Kagaya ng sabi sa akin, nang magsimula ang operating hours ng shop ay inilibot na rin ako ni Olga, ang natalagang gumabay sa akin. Siya rin ang makakasama ko sa pagtayo-tayo sa may sofa area. Inilibot niya ako sa buong gusali at sinabi sa akin ang mga bagay na kailangan kong malaman. Mga lugar na pwede at hindi pwedeng puntahan ng mga staff na kagaya ko. At gaya nga noon, hindi nila basta-bastang nakakausap o napupuntahan si Lucas.
Tanging ang mga taong mataas lamang ang posisyon o mga nautusan lang ang pwedeng sadyain siya.
"Pero madalas namang lumilibot si Sir para i-check ang mga bagay-bagay. Minsan, kapag may VIP customer o malapit sa kaniya ay siya mismo ang umaasikaso. Mabait si Sir, sadyang wala lang tayo sa posisyon para kausapin siya." Paliwanag ni Olga at tumango na lang ako k
