Ang matinding sikat ng araw ang gumising sa nahihimbing na diwa ni Gael. Nadama niya ang init ng sinag nito na nagmumula sa nakabukas na bintana. Bukod doon, pakiramdam niya'y may sumasabay sa kaniyang paghinga. Dahil dito ay dahan-dahan niyang iminulat ang kanyang mga mata.
Muntik na siyang mapabalikwas ng bangon nang tumambad sa kanyang paningin ang maamong mukha ni Alison. Malalim pa ang paghinga nito kaya't sigurado siyang nahihimbing pa ang dalaga. Napa-iling siya nang maalala ang nangyari kagabi.
Misteryo pa rin sa kanyang isipan kung bakit nagsasalita at gumagalaw ang katawan niya nang salungat sa kanyang nais. Nagsimula lamang na mangyayari ang mga ito noong maakit siya sa aroma ng dalaga at magkadaupang-palad sila sa hardin ng mga Barcelona.
"Alison? Gising na
