TILA BANGUNGOT lamang ang lahat kay Eros. Isang araw ay nagising na lamang siyang ikinakasal na sa babaeng hindi niya gusto at nasa loob na sila ng isang malaking simbahan. Nais tumulo ng kaniyang mga luha habang naglalakad si Mauve sa pasilyo papalapit sa kaniya, nakasuot ito ng isang mahaba at magarbong wedding gown. Ngunit hindi iyon luha ng kasiyahan kundi luha dahil hindi siya makapaniwalang ganoon lamang kadali ay nasira ang kaniyang buhay. Nais niya na lamang kainin ng lupa ngayon din mula sa kaniyang kinatatayuan, o tumakbo palabas ng simbahan at iwan ang napakaraming bisita na dumalo. Kaya nga lamang ay hindi niya nais bigyan ng kahihiyan ang mga magulang. Tama nang nakabuntis siya ng isang babae at ngayon ay ikinakasal siya rito. Isa itong bangungot at nais niya nang magising.
