حلال ممنوع

اتسألني عن عيناي ؟

#حلال_ممنوع

نورا ناصر

ظليت ابحوش واني مااعرف للتليفون هذا كلساع ولصتها وادوس بالدكم .. واباوعله ..

رحت ع المكالمات ماكو اسم تغريد وياهن ..

فتت ع الرسائل شفت حافظة خاصة بس لمسجات تغريد وكلها شعر حزين ..

من يمي ضجت صرنا سبب تعاستهم سديت الفون ورحت خليته يمه ..

باوعلي كال هاا ؟؟

كتله ماكو شي اريد انام ..

تعالي نحجي ..

شنوو تريد ؟ نعسانة ..

مراح اطول شبيج ..

فاتن ..

مجان الي مزاج للحجي كلش ضايجة احس حياتي بلا هدف .. كتله يلله احجي ..

جمال .. ماناوية ترجعين للدراسة .. ؟؟

فاتن .. هستوه جنت كلش ضايجة ومكتئبة بس من كال هيج كلشي تغير ..

جاوبته : هاا يعني ماكو مشكلة اذا ارجع اداوم ؟

جمال :- لا ماكو مشكلة ..

فاتن .. خاف اهلك ميقبلون ..

جمال .. لا معليهم انت مسؤؤليتي ..

- اي يااريت والله بس انت ليش تريد اداوم ؟

كال حتى بلكي تلتهين بالدوام و اخلص منج ويرفع بحواجبه ..

واني شسويت حتى تخلص مني ..

حاجزة التلفزيون بس الج ..

هسه مو خليتك تباوع .. احجي بقهر ..

ضحك كرصني من خدي دفعت ايده ظل يكفش ب*عري ويكرص بزندي.. يلاعبني مثل طفلة وميهتم لانزعاجي .. اباوع بعيونه يباوعلي ببراءة مابيها اي رغبة ..

رحنه نمنه كل واحد بفراشه ..

يوم ثاني الصبح اجت امي ترخصت من عمه اروح اساعدها لأن زهير مطلع عمال ديعمرون البيت ..

قبلت امي ورحت وياهه ..

من دربنا للمطبخ سويت الجاي وجاي احضر الهم ريوك ..

امي .. اي شونهم وياج جمال شونه وياج ..

فاتن .. كلهم زينين ماما الحمدلله ..

.. خالتج زعلانه مني لهسه ..

.. يوم كوليلهه كل شي قسمة ونصيب .. اله شخبار اميرة ورائد ماانخطبوا ..

.. لا ماكو

دخل زهير كال يلله يمه خلصتي من شافني ضحك كال هاي منو هنانه العروسة شونج اخبارج .

درت وجهي عنه كتله بعد وكت والله ..

اجه كعد يمي كال والله اني مااكدر اروح لبيت عمي موشي علاقتي بيهم بس هديتج موجودة ..

كل شي مااريد منك الحمدلله والشكر ..

زهير .. لا والله موجودة الهدية واكولج جهزي نفسج الاسبوع الجاية حتى ترحون تشوفون طلبات العروسة

فاتن .. مااروح اني مدام ماجيت باركت الي ..

زهير .. اوو لاتصيرين كلش عاد ..

كمت احمس بالجدر وسكتت عنه امي انطته صينية ريوك العمال .. وراح ..

رجع بعدها واجه وكف يمي .. قرب مني علبة كال وهاي هديتج بس تدرين اني مو هالكد ويا عيالح لذلك انتظرت تجين وانطيج ..

امي.. يمه فاتن اخذيها من اخوج وكافي حقد الدنيا ماتسوه ..

اخذتها منه وكتله مشكور خليتها ع الكاونتر ..

زهير .. مراح تفتحيها ؟ وانطيني رايج بيها والله اذا معجبتج ارجعها ..

اخذتها فتحتها كلادة بسلسلة متوسطة الطول ووياها مدالية قرآن .. كتله مشكور زهير عود تطلبنا هدية على زواجك ..

طلع زهير ، باوعتني امي خزرتني كالت يعني متعرفين تاخذيها وتسكتيين اله تخربطين بالحجي ..

