حلال ممنوع

خيبة ...

#حلال_ممنوع

نورا ناصر ..

جمال 'بصدمة' .. شكوو بطة شبيج ؟؟

مجاوبته وفتت جوه اشهك وابجي وصلت لنص الغرفة

لزمني من اكتافي ودارني عليه

ولسه مصدوم ولج شكوو شصاير بيج سامعة شي ؟

بقيت مخلية المنشفة على خشمي واتنفس من حلكي

ودموعي تصب بغزارة على وجناتي..

طوق اكتافي بذراعه ومشه بيه لحد السرير

بس عبالك يعرف البيه ..

وخرت المنشفة شوية ظليت اشهك والحجي يطلع مني بصعوبة ..

كتله شفت اختك شتكو ولي وشون طلعتني اني الموزينة ..

ض*ب على فخذه كال اووو عركة نسوان واني عبالي سامعة شي ..

جاوبته بنفس النبرة .. يعني شريد اسمع بعد اكثر من الي سمعته ..

شسمعتي بلله .. ؟؟

- رحت اعاتبها على الي سوته بعادل تكولي على الاقل اني ماحبيته وتزوجت اخو تقصد عليه ..

حسيته نصدم اكثر . شدد قبضة ايده

. كال بطه وحدة وحدة فهميني شسوو العادل ..

شسوو بعد اجه حما منال خطب هيا وهيه العينتين المسمومة موافقة ومكيفة ..

جمال .. بعصبية .. فاتن بلا هالالفاظ رجاءاا اني رايح اتصرف بس كومي غسلي هاي شصاير بيج شنو هالدم هذا ..

فاتن .. جمال اني انقهرت بدل القهرة اثنين وفوكاها تكولي لاتستشرفين شنو معنى كلامها هذا ..

- اعرف اعرف حقج كومي غسلي واني هسه احاجيها مو بس هيه حتى منال شنو بكيفهم يتصرفون ..

كام من مكانه كمت ويا بسرعة ..

- واريدك تبرر الها ليش احنا تزوجنا كول الها معتز راد يجي لهنا ويعرض حياته للقهر لو لا زواجنا ..

- هذا الموضوع خلي على صفحة منحجي بي هسه ..

_ لا شنو متحجي بي اني تعبت كلش انت متثاقل مني

اختك تتهمني بشرفي مليت شنو من حياة هايه

_ شنو هالحجي هذا شوكت تثاقلت منج اني ..

_ تصرفاتك بالايام الفاتت كلها تثبت هالشي ..

_ لا انت غلطانه اني الي اسبابي ..

_ ع العموم انت ممجبور هسه اكيد اخوك هدأ واستقر هناك طلكني واتزوج تغريد لاتروح من ايد*ك واني اوكع بيها ..

_ شتقصدين انت توكعين بيهاا !؟

_ يعني اصير سبب بدمار حبكم ..

_ اتركي هالكلام الزايد هذا وكومي غسلي واني رايح اشوف شنو سالفة حمه منال هذا ..

طلع من الغرفه واني رحت للحمام غسلت وبدلت كلبيتي ..

سمعت صوت بغرفة هيا رحت وراه خاف هيا تتبلى عليه خلي اكون حاضرة ..

تسرسحت بسرعة ورحت وكفت يم الباب كانت مفتوحة ..

وهم ديحجون وجمال جان كلش معصب .. كامش هيا من زندهه ومبينه متألمة كلش ..

جمال .. انت تعرفين هذا الحجي عيب لو متعرفين؟؟

... هيج تحاجين مرة اخوج وتكوليلها كلام مال وحدة قليلة ادب ..

هيا .. هاي شبيك اليوم جمال مبين وزتك عليه مو وشصار اذا رفضت اخوها مااريده هي كوه ..

جمال .. رفضتي اخوهه.. تغلطين عليها ليش وتكوليلها كلام غلط ..

هيا .. عوف ايدي جمال والله دتوجعني .. جذابه ماغلطت ..

فاتن .. اني اجذب احلفي بالقرآن ماغلطتي عليه ..

هيا . ماكلت شي غلط كل الي كلته صح ..

جمال صاح بصوت هز اركان الغرفة وهالمرة لزمها من قفا رقبتها .. ارتفعت اكتافها من الخوف ..

صاح هياا هالكلام مااسمعه مرة ثانية قسما بالله متعرفين شنو اسويلج ودتكوليها بوجهي همين لج انت شنو متستحين ..

دفعها باتجاهي وكال يلله هسه تعتذرين منها لاتره ميحصلج خير بهالليله هاي ..

اجت يمي بعيون مدمعه وصوت يرجف

كالت اني اسفة

بس ممقتنعة بيها الكلمة ..

باوعت لجمال وسكتت .. كال روحي للغرفة

وانت وين راح تروح ؟

بعده معصب كال روحي كتلج ..

انداريت دااروح للغرفة

مشيت بالممر التفتت شفته طلع من غرفة هيا ونزل جوة ..

رحت للغرفة .. ارتاحيت من رزلها شون تكولي هيج بس والله لو زهير مكان جمال جان كطعها كتل اخخ

... بس جمال ميض*ب .. اخخ لزمت شعري شكد انكتلت اني

رجع دخل للغرفة باوعلي بتركيز

كال هاا شون صرتي ..

شفته ضايج كلش حبيت اللطف الجو ويا

كتله صرتك ابطنك شمدريني اني ..

ضحك كال خو مانزفتي مرة ثانية ..

لا مانزفت .. بس والله موتتني بكلامها حييل مستني يعني هي مدتعرف شنو الموضوع بس بكيفها تخربط

-مدام اعتذرت منج خلص بعد خلي يرجع كل شي طبيعي مااريد حقد بالبيت

_والله هي اعتذرت ممقتنعة اصلا لان خايفه منك ..

_ المهم اعتذرت وخلص واني اعرفها بعد متعيدها .. بطه واذا متريد عادل اني مااكدر اجبرها ..

_ اي اني اعرف هالشي ..

_ حاجيت ابوية معنده علم بالموضوع وامي تكول مجرد زيارة عاديه لاجايين يخطبون ولا ابد ..

_ وكلام هيا قبل شويه شنو معناه ؟؟

جر نفس بقوة كال لتدوخين نفسج وخلي كل شي للوقت ..

كتله خوش بس ممقتنعة كلش

كلت بقلبي يلله اصلا متستاهله ..

ومااتمناها لعادل بعد الي سوته بيه وتخليها عنه بكل سهولة عادل يستاهل احسن منها لانه طيب وحنون وياما وكف ويايه ..

يوم ثاني دانزل من الدرج اسمع عمتي تقنع بعمو تكوله يارجال اني اروح واعتذر منهم اكوللهم ماصارت قسمة ..

عمو .. انت شدتحجين تردين تفشليني ويا اخوي

.. لا ماافشلك بس خو مانجبرها للبنيه هم ميصير نظلمها ..

دخل جمال للبيت واني نزلت سلمت عليه ورحت للمطبخ وكفت بالباب مالته.. هو كعد يم امه وابو .. وشاركهم نفس الحديث ..

جمال .. انت شدتحجين يمه .. هاي شبيهه بنتج مخبلة تريد تورط روحها ويا هذا وبعدين ترفض ابن عمها المشتريهه وتقبل بهذا الي عايش بالغربه منعرف عنه شي ونوب متزوج

ام جمال . متزوج امريكية

جمال .. وامريكية متدرين بي انت يمكن يحبها ومتعلق بيها والا ليش ميتركها ويتزوج ..

عمه .. شسويلهه اذا هي متريد ابن عمها نجبرها خما نجبرها.

جمال .. منجبرها بس خليها تفكر بالموضوع زين

خليها تنتبه لدروسها مو احسن

تره ممرتاح والله ... تالي تنندم

عمه .. شكول الها وشحاجيها هيه اليوم حتى للدوام مراحت وقافلة باب غرفتها وحتى اكل مااكلت ..

دخلت هيا عيونها مورمة كالت

اني هايَ حياتي ليش تقررون عني انتوا ..

جمال .. احنا منكرهج تره بس نريد مصلحتج زوج الامريكية هذا ميفيدج .. دتفهمين عليه ؟!

عافتهم هيا واجت بالمطبخ

دخلت وراها

سويت نفسي اشتغل بحي الله شي بالمطبخ

هي فتحت باب الثلاجة طلعت مي وظلت تشرب

وكفت ع السنك داشطف مواعين احضرهم حتى نصب غدا ..

التفتت عليها تباوعلي بحقد ومخنزرة

تخصرت كالت اسمعي زين ترة متكدرين تخلين جمال يجبرني على عادل ..

سطرت الماعون ع ميز الطعام ..

هاي مبين متجي بالعيني والاغاتي .. خلي اغرد الها شوية ..

كتلها اسمعي عيني انت متستاهلين عادل الطيب الحنيين واني ادعي متصيرين اله لان متستاهلي وخلصيني من كلامج هذا بعد لتحجين بي .. واشوف بيج يوم يا هيا ندمانه وتبجييين دم ..

اريد اطلع مداتحمل ابقى وياها بمكان واحد ..

سحبتني من ردن كلبيتي كالت شنوو انت تدعيين عليه ..

فلتت ايدها مني كتلها دطيري ..

وطلعت من المطبخ ..

بعد الغده رحت لامي سالتها عن عادل

كالت نايم اصلا كاضيها نوم هالايام حتى مديطلع بالسيارة العصريات جان يشتغل بيها هسه ابد ..

جاوبتها زين اني هسه رايحه اشوفه .. ولاء (مرة زهير ) وين ؟

امي .. يم اهلها يمكن حامل بس اشو متحجي مدري خايفة من الحسد ..

فاتن .. ضحكت اي هههاي عبالها اني ماخلف واحسدها ..

تحسرت امي كالت انت سالفتج سالفه مدا اصدك راح يصير الكم سنة وبعدكم خاف مسحوريين ولج .

.

جاوبتها بضحك لا بعدنه ميصير سنه هسه بعد كم شهر ..

امي .. شوف الفاهيه تضحك وانه كل ليله اخلي راسي ع المخده افكر بيج والنهار كله صافنة بسالفتج ولج لو تخليني اكول لامه نسوي الكم جاره ..

.. لا عفيه ماما مااريد مشاكل ميقبل جمال فدوة لتخليني اتندم لان كتلج ..

-دروحي روحي شوفي اخوج شبي هالايام بلكي توكعين على علته ..

-صار ماما ..

رحت لغرفة عادل دكيت الباب ماكو اجابة ..

فتحتها ودخلت .. ظلمه الغرفة وريحتها كلها جكاير

كحيت وصحت عادل عادل

جاوبني من جوه البطانية كال هاا فاتن ..

حجيت ويا كتله كاعد انت ليش متجاوب

مديت ايدي فتحت الضوه ..

كعد كال ها فتون جايه تقلبين عليه المواجع وضحك ضحكة قهر ..

اني استغربت كتله انت تعرف ..

عادل .. اي اعرف خيتي صارلها فترة متغيره عليه كلت شايفه الها شوفه وقبل كم يوم كالت اكو شخص متقدم الها وهي تفضله لان راح ياخذها لامريكا ..

فاتن .. انعكد ل**ني للحظات ماعرفت شنو احجي

اخيرا نطقت كتله تره متستاهلك والله فد مزاجية و

قاطعني كال بدون شفقة وعطف فاتن

اني صح ضايج وهاي الفترة راح تعدي والي ميريدني مااريده وهذا مبدئي .

فاتن .. الله يقويك ويرزقك بتاج راسها واغاتها الي تسعدك ..

عادل .. اني يمكن معرفت خوش اختار المرة الجايه انت اختاريلي ..

فاتن . عيوني الك تدلل شكم عادل عندي ..

عادل .. بس خلي اتخرج اكون نفسي واول شي وقبل هذا كله اريد اخذ ابويه للخارج يطلعون على حالته بلكي اله علاج ..

فاتن .. والله الله يحبك بعد عنك هالمسمومة ..

عادل .. خو مو بس نفكر بنفسنه لازم نفكر بهالاب الي ربانه وصلنا الهاي المرحلة ..

فاتن .. اي عادل والله الك اجر بيها وكله هذا دين

يمكن رفض هيا بي صالح لان مدام حجينه بموضوع الخطوبة كول بعد كم يوم وكالوا مدام ترحون وتجون سوه لازم ترتبطون رسمي ومن هالحجي هذا وانت ابد مامستعد وهي بطبعها متطلبه كلش ويمكن تاذيك واذا تزوجتها ويمكن تصير حامل وتلتهي بيها و بالطفل وابوية يبقى خطية ويفوتك اجر بر الوالدين ..

عادل .. اي اختي خوش تفكر فديتج اني ..

دخلت امي .. هاا ضامين عني شي مو ..

فاتن .. ماكو شي ماما ضايج هو شويه ودنضحك

اني اروح ..

امي.. ابقي يمنه ع العشا صارلج كم ليله ممتعشيه عدنا ..

لا ماما اروح وطلعت من الغرفة

وجتي وراي ..

كالت وشعندج بالبيت قابل ..

درت عليها اشر لابويه بعيوني واحذرها متحجي شي ..اريد اقرا ماما ..

رحت يم ابوية بوسته من راسه

بابا حبيبي عادل راح يطلعك للخارج يشوفون حالتك بلكي تصير الك عمليه شي وتكوم على رجليك ..

بابا .. اي والله يابنتي امج هم تعبت تشيل وتخلي بيه وكبرت مابيها بعد ..

اجه ورانه عادل .مبتسم بس بعيونه هواي حزن داحسه يحاول ميخلي احد ينتبه عليه وعلى تاثره

. كال ولا يهمك ياب نزوجك عود ويغمز لامي ..

ض*بته على كتفه اسكت ولك اسكت وراحت كعدت ع القنفه يم راس ابويه الي كاعد بالكاع وخلته بحضنها

وتلعب ب*عره وتبوس بكصته

كالت شحدكم تعرسونه

تباوعه بعيون مدمعه

وتكوله اني ناذرة العمر الك ..

دمعت عيوننا واحنا مبتسمين دعيت الله يخليهم البعض ويخليهم الي ع اقل روحهم بالدنيا ..

رحت للبيت سوينه عشا وتعشينه كلنا ..

بعد العشا وغسل مواعين صعدت فوك للغرفة احضر واجباتي .. طلعت الانكليزي كم كلمة احتاجيت اترجمها معرفت اخءت كتابي ونزلت جوة لجمال كاعد بالصالة

كعدت يمه وظل يترجملي .. اجت هيا

كالت اي عيني مرتك تقريها ليل نهار رياضيات واني جنت بالتواسيل يلله ..

خمطت الكتاب من جمال كتلها باعي انكليزي هذا انكليزي مو رياضيات وبعدين قروج رياضيات بس مااغزر لو مخلين ملح ..

كام جمال كرصني حييل بزندي خلاني افرك بمكانها ..

هيا ..اني مدااحجي وياج دااحجي وياا اخوويه مشووف مرتك جمال مدري شبيها ويايه نهار كله تبسمرني بالحجي ..

وسوت نفسها تبجي وراحت تركض ..

خزرني جمال كال امشي كومي صعدي فووك ..

كمت من يمه اريد اروح

كال تعااي ..

هاا شترييد ؟؟

تعالي اخذي كتابج وياج ..

هاا اي نسيته مديت ايدي اريد اخذه لزمني

كال من بين اسنانه .. بطلي سوالفج هايه خووش ..

كتله لعد متشوفها شون تحجي ..

دتحجي وياي اني اعرف شون ارد عليها وهذا الموضوع بعد لتفتحي مفهوم ..

اي خوش انداريت اريد اروح .. دارني صوب الدرج كال الغرفة مناا انت وين رايحة ؟

اريد اروح يم امي ..

لا متروحيين ..

لا اشو اروح اصلا صاير وجودي هنا بس للمغثة ..

شوكت اخلص اني متحاجي لاخووك واعتقوونييي

خله ايده على حلكي كال اششش

ثواني ودخلت بلقيس

كالت جمال جمال عفيه متشوف جهالي بس يتعاركون وابوهم لهسه ماجه تعال خوفهم شوية ..

جمال .. خوش هسه اجيهم

راحت بلقيس

باوعلي كال هالحجي مااسمعه بعد ابد مفهووم ويلله على فوك ..

فاتن .. لازم ناسي الاتفاق حضرتك وعايش الدور انت ناسي زواجنا باطل وانت ماالك سيطرة عليه وهسه اريد اروح لاهلي لان صدك حاسه بنفسي ثكيله هنا ..

لزمني من اكتافي ودارني ع الدرج وصعدني ليفوك يم باب الغرفة وراح .. باوعتله راح يم جهال بلقيس ..

تسرسحت ونزلت جوة وركض لبيت اهلي ..

امي جانت ع السنك تغسل مواعين

زهير ومرته كاعدين بالمطبخ دياكلون

سلمت عليهم وفتت ..

رحت يم امي كتلها عنج ماما اني اغسلهم ..

شاورتني امي .. هاا شو جيتي خو ماصاير شي ؟

جاوبتها .. شنو متريدين اجي يمج مو العصر كلتي ابقي؟

امي .. ولج انه افضل تبقين يمي العمر كله ولا هالزواج هذا ..

زهير .. هاا اشو تتبسبسون ..

ولاء .. بس لادتحجون علينا ..وتضحك..

فاتن .. لا اطمئني مو عليج شغله بيناتنا ..

غسلت المواعين ورحت يم امي وابوي واخوتي وولاء هنا حسيت احسن ارتاحيت اكثر وظليت افكر بجمال يمكن مل مني وصرت ثكيله عليه انقهرت وبين على وجهي .. سالني عادل هاا شكوو شبيج ..

لا ماكو شي ..

اندكت الباب .. كام عبدالله فتحه ..

رجع كال هذا جمال اجه .. ابوي كله خلي يفوت ..

كام عادل يطببه ..

شاورتني امي كالت شعنده جاي وراج خاف سويتوها ومكتيلي ..

باوعت بوجهه باستغراب

زهير .. انتوا الاثنين مدري شسالفتