BILLIE
BAHAGYA nang umiikot ang aking paningin. Pakiramdam ko ay lumulutang ako sa hangin. Hindi ko na maalala kung nakailang baso na ako ng Margarita. Kalat na rin ang dilim sa buong paligid at hindi ko na maalala kung ilang oras na kaming nanatili rito. Kahit papaano ay panandalian kong nakalimutan ang sakit na dulot ng nangyari kanina. Kahit saglit ay nagawa kong maging masaya at kalimutan ang aking problema.
"Let's drink!" malakas na sigaw ni Tita Esme saka inangat sa hangin ang kanyang baso. "Cheers!" sigaw nitong muli.
Wala kaming ibang ginawa maghapon kung 'di ang magkwentuhan at magtawanan. Katulad ng sinabi nito. Narito kami ngayon sa rooftop party ng kanyang condo.
"Tita, madami ka nang nainom," puna ko rito nang mapansin kong nagsisimula nang mamungay ang kanyang mga mata.