.. نسيتي الي سواه بيه ؟

ميخالف اكلبي صفحة جديدة وانتوا اولاد اليوم انسي الي صار ..

خليت الكلادة بمكانها ورجعت اشتغل ويا امي ..

تحدد موعد نروح نشوف عروسة زهير بدلت ورحت وياهم .. شفناها شكلها مقبول بس مبينة اخت ابليس وشون ابليس راح يتزوج اخته هه ماادري ..

اتفقنا وياهم على كل شي وحددنه موعد الحفلة ورجعنه للبيت ..

بعد كم يوم اجت امي كالت امشي وياي للسوك العصر

وترخصت من عمو وعمه مكالوا شي ..

الظهر اجه جمال من الدوام تغدينه وصعدت للغرفة بعدها هو اجه ..

كال حتروحين للسوك .. ؟

اني مكتله ستحيت حتى لياخذها بغير معنى او انو اني اريد منه فلوس بس اظاهر اهله كلوله ..

جاوبته اي حروح ويا امي ..

جمال .. منو حيود*كم ؟

.. احنا نروح

.. اني اوصلكم بدربي من اروح للمختبر ..

.. خاف نأخرك

لا ماكو تاخير راح انام كعديني اذا جهزتي نفسج ..

ماشي ..

حضرت نفسي ورحت لامي شفتها مبدلة هي ونسرين كتلها جمال يودينه رايحة اكعده ..

رجعت للبيت وصعدت فوك بعده نايم

رحت كعدت ع السرير صحته جمال جمال ماكعد

خليت ايدي على كتفه ودفعته بخفه

كعد يباوعلي وعيونه حمر ويا الخضار ناطينه سحر وجاذبية من نوع اخر .. هو هيج من ينام ويكعد يصيرن عيونه حمر ..

صحصح وراح سبح وبدل ملابسه واني كاعدة انتظره

خلص كل شي طلع فلوس وانطاني

اني خجلت كلش دفعت ايده البيهه فلوس

كتله مااريد عندي

كال اششش اخذيهم و لتتعلمين تردين ايدي ..

اخذتهم وبداخلي ممرتاحة اني شنو مسويه اله حتى يصرف عليه ..

وصلنا للسوك وراح للمختبر ..

نزلنا للسوك .. اشتريت فستان لحفلة زهير وامي اشترت الها ولنسرين .. ورجعنا .قبل المغرب. جان شهر السادس وحاره شويه من فرة السوك عركت كلش ..

صعدت فوك رحت للحمام سبحت وطلعت دخلت للغرفة وماطفيت المكيف ..

حسيت استبردت .. شمرت روحي ع السرير

ونمت كعدت الدنيا مظلمة .. نزلت جوه بس احس صحتي مو تمام .. ساعدتهم بالعشا .. تعشينه وخلصنه

غسلنا المواعيين .وكعدت اسولف ويا بلقيس وسلوى وهيا على حفلة زهير وشوفتهم الي اشتريته .

صعدت شفته نايم ..

اني ماكدرت انام حسيت ببلاعيمي وجع موطبيعي

احس حتى صوتي طبك ..

ظليت ياطالعة برة الغرفه ياداخله جوه

لازمه بلاعيمي وافتر اوون بصوت مخنوك

صعدت ع السرير من الالم مااعرف شسوي ..

حسيته اندار عليه وكعد عيونه حمره يفتح عين ويغمض عين

فوكانه الثريا ضواها لونه اصفر وبس هي مشعولة بالغرفة باقي الاضوية مطفيات

شعره بني وجوة ضوه الثريا صاير لونه ذهبي

لابس كيمونه بيضة منظره نساني الالم للحظات

كعد وثنه رجل وحده ويلعب ب*عره بانزعاج ..

كال بطه ولج بطه اريد انام اريييد انام بطلي وكاحة دنيا ليل ولج حتى البطوط مايسووها هم بالليل ينامون ويسكتوون انت شبيج الله مطيح حظج ؟

جاوبته اوووي هاي شبيك مومريضة وربي بلاعيمي طاكةة ..

بطلي تغسلين شعرج وتجيين ع المكيف اظل اعلمج بيج اني ..

وهسه شصار هاا شصار يلله ارجع انام اسفين ع ازعاجك عييني ..

