“Gener!” Masayang sinalubong ni Lyrica ang head security ng villa. Tinanguan naman siya nito. Natutuwa siya tuwing pumapasok ng bahay ang lalaki, kasi kinakausap siya nito kahit mabilis at maikli lang minsan. Alam niyang naaawa ito sa kanya. Nakikita niya iyon sa mga tinging ipinupukol nito sa kanya.
Si Gener lang ang nakakapasok sa loob ng bahay. May permiso ni Morris ang pagpasok nito. Ito ang nagdadala ng mga supplies nila tuwing paubos na. Kapag may gusto siyang ipabili ay kay Gener niya rin iyon sinasabi. Ito ang bibili niyon sa merkado. Sa sunod nitong pagbalik ng bahay ay dala na nito ang ipinabili niya. Hindi nito iyon nakakalimutan.
Mula sa puwang ng pinto na hindi pa tuluyang lumalapat pasara ay nakita niya ang anim na security sa labas. Kumunot ang noo niya. “Anim na ang nagba
