Sa kabilang lane ng SLEX ay nakasalubong ng sasakyan ni Lacim ang bus na siyang sinasakyan ni Aleigh paluwas ng Manila. Magaang nakasandal ang ulo ng dalaga sa salamin nito, nagmamasid ang kanyang malungkot na mga mata sa lugar na kanilang patuloy na binabaybay. Paulit-ulit niyang binabalikan sa kanyang isipan ang masamang kapalaran sa iniwang tahanan at munti nilang bayan. Ang mapait niyang karanasang iyon ay hindi mawala-wala sa kanyang isipan. Marahan niyang isinara ang talikap ng kanyang mga mata, habang ang mga ito’y inaalala niya.
Mabilis na dumapo sa kanang pisngi ng dalaga ang magaspang at malaking palad ng kanyang step-father. Sa mariing pagngiwi ng mukha ng dalaga ay hindi niya maitatanggi ang labis na sakit na kanyang natamo mula dito. Mabilis niyang hinimas ang sariling pan