كام من السرير فتح باب الغرفة وطلع .. كلت اوو هسه اني شجاني اجيت يمه لو نازلة جوه بالمطبخ احسن

لزمت بلاعيمي .. وظليت اوون .. بعد وقت انفتحت الباب ودخل هو فتح ضوه الغرفه .

وطفه المكيف ..

باوعت بيده قطعة قماش صوف وكلاص حليب

خله الحليب ع الميز واجه يمي

وداني للسرير ..

كال كعدي هنانه .قبل لااكعد هو كعدني وكعد بصفي صرت مقابيلي مد ايده ظل يباعد شعري . ويلف وصلة الصوف ع رقبتي حسيتها حارة كتللله اخخخ تره حارة تجوي ..

جمال .. اشش اسكتي اني حميته ع الطباخ

وكعدت امي بهالليل حتى تدورها الي ..

اريد احجي كال اششش اسكتي احسن موزين عليج ..

خلص وكام اني تمددت .. راح جاب الحليب كال اشربي

تذوقته حرك شفتي ول**ني كتله هذا حار

كرصني بخدي ..

كال .. اشربي حار زين لبلاعيمج

ظليت اشربه شويه شويه

هو كاعد كبالي خزرني كال اشربي بسرعه ليبرد ..

شربته .. جابلي براسيتول وماي دافي اخذتهم

كام غطاني ونزل جوة نام ..

ظليت اباوع اله ..

حسيت بحنان منه من امي مشايفته .. ولاعمري شايفه هيج اهتمام .. هنيالها تغريد حقها تبجي عليه بكل مرة تشوفني ، بكل مرة تجي لبيتنا ..

بعد يومين صارت حفلة زهير

اجو اقارب امي من البصرة ..

وانملا البيت الصبح سوينه الغدا للظهر يلله خلصنا تعزيل ..

رجعت لبيتنا .. سبحت وبدلت بالحمام لان جمال بالغرفه مابدل كدامه ..

لبست الفستان الي اشتريته لونه نيلي لماع لحد الركبة

ربع ردن ودلع من الص*ر ومن الظهر ..

رجعت للغرفة وكفت ع المراية هو من شافني ماحجة بس كام طفه المكيف ..

سشورت شعري وظليت امكيج تعلمت هوايه من هيا

كل شويه اشوف جمال من المراية وهو متمدد ع السرير يباوعلي ومن انتبه اله يسوي نفسه ملتهي بالفون او يباوع للتلفزيون ..

خلصت باوعت لنفسي طلعت كلش حلوة جنت ضعيفة حيل هسه صار جسمي حلو ومتناسق لان ارتاحيت عدهم الشغل كلنا متساعدين عليه والبنات مو عنيدات وماينحسن ..

طلعت حذائي .. نيلي كعب مفتوح من يم الاصابع وعليه فيونكة ..

رجعت باوعت للمراية شفت نفسي مرة ثانية شكد حلوة طلعت والمكياج نازك وخفيف ..

انداريت على جمال تخصرت بايد والايد الثانية ابعد ب*عري لورة اذني اخلي .. كتله هاا شنو رايك حلووة موو ؟؟

باوعلي وعيونه مظلمه وعاكد حواجبه

كال ماادريي ولتسأليني هيييج اسئلة مفهوووم ؟ وياريت كدامي تحتشمين هوايه احسن

نزلت ايديه ضجت حييل ومجاوبته .. هو طلع من الغرفة وطبك الباب حييل ..

بقيت ضايجة مستغربة .. واتسائل ؟ شبي هذا شكد مزاجي البارحة جان حنين وياي شبي هسه !!!

لبست صايه فوك ملابسي ورحت لبيت اهلي

زهير تصالح ويا بيت عمي وعزمهم على حفلة خطبته لذلك هم كلهم اجو ..

دنطلع نروح لبيت العروسة .. شفته يباوعلي

اشرلي براسه تعالي يمي ..

رحت اله بدون تردد كعدت كدام بسيارته

صعد ظل يسوق بس ابد ماحجينه بس هواي جان يتحسر ..

سكتت عنه وماحجيته مااعىف شبي اصلا ..

رحنه للحفلة وتمت مراسيم الحفلة ع اكمل وجه ..

