تحقيق في جريمة قتل

"تحقيق في جريمة قتل" الجزء التاسع

مدبولي نزل من عربيته و راح ناحية راجل قاعد لوحده و بيشتغل في حاجة زي الحدادة كده .. و الراجل ده يبقى دسوقي

مدبولي : السلام عليكم يا ريس دسوقي

دسوقي ماخدش باله في الاول مين اللي بيرمي عليه السلام ف رد على طول : و عليكم السلام .. و لما انتبه أن ده مدبولي قاله .. انت ايه اللي حدفك عليا ؟

مدبولي : لا ابدا .. كنت في مشوار قريب منك قولت لما اعدي اسلم عليك

دسوقي تجاهله و مردش عليه و قام جاب حاجة من عدت الشغل عشان يكمل اللي بيعمله

مدبولي : اييه .. بكلمك انا .. يا دسوقي عيب كده رد عليا .. يعني ينفع تبقى بتتعامل و بتسأل على الكبير و الصغير في البلد و تعامل صاحبك ب الطريقة دي ؟! اخص على العيش و الملح و على دي صحوبية

دسوقي لف و بص له ب نظرة كلها غضب و فجأة طلع يجري ناحيته و نيمه على كبوت العربية و كان هينزل على وشه ب حتة حديدة كبيرة ..

مدبولي بيصرخ من الخوف : اييه ايييه يا دسوقي هتعمل ايه انت اتجنيت ..

و رمى دسوقي الحديدة من ايديه و راح ضاربه ب الدماغ .. و سابه و دخل كمل شغله .. مدبولي قام راح له و مناخيره عماله تجيب في دم .. و قعد قدامه على الكرسي

مدبولي : ولا يهمك يا صاحبي .. انت اخويا و حبيبي .. و انا كلي على بعضي فدا ضافر رجليك .. دي حتى مصارين البطن بتتخانق يبقى انا و انت مش هنتخانق .. ايه اللي فيها يعني لو مديت ايدك عليا .. انا بس مش عايز منك غير حاجة واحدة بس يعني فيها ايه لو تحاول تشوفني ب طريقة تانية .. يا اخي عاملني زي ما بتعامل جارك أو زبونك .. عاملني زي ما بتعامل اي حد في البلد

دسوقي : اعاملك زي جاري و زبوني !! ليه و هو فيه حد في البلد كلها بيعمل عمايلك السودا دي .. و هو فيه حد زيك يا واطي

مدبولي : الله الله الله .. ليه كده ده انا حتى مبعملش حاجة .. مبعملش اي حاجة .. اد*ك شايف بعينك الحال عامل ازاي و الدنيا بتخبط فيا و عمالة تاخدني و توديني يمين و شمال .. شوف كنا ايه و دلوقتي بقينا ايه

دسوقي بيقعد قدامه : و لما تروح تعتدي على ست أرملة عايشة ب طولها لا ليها حد ولا محتد يا ابن الحرام و تنزل فيها ض*ب و شتيمة و قلة ادب .. ده يبقى اسمه ايه ها

مدبولي : ما هي اللي ولية بومة و ل**نها طويل

دسوقي بيمسكه من دراعه جامد : اخرس و حط ل**نك في بؤك بدل ما اقصهولك و اعمله نعل جزمة ألبسها في رجلي لو جيبت سيرتها تاني

مدبولي : و غلاوتك انا عمري ما جيبت سيرتها .. ده الولا عباس هو اس المصايب كلها

دسوقي : و انت لازقلي فيه ليه زي الحرمة اللي لازقة في جوزها عشان خايفة لا واحدة تيجي تخ*فه منها

مدبولي : يعني شغلي و لقمة عيشي معاه لازم ابقى زي ضله

دسوقي : و انتوا عشان تكلوا لقمة العيش دي لازم تروحوا تبيعوا و تتاجروا في شوية عيال ميعرفوش حاجة عن الدنيا .. انت عايز تجنني

مدبولي ب عياط : مش احسن من العيشة الزفت اللي عيشينها

دسوقي : اتكتم يالا و متبكبكليش زي الولايا .. انا اكتر واحد عارف وسختك انت و اللي عامله معلمك اللي اسمه عباس ده و شوية المقاطيع اللي بيشتغلوا معاكوا

مدبولي : طيب و بعدين .. ايه العمل دلوقتي .. عباس بقاله فترة مش باين و انا بدأت اقلق

دسوقي : يا اخي إن شا الله يتداس عليه و عليك انت كمان ب الشباشب زي الصراصير

مدبولي : طب و اخرتها ايه

دسوقي : انا ماليش دعوة لا ب اخرتها ولا ب أولها

مدبولي : انا اهبب ايه و كل يوم و التاني واحد بينطلي بيسألني عنه .. انا خايف .. خايف لا يتمسك و ياخدني في رجليه .. أنا بقيت اشوف حبل المشنقة مدلدل قدام عيني و حاسس أنه هيتلف حوالين رقبتي

دسوقي : سألت اخوه ؟

مدبولي : فتحي ده مش دريان ب حاجة اصلا .. هو ده لو كان راجل و يعتمد عليه كان ايه اللي هيخلي عباس يسلمني الشغل كله في وجود اخوه

دسوقي : و ليه متفتحش نفوخك المصدي ده و تقول أنه مش عايز يورط اخوه في عمايلكوا المهببة دي عشان يفضل في الامان و رجله متجيش في الخيا

مدبولي : دسوقي الله يرضى عنك .. دلوقتي احنا في عباس اللي مش عارفين له طريق ده ولا في اخوه

دسوقي : من الاخر كده انت عايز ايه ؟

مدبولي : انت راجل محترم و طول عمرك قد كلمتك و الناس كلها هنا بتحبك و بيحلفوا بيك .. عايزك تحط ايدك في ايديا و تهدي الناس عليا شوية .. خليهم يبعدوا عني و يسيبوني في حالي لغاية ما نوصل ل فتحي بس

دسوقي : انت عايزني انا احط ايدي في ايد*ك انت !!

مدبولي : متحسبهاش كده والله انا ما قصدي اللي انت فهمته .. انا لو السكينة مش على رقبتي مكنتش جيت لحد عندك هنا و انا عارف انك مش طايقني و مش عايز تشوف خلقتي .. بس انا معنديش حل تاني يعني هتصرف ازاي

دسوقي : تروح ترجع العيال اللي واخدهم من أحضان أهاليهم ليهم تاني

مدبولي : ايه !! مينفعش يا دسوقي

دسوقي : فار و هتفضل طول عمرك في جحرك

مدبولي ب مسكنة : معناها بقى اني ماليش غير اللي خلقني .. يمكن يفتكر أمانته و اموت و اخلص من كل ده .. و انت اللي تدفني ب ايد*ك كمان .. يهون عليك يا دسوقي انك تدفني ب ايد*ك ؟!

دسوقي : قوم غور من وشي و سلم العيال ل أهاليهم .. يا اما تسلم كل حاجة ل فتحي اخو عباس و تخلص نفسك

مدبولي حاول يستعطف دسوقي ب شوية عياط مصطنع و دموع تماسيح .. لكن طبعا ده مدخلش عليه راح مدبولي قايم راكب عربيته و مشي و دسوقي تجاهله و مهتمش ..

في مكان الحادثة كانت الشرطة و الاسعاف وصلوا و بيخرجوا فتحي اللي غايب عن الدنيا و سايح في دمه من العربية عشان يحطوه على الترولي و يركبوه عربية الاسعاف .. و كانت نادين و كريم هناك واقفين و نادين كانت واقفة مصدومة من اللي بيحصل .. و نضال واقف متابع المشهد كله و وشه مش باين عليه اي تعبير ل اي حاجة .. كريم راح وقف قدامه و بدأ يتكلم

كريم : ممكن حضرتك تفسرلي ايه اللي وصل الأمور ل كده ؟