> CHELSA’S POV
GAMIT ANG TELEPORTATION, mula sa kwarto ni Nate nandito na ako sa kwarto ko. Luhaan pa rin ako. Nanginginig pa rin ang buo kong katawan sa takot, sa sakit na nararamdaman ko at sa pinagsama-samang emosyon.
Nagulat ako pagdating ko, tumambad sa ‘kin sina mama at papa na tila hinihintay nila ang pagdating ko.
“Bakit ganyan ang hitsura mo? Saan ka nanggaling?” galit na tanong ni mama. Lumapit siya sa ‘kin at hinawakan ako sa kanang braso. Hindi ako sumagot, yumuko lang ako kasabay nang paglaho ng mga pakpak at antena ko.
“Tinatanong ka ng mama mo!” galit na sigaw ni papa. Hindi pa rin ako sumagot. Galit ako sa kanila, pero di ko makuhang isumbat. Dahil mas mabuting hindi nila alam na alam ko na ang balak nila para di nila ako mapigilan sa pagpigil sa kanila.