مارجعت ويا جمال لان الوللد صعدوا ويا ..

صعدت ويا امي .. ورحت وياها للبيت ..

بقيت الليل عدهم ويوم ثاني رجعت لبيتنا

بس ماحجينه اني وجمال ابد جنت حيل ضايجة واحس مخنوكة محتاجة ومشتاقة لسوالفه

وشقاه وحنيته .. شنو سويت اني حتى يعاملني هيج .

بعدهم اقاربنا يمنه كلهم جايين بس خالتي فاطمة موجايه لان زعلانه على امي ..

اقترحوا خوالي ياخذون ماما وياهم تشوف اهلها صار كومه مرايحة من قبل مرض بابا ..

اني جنت ضايجة وحابه اغير جو

كلت لامي اروح وياج

كالت كولي لزوجج وعيالج واذا قبلوا نروح ..

رحت الصبح كلت لعمو وعمتي

كالوا اخذي راي جمال هو رايه اهم ..

انتظرته للعصر مااجه واحنا المفروض

نطلع من الفجر ..

رجعت لبيت اهلي .. بالليل شفت سيارته يم الباب

بس مارحت شي منعني ..

اخذت موبايل امي ودزيت اله مسج ..

كتبت بي .. جمال اني راح اروح ويا امي للبصرة لبيت جدوو ..

بقيت انتظر الرد ..

لحد ماوصل لتليفون امي منه مسج

مكتوب روحي بدوني ماتكوليلي ..

استغربت رده اوضجت كلش مارديت عليه ولاكتله شكد حنبقى لان شفته ممهتم ..

يوم ثاني طلعنا .. وبعد طول طريق وصلنا

شفت اميرة مشتاقة الها حييل

اخذتني لغرفتها كالت ولج تعالي خطوبتي بعد اسبوعين ..

ضحكت الها كتله بفرح راائد ؟؟

بفرح كالت ايي ايي .. كون تبقون هنانه وتحضروها

اي ياريت ضايجة ومخنوكة والله ..

ليش شبيج زوجج موزين وياج

لالا مو هيج بس شويه ضوجه

ولج صارلج اشهر من تزوجتي ماكو بيبي ..

كمت من يمها كتلها لا ماكو اريد ارجع ادرس

يعني ماخذين احتياطات وتغمز الي ..

كتلها اي هيج شي يلله يلله نروح يمهم ..

شبيج اشو ارتبكتي مناوية تحجيلي ع زوجج تعلميني هه وراية زواج عفيه علميني شون اترومنس ..

فاتن .. حجيت بقلبي باااع هااي والله بطرانة كتلها بعدين بعدين ..

بعدها رحنه لبيت خاله فاطمة .. عود ماما تراضيها

ودانه خالي وصلنه فتحوا النا الباب

طبوا امي وخالي سلموا واني بقيت بالاخير

من جيت داسلم عليها

صفكتني راشدي بخفة كالت هااولج عيارة تزوجتي هاا رفضتينه

كتلها خاله شسالفه بعد فات وكته هالحجي ..

تحسرت وكالت حليانه المصيوبه ..

ضحكت ودخلت .. بقينه يمهم تغدينه ورجعنا لبيت جدو ..

بقينه تقريبا اسبوعين بالبصرة ..

جمال ماسال ولاخابر ولااني هم ..

وكل يوم اجيك التليفون عسى ولعل يخابر يدز ماكوو الوم نفسي اكول هسه هو شنوو حتى انتظر منه شي زواجنا كله كذبة ..

بس هو ليش يعاملني بحنية ليش يخليني انتظر منه شي ياريت من ارجع احاول اخلي حد لعلاقتنا

ومااخلي بعد حتى يلزمني او يطخ بيه احسن لازم احذره ..

حفلة اميرة صارت تجنن

احس الحب بكل اركانها

نظرات عيونهم لبعض مليانه لهفة

اه اني وين من هذا لاحظيت بحبي ولاحتى بزوجي ..

خلصت الحفلة واللتهيت اعزل وياهم وانضف

يضحكون عليه ولج لايوكع طفلج لتتحركين زايد شيخلصنا من رجلج انوب ..

ضحكت على سوالفهم مدري على نفسي .

اسمع بيبي تصيح تعالن ولجن هذا التلايفوون بس يصرخ تعالن شوفن منوو ..

انتفض كلبي ورحت اركض

امي .. لج لاتوكعين خاف فاولوا عليج وتطلعين صدك حامل ..

مهتميت ورحت للتليفون رفعته من ع الميز شفته رقم جمال فرحت حييل ..

اللتقطت انفاسي وحاولت اهدي نفسي لايكول ميته عليه ..

بعدها جاوبته واجاني صوته ..

يحدث ان تلتقي بشخص لا تنساه الذاكرة والعجيب أنه لن يكون لك،

ستعجب به .. ستعيش معه حياة مختلفة

.. لن تقدر أن تقترب و لا أن تبتعد .

هو مرة حبيبا و مرة صديقا و مرة أخرى غريبا

و تمضي الأيام .. بينكم تتمنى أن تجد سببا لتكرهه ..

و لن تجد . تخشى التعلّق به .. و أنت فعلت حقا . .

أحيانا ستظنه لك ..

لكنك ستقبض على روحك بتنهيدة صامتة و تهمس

هو ليس لي،هذا قدرنا ولابد ان نرضي بما كتبه الله لنا

...

فاتن .. جاوبته ويمكن دكات كلبي الف

كتله الوو جمال ..

جمال .. هله بست بطة لو مترهم ست بطة ست فاتن احسن ..

ضحكت وجانت هاي المرة الاولى الي يكولي بيها فاتن واسمعها من ل**نه ..

كتله هسه شحلاتك من تكولي فاتن مو بطه ..

جمال : .. انت بطة وراح تبقين بطة .. المهم اشو لهسه ممبينين شنو طلعتلكم اقامة هناك وبعد متجون ..

-ههههه اي طلعت ...

-عن الشقة انت مكلتي حتبقين هالكد هناك ..

-انت مسألتني ..

- ليش انت حجيتي كلتي اكتفيتي بارسال مسج حتى لو احنا زواجنا على ورق بس انت كدام الناس مرتي واني مسؤؤل عنج ..

-اهلك كالوا الك ع تاخري هنا ..

-لا طبعا مكالوا يعني اله يكولون يلله اخابرج واسال ..

- جمال اسمعني احنا هنا كل كم سنه يلله نجي نشوفهم وصادفت حفلة خطوبة بنت خالي وابن خالتي وقررنه نبقى نحضرها ..

-اي كوليلي هيج من الاول لو ل**نج بي عظمة ..

-لا ء مابي ..

- لعد شوكت تجوون ؟؟

- هالايام خالو يجيبنا ان شاءالله ..

- اوكي واذا تردون اني اجي عليكم بس كوليلي ..

_متقصر جمال بس خالو يجيبه بسيارته ..

ختمته ويا ..

شفت امي على راسي ، جفلت

حجيت وياها بارتباك ماما هاي انت هنا ..

لفت شالها داير مداير راسها وكعدت ع السرير

تباوعلي بريبة ..

كالت ليش احس علاقتكم مو طبيعية ؟

فاتن .. يعني شتقصدين مجاي افهم ؟

جرت نفس وكالت .. يعني لا حبيبي لا عمري متكوليله هيج ..

فاتن .. هاا اي اكوله طبعا بس خما مو كدام اي احد بس بيناتنا وبغرف*نا ..

ام فاتن .. اييه صدكتج .خو ماحجه عليج لان تاخرنا .

-ماحجه بس كال تاخرتوا ..

-اي حقه المفروض مانتاخر اكول لخالج يودينه باسرع وقت ..

بعد اتصال جمال بقينا يومين بيهن خبلت امي يلله ويلله وخالو جان مشغول ..

خلص شغله وانطلقنا ..

وصلنا لبيت اهلي اخذت اغراضي بسرعة ورجعت لبيت عمو .. سلمت عليهم صعدت فوك لغرفتي ماكو جمال مجان موجود ..

رتبت اغراضي ، رحت سبحت غفيت شويه حسيت بحركة بالغرفة كعدت شفت جمال ..

باوعتله بخجل ومنعسه سلمت عليه

اجه كعد يمي كرصني من خدي كال هااا شكلج تعبانه من الطريق ..

هزيت راسي بايجاب ومبتسمة

كال يلله صبوا غدا جوه كومي تغدي ورجعي نامي

كام وكمت وراه .. نزلنه جوه تغدينا .. ساعدتهم بغسل المواعيين .. وصعدت فوك طلب مني اسولفله عن الرحلة كلها كعدت اسولفله يضحك عليه ويشاقيني .

الحد ما كال :.. بطه خو مازعلتي عليه لان صيحت بوجهج ..

جاوبته لا مازعلت اني هم ماطلعت هيج موشف*ني لابسه صاية فوك ملابسي ..

كال باستغراب هاا ..

انت صيحت عبالك راح اطلع هيج موو ؟

ضحك كال اي اي كومي من يمي كوومي لااسطرج على راسج شكد فاهيه ياالله ..

ضحكت وكمت كتله رايحة يم امي اساعدها ..

كال روحي وخله المخدة على راسه ونام ..

رحت لامي شفتها تعزل بالبيت ساعدتها وسويت العشا لان يمها خالو راح يبقى ..

مرت الايام وتزوج زهير روحاتي لهناك شويه قلت

معتز بعد ابد ماتواصلت ويا بس هو يحجي ويا اهله وويا جمال هوايه بس موضوعه ماانفتح ابد

مرات من احس بضوجه او اباوع لجمال ويا تغريد اضوج واكره معتز علي سواه بينا كلنا ..

اكرها اكثر من احتاج جمال ببعض الحالات كزوج

حنيته واسلوبه ويايه يجبرني احتاجه ..

هيا استلمت نتيجة الامتحان وطلعت بدرس واحد الي هو الرياضيات وتكفل عادل اخويه بتدريسها

لان هو طالب تربية رياضيات وزين بيها ..

نجحت هيا وصارت تداوم ويا عادل نفس الجامعة بس غير قسم ..

واني هم رجعت داومت بالسادس الادبي

نروح و نجي اني وسلوى اخت جمال

هي رابع اعدادي ..

فد يوم امي وبابا اجو زارونا .. كاعدين كلنا

اجت هيا قدمت الهم الضيافة ..

بابا كال لعمو ابو كمال احنا نريد هيا لعدلي

هيا ضحكت وكانها موافقة ..

خلت الصينية وراحت .. تمشي وتضحك بخجل ..

عمو جاوبهم بقبول وصار موضوع ارتباط عادل بهيا حديث العائلة .. بس بعد ميكملون دراستهم وعادل يكون نفسه وهو بالفعل بدا وجان بالعطلة يشتغل بسيارة سايق ..

ومرت هوايه ايام ..

بعد العشا فتحت كتاب الرياضيات وكعدت اقنع روحي احضر للامتحان وكل شي ماافهم ..

ظليت اعلس بطرف القلم ..

جان جمال متمدد ع السرير واني كاعدة جوه ..

سمعته كال بصوت حاني جووعاانه ..

باوعت اله كتله بسم الله توه تعشينا ..

لعد شبيج حتاكلي للقلم ؟

هذا الصخام مجاي اكدر احله ..

اشرلي وكلي تعالي اشوو

اخذت كتابي ودفتري ورحت يمه هو تربع وكعد

اخذ الكتاب وظل يباوع بي .. بعدها خلاه جوه وظل يشرحلي

نضحك ونشاقه واذا ماافهم يكرصني او يض*بني على راسي بخفة ويكولي بعصبية مصطنعة شغلي هذا ياعقل البطة ..

وبينما احنا هيج نزلت خصلات من شعري على وجهي كام بعفوية وخر من على وجهي بهدوء .. وجرها حسرة ..

بعدها مثل الي احد فززه من شي كاال هاا فهمتي

اني جنت ناسية نفسي وبس اباوعله

خجلت كتله اي

كال خوش اني نازل جوة .. وطلع من الغرفة .

.

معرفت سر حسرة جمال ياترى على شنو

على حلاله الممنوع اني !!

لو على وجودي الغلط بحياته لو يتحسر يتمنى حبيبته بمكاني ..

افكار وافكار تدور براسي

تزعزع امان روحي واطمئنانها تضوجني

مرات شي بداخلي يتمنى جمال بقوة واكثر من هيج اصحى والوم نفسي . شتردين بعد هو اكو احسن من هيج حنان احترام تقدير يخليني اضحك من كل قلبي

هناك ومعتز يقتحم افكاري وافكر وافكر واكول جمال اخلاقه مستحيل تسمح اله بان ياخذني من اخو ابد ..

وارجع واحس روحي ضايعه مشتته ومااندل دربي ابد .

اخذت الكتاب وضميته بجنطتي والدموعي توكع وحرارتها تجويني ..

خليت المخدة على راسي ونمت ..

يوم ثاني وعلى الغير العادة ماكعدني من النوم اروح للدوام

كعدت شفته ماكو رايح

داومت ورجعت .. بدلت ملابسي ونزلت ساعدتهم باكمال الغدا

طليت من باب المطبخ شفت جمال اجه

وعلى غير العادة راسا صعد فوك

كل يوم من يجي يدخل للمطبخ يسلم يسولف ويضحك بس هالمرة لا .. استغربت

كملنه الغدا صعدت فوك اصيحله

جمال صبينه غدا تنزل تتغدا

هزز راسه بمعنى لاا

استغربت اكثر ونزلت جوه واحجي شكد مزاجي متقلب شبي هيج مطنكر شسويتله اني والله تعبت ..

وظل هيج لايحاجيني ولايباوعلي .. واني انت**ت كلش هم ظليت مااكل هواي ومااقرا زين ..

فد يوم جمعه معزومة منال حماتي الجبيرة

ووياها زوجها وامه وحماها جاي زيارة للعراق بعد ماكان بالخارج ..

جنت بس اني ومنال بالمطبخ اجت هيا تركض

ولزمت منال من ايدها ولج هذا شنوو حماج شون صاير شوون معدل هيج الغربة تحلي وظلت تضحك ..

منال .. اي لعد شعبالج هو متزوج امريكيه بس متقبل تخلف اله وهسه جاي للعراق يريد يتزوج عراقية

هيا ... ماتخطبيني اله شبيج يحظي ولاتعرفين مصلحة اختج عابت .

منال .. يااا تردينه ولج جاي اكولج متزوج .

هيا .. شمتزوج هاي الامريكية موو هو العراقي اذا ميتزوج عراقية ميعتبر هذا زواج خطبيني اله حبابه حبييته ولج

وتكرص اختها من خدها ..

فاتن .. بقيت صافنه عليها لحد ماطلعت منال

حاجيت هيا شنو هذا الكلام الي سمعته دتشاقين اكيد موو ؟

باوعتلي بطرف عينها وراحت . .

حسيت اكو شي حيصير وحييل انقهرت على عادل حين**ر قلبه اه ..

خلصت العزومة وجنت ضايجة حيل وجمال ميحاجيني جنت احتاجه وضايجه بدونه لان صعبه يعودني على شي وفجاه يتغير عليه بدون سبب وبدون مااقترف ذنب.

رحت يم امي جانت مسوية كيكه ابوي مشتهي وصبت جاي وكعدت اكل وياهم ..

خلصنا ورحنا للمطبخ نحضر العشا

امي .. عشاج يمي اليوم

.. اي راح ابقى يمج جبت كتبي حتى اقرا

امي .. ماحسيتي بشي .

.. مثل شنوو

.. لعبان نفس دوخة

.. انداريت عليها لاماما ماكو اطمئني ..

ظلت تلح عليه تاخذني للطبيه كالت ولج خاف بيج شي ورجلج يتزوج عليج ..

اني جنت كارهه روحي كلش وكارهه جمال من تصرفاته ويايه مره يحسسني انه اني طايرة فوك الغيم ومره يحسسني انه اني جوة بالكاع

حجيت لامي كتلها ماما لاتلحين الله يخليج وانطيجياها من الاخير اني وجمال مابيننا شي ..

ودرت ع سنك اغسل قالب الكيك ..

لطمت امي ص*رها ولج شنوو يعني يامعزاية ..؟

حسيت نفسي لصتها كلش وشون راح اطلع منها

ظليت احجي عمياوي وبدون اي فايدة

كتلها ماما اني اريد اكمل دراسة وماريد يصير طفل واتفقنا هيج ..

اجت يمي تكرص بيه ولج تخبلتي اكو مية طريقة وطريقة تخليج ماتحبلين مو هيج لاهذا اكيد زوجج بي شي ميه بالمية .خليني اكول لامه.

لا ماما مابي شي اشاقه وياج عزا العزاني شنوو مسلتت يبوو .. ظليت احلفها واتوسل بيها تسكت ومتحجي وهي بعد شويه وتاكلني

كالت ولج والله حسست اكو شي كولي شسالفه احجي بطيطة لا ماتعدي هالليله على خير ..

ظليت ابجي واني ضايجة كتلها اتركيني لااكتل روحي والله ..

هي هدات شوية وسكتت بس ظلت هواي تلح ..

بقيت يمهم والصبح رحت للدوام

وظل الوضع على حاله ويا جمال ابد ماحجيت ويا بعد بولا كلمة ..

ونفس توقعي والشي الي كنت خايفة منه صار

اجوي اهل رجل منال حتى يخطبون هيا لابنهم ..

اني اتخذت موقف المتف*ج وظليت اللوب ومااعرف شسوي ومارحت كلت لامي ولا العادل ..

طلعت الهم هيا بكامل اناقتها والابتسامة شاكة وجهها

متت قهر اني ..

بعد ماراحوا اللتهيت جوة بالعشا والمواعين ..

خلصنا دورت هيا شفتها بغرفتها رحت الها

اول مادخلت شفتها واكفة تباوع لنفسها بالمراية

كتلها هيا انتوا مو انطيتوا كلمة لاهلي وموافقتكم على عادل لو اني غلطانه ؟

هيا .. قسمه ومصارت الله يهني ويا غيري ..

تقدمت باتجاهها حجيت بعصبية كتلها ولج لعد شكوو املتي بيج هاا انت ليش هالكد حقيرة مو يومية الصبح دتروحين وياا ؟

هيا .. دوولي ع الاقل اني مااسويت ويا علاقة وحبيته وتزوجت اخووو

وتاشر بايديها عليه

بالاخير كالت بلله لا تستشرفين براسي ..

وكفت مصدومة كلش منها دموعي ظلت تنزل

صعدت فوك ركض منهار كل شي بيه ..

كرهت نفسي ليش ماحجيت ليش مانطقت

اني تزوجت جمال حتى انقذ معتز حتى لا يجي هنا وينقتل بسببي بس ا****ني انعكد ماكدر ينطق ولا حرف ..

وصلت لباب الغرفة جمال جوة مااريده يشوفني بهالحالة

رحت للحمام .. دخلت بيها ظليت ابجي نزلت كل مابعيوني من دموع .. حسيت اختنكت كلش خشمي ظل ينزف دم خفت من منظر الدم انتلفت ملابسي

غسلت اخذت منشفة وطلعت ماتحملت الحمام حار كلش ..

رجعت للغرفة بعدني من منهارة وكفت بصف الباب

ولزكت ظهري بالحايط وابجي حيل وكاتمة صوت شهكاتي .. عيوني تحركني وافركهن وقطرات دم تطلع من خشمي .. مخليه الخاولي ع خشمي واضغط بقوة

اخر شهكة ماكدرت اكتمها طلعت مني غصب

انفتحت باب الغرفة وطلع جمال ظل يباوعلي

اجت عيني بعينه

انصدم مني .. كال بطه شكوو شبيج ..

للحكاية بقية ..

ماذنبُ عيِناكِ يجتاحها الذبول من كُل جانب ?

حدثيني ماذنبها لم باتت ذابلة

هل احتلها المرض

ام احتلها الخوف

ام احتلها الحنين

مابالكِ لماذا لا تتحدثين

تكلمي لهذا الحد تشتاقين

قولي لي كم تُعانين

طال سكوتها فقالت

لقد احرقَ قلبي الحنين

بتُ لا اشعر بقلبي الحزين

تغير كل شيء داخلي اصبحت اشعُر انني ابنتُ التسعين

اتسئلني عن عيناي لقد اعميتها كي لا ارىٰ بها الاخرين ?الخاطرة لرقة alsamaraea