Pareho kaming naghahabol ng hininga nang pakawalan namin ang labi ng isa't isa.
"Nagugutom ka na ba?"
Medyo lutang pa ako dahil sa epekto ng halik pero nadagdagan dahil sa tanong ni Trey na hindi ko alam kung saan niya hinuhugot.
Pagkatapos ng mga sinabi niya kanina at biglaang paghahalik sa'kin ay ito talaga ang itatanong niya?
Bakit? Mukha ba akong patay-gutom?
"Kakain lang natin, at medyo maaga pa para sa dinner," kunot-noo kong sagot.
"Ito ang mahirap sa'yo," naiiling niyang saad. "Yes or no lang dapat ang sagot sa tanong pero pinapahaba mo."
At naging kasalanan ko pa tuloy gayong siya itong nagtatanong ng out of context.
"Huwag ka kayang magtanong," naiirita kong sabi.
"Paano ko malalaman kung hindi ko itatanong?"
"Huwag mo na ring alamin," sarkastiko kong suhestiyon.
