mabigat ang kanyang pakiramdam nang tumayo siya. Tinungo niya ang refrigerator saka tila uhaw na uhaw na uminom ng malamig na tubig. Nang matapos ay muli siyang umupo sa upuan at ipinatong ang magkabilang braso sa ibabaw ng lamesa sabay sapo sa kanyang ulo. Ito ang napala niya at naging resulta ng pag-iinom niya kagabi na siyang naparami pa sapagkat halos maubos na niya ang sampung canned beer na kanyang binili. Nakakatayo man nang maayos pero pakiramdam naman niya'y nanghihina ang buo niyang katawan at ano mang sandali ay ilalabas niya ang nagbabadya niyang pagsuka.
Tumayo ulit siya upang mag-init ng tubig sa heater. Ngayon ay nais naman niyang uminom ng mainit na kape. Hindi na niya maintindihan ang sariling katawan lalo pa't nagsimula na naman siyang makaramdam ng ha
