تحقيق في جريمة قتل

"تحقيق في جريمة قتل" الجزء الثامن

قاطع نضال كلام سالي و بعد عنها شوية و رد على التليفون ..

نضال : الو .. مدام نادين ازي حضرتك ؟ لا لا ابدا انا لسه داخل المحاضرة دلوقتي .. و انا كمان والله كان نفسي يكون فيه فرصة عشان نقدر نتكلم لكن حضرتك شوفتي ايه اللي حصل امبارح .. امم عندك حق .. ايه ؟ خير إن شاء الله بس انتي قلقتيني شوية .. فيه حاجة جدت يعني ؟! اه .. لا انا جاهز وقت ما تحبي .. دلوقتي !! امم .. طيب ماشي ماشي مسافة السكة و اكون عندك .. باي باي

نضال واقف متفاجئ من موافقته أنه يلغي المحاضرة بتاعته و يروحلها و بعدين انتبه أن سالي كانت عايزاه و واقفة مستنياه يخلص مكالمته عشان يلف وراه ميلاقيهاش و بص حواليه عشان يشوفها لكن مكانتش موجودة .. ركب عربيته و خرج من الجامعة و راح ل نادين .. و في بيتها كانت نازلة من اوضتها لابسة اسود و شكلها باين عليه الحزن و كان باباها و مامتها قاعدين في الليڤينج و مشت نادين راحت ناحيتهم و هي بتقول ب صوت هادي جدا

نادين : صباح الخير

عزام : صباح النور .. طمنيني عليكي يا بنتي عاملة ايه دلوقتي ؟

نادين : الحمد لله ماشي الحال

ثريا : حبيبتي .. انا عايزة اتأسفلك عن اللي عملته و قولته امبارح

نادين : ماما .. معلش نتكلم بعدين انا مش قادرة افتح اي مواضيع دلوقتي

خرجت ريم من المطبخ و في ايديها صينية القهوة و بتصبح على نادين و في نفس الوقت كان جرس الباب بيرن عشان نادين تروح تفتح و تلاقي فتحي قدامها

فتحي : لامؤاخذة يا هانم انا جيت في وقت زي ده كده فجأة و من غير ميعاد بس الموضوع ضروري و مستعجل ؟

نادين : مفيش مشكلة .. خير فيه ايه ؟

فتحي : انا عايز اقابل عمرو بيه .. فيه كلمتين عايز اتكلم معاه فيهم لو ينفع تصحيه بس بعد اذنك

في القرية .. سيد طالع بيجري على عربية قديمة و مهكعة و اللي راكبها مدبولي .. سيد ركب على طول و هو بيسأل مدبولي ب خوف

سيد : خير ايه اللي حصل .. صوتك مطمنيش ؟

مدبولي : انا منمتش من امبارح

سيد : ليه ؟ فيه حاجة حصلت ؟

مدبولي : لغاية دلوقتي لأ بس مخبيش عليك انا من ليلة امبارح و جسمي ده كله بيرتعش من كتر الخوف حاسس زي ما يكون فيه حاجة حصلت

سيد : طيب انزل و تعالى خلينا ندخل نتكلم جوا

مدبولي : مش قادر اروح في حتة ولا اشوف بني ادم و مش هقدر اعمل اي حاجة لغاية ما يرجع عباس و أتأكد أن كل حاجة تمام

سيد : مدبولي .. فيه حاجة حصلت و انا معرفهاش ؟!

مدبولي : لو حصل حاجة كان زماني لا انا وانت هنا ولا كان زمانا قاعدين القاعدة دي

سيد : استغفر الله العظيم .. يحرق ام اللي رمانا الرامية السودا دي

مدبولي : الاول بس خلينا في المهم .. ايه الدنيا جوا ؟

سيد : زي العادة

مدبولي : اسمع .. انا عايز كل حاجة تمشي زي ما هي و تكون طبيعية جدا مش عايز حد يشك فينا

سيد : ماشي .. اللي بعده ؟

مدبولي بيطلع كيسة سودا من جيب الچاكيت بتاعه : خد أمسك دول .. توزعهم على العيال و متخليش حد فيهم ناقصه حاجة و تقولهم يشدوا حيلهم اكتر و ياخدوا بالهم اوي مش عايز نوم

سيد : و ايه السبب ؟

مدبولي : من غير مناسبة خليك في حالك .. و عايز ل**نك ده تقصرهولي شوية ها و تقصر معاه الشر

سيد : حاضر

مدبولي : ياللا انزل

سيد : طب انت رايح فين دلوقتي ؟

مدبولي : بفكر اروح ل دسوقي .. يمكن يشوفلنا مخرج من المصيبة اللي حطينا نفسنا فيها دي

سيد : و ملاقيتش غير دسوقي

مدبولي : ده على أساس يعني ان فيه حد غيره و انا قولت لأ .. ياللا غور من خلقتي غور

نزل سيد من العربية و اتحرك مدبولي .. و في بيت نادين كان فتحي واقف مصدوم من خبر وفاة عمرو

فتحي : مات !! مات ازاي ؟!

نادين مش مرتحاله : في حادثة

فتحي : يا هانم حضرتك متأكدة من اللي بتقوليه .. استاذ عمرو عمل حادثة ؟

نادين : أيوة .. بس مقولتليش حضرتك تبقى مين و بتسأل عن عمرو ليه ؟!

فتحي : انا صاحبه .. فيه معرفة بتجمعنا يعني

نادين مش مصدقاه : بس انا اول مرة اشوفك ؟

فتحي بيقعد : مات مات يعني !!

نادين : طب انت يعني مش ناوي تقولي انت تبقى مين و عايز ايه من عمرو ؟

فتحي : يا هانم ممكن كلمتين بيني و بينك على جنب لو سمحتي ؟

نادين : مفيش حد غريب .. اتفضل اتكلم انا بسمعك

فتحي : يا هانم الموضوع كبير و مينفعش اتكلم قدام حد

نادين ب انفعال : قولتلك اتكلم و انا سامعاك

فتحي : يا جماعة معلش بعد اذنكوا فيه موضوع خاص شوية عايز اتكلم فيه مع الهانم لو ينفع تسيبونا لوحدنا

ريم : طيب .. قهوتك ايه ؟

فتحي : زيادة

عزام بيزعق : و ده وقت قهوة يا اسمك ايه انت .. ما تتكلم قول عايز ايه و خلصنا .. نشفت دمنا

فتحي ل نادين : يا هانم بالله عليكي مش هينفع الكلام قدامهم

ثريا ب غيظ : ما تخلص بقى و اتكلم متق*فناش .. قالتلك مفيش حد غريب انا امها و ده ابوها

نادين : ماما .. خلاص لو سمحتي

ثريا : انتي مش شايفة طريقته

نادين : معلش اتفضلوا دلوقتي خلوني اعرف فيه ايه

ثريا : امشي يا عزام امشي .. لا مريحنا في حياته ولا في ماماته

نادين بتقعد قدام فتحي بعد ما كلهم خرجوا : خير ؟

فتحي لسه هيتكلم لكن تليفونه رن و لما رد بص ل نادين بصة مريبة و فضل ساكت متكلمش ولا كلمة لغاية ما الخط اتقفل في وشه .. نادين لاحظت أن فيه حاجة مش طبيعية و سألته فيه ايه .. لكن فتحي مردش عليها و سابها و قام مشي فورا .. و نادين قاعدة متفاجئة من الموقف كله و قامت تجري وراه عشان تلحقه و كان في نفس اللحظة نضال وصل قدام الڤيلا و نزل من عربيته و كان فتحي طالع بيجري من باب البيت و نادين بتجري وراه و هي بتنادي على الأمن ب صوت عالي عشان يمسكوه و كان نضال داخل قدامه بس مش فاهم فيه ايه

نضال : مين ده ؟؟

نادين ب انفعال : معرفش واحد جه سأل على عمرو و لما عرف أنه مات طلع يجري كده ..

الامن حاول يوقف العربية و يخرجوا منها لكن معرفوش .. عزام طلع يجري على أساس ياخد عربيته و يلحقه لكن نضال اخد منه مفاتيح عربيته و راح هو وراه و كان وراه الأمن اللي بيحرس الڤيلا ب العربية هو كمان .. لكن فتحي عرف يتوه من عربية الأمن و يهرب هو لكن في رجعته نضال شافه و لف و رجع وراه ..

في بيت "علية" كان الباب بيخبط جامد اوي و فتحت و هي مرعوبة عشان تلاقي صاحب البيت قدامها .. اتعصبت عليه و قالتله

علية : فيه ايه ؟؟ فيه حد يخبط على حد ب الطريقة دي ؟!

صاحب البيت : ايدي ات**رت من كتر التخبيط عشان تفتحي الباب .. فكرت جرالك حاجة

علية : عايز ايه ؟

صاحب البيت : في مشاكل في واصلة الكهربا اللي بتوصل بينك و بين بيت ناس جيرانك هنا في البيت و دايما ده بيعمل مشاكل بين سكان الشقتين

علية : أيوة و بعدين يعني انا مالي

صاحب البيت : جايب الكهربائي يفصل الواصلة دي عشان ميحصلش بينكم مشاكل .. لو تسمحيلنا ندخل

علية بتمنعه يدخل : لأ مش فاضية .. تعالى بكرة

صاحب البيت بيبص للبسها من فوق ل تحت : الموضوع كله دقيقتين يا مدام مش هياخد وقت

علية : مش فاضية .. قولتلك مش فاضية

صاحب البيت : طيب اجي أمتي

علية : معرفش

و قفلت الباب في وشهم .. و الراجل اخد الكهربائي و طلع على بيت الجيران يحل المشكلة من عندهم هما .. و عند نادين كانت واقفة في الڤراندا مستنية وصول نضال ب قلق و كان في ايديها التليفون و بتحاول تكلمه .. شافت الأمن رجع ب عربيته و بينزل منها و هو لوحده و كان ساعتها الرائد كريم وصل و قا**ه و هو بيسأله عن اللي حصل .. وقتها كان نضال رد على نادين في التليفون

نادين : الو .. نضال طمني ايه اللي حصل معاك ؟

نضال : انا فضلت وراه من مكان ل مكان و دلوقتي هو في محطة بنزين بيفول عربيته و انا وراه .. بس قوليلي ده يبقى مين و ايه حكايته ؟؟ ايه سبب هروبه ؟! .. يعني انتي معرفتيش هو جاي ليه و لا مين اللي اتصل بيه .. طيب .. فعلا حاجة غريبة .. لا لا انا بس مستغرب اللي حصل .. هروبه ده معناه أنه له علاقة ب اللي حصل ل عمرو .. لو مكانش له علاقة مكانش هرب .. بصي اقفلي دلوقتي بس هو هيطلع ب عربيته دلوقتي .. باي

قفل معاها و طلع وراه ب العربية .. و نادين كانت واقفة بتبص على كريم اللي كان باين عليه أنه بيبهدل الأمن عشان فتحي هرب منه و بعدها سابه و دخل الڤيلا و نادين دخلت من الڤراندا عشان تقا**ه

كريم ب انفعال على نادين : الكلام اللي بتقوليه ده مش صح .. انتي غلطتي و ب الطريقة دي بتضيعي كل اللي احنا بنحاول نعمله

نادين ب عصبية : وطي صوتك لو سمحت .. انا مسمحلكش انك تتكلم معايا ب الأسلوب ده

كريم : انا مغلطتش معاكي في حاجة .. و كمان انتي عارفة كويس اوي اني اقدر اوقفك انتي و نضال مديح ب تهمة عرقلة مسار التحقيق

ريم : اهدوا شوية يا جماعة .. نادين خلاص يا حبيبتي .. انا كنت موجودة يا سيادة الرائد و شوفت اللي حصل ب عيني و بجد حاجة غريبة

كريم : الغريب فعلا هو اللي بتعمله مدام نادين

نادين : ده راجل معرفوش و عمري ما شوفته .. بييجي لغاية بيتي و بيقولي أنه صاحب جوزي و عايزه في موضوع ضروري و فجأة بيجيله تليفون بيغير ملامح وشه 180 درجة و بياخد بعضه و يمشي من غير اي مقدمات .. كنت عايزني اعمل ايه ؟ اقعد اتف*ج عليه

كريم : لأ بتخلي نضال يلحقه

نادين : هو اللي لاقيته في وشي .. حط نفسك مكاني لو كنت في نفس الموقف كنت هتعمل ايه

كريم : اتصلي بيه دلوقتي اعرفيلي مكانه فين .. دلوقتي

بتسيبه نادين و تمشي من قدامه .. و كان فتحي بيحاول يهرب و نضال مازال وراه لغاية ما عربيته بقت جنب عربية فتحي بالظبط و شاف وشه .. ساعتها فتحي طلع مسدس من جيبه و حاول يض*به ب النار لكن نضال عرف يبعد العربية عنه و يوقعها في بركة جنب الطريق .. نزل نضال من العربية ساعتها و كان عايز يروح يشوفه لسه عايش ولا جراله حاجة لكن كان متردد و في نفس الوقت كانت فيه كاميرا بتصور الواقعة ..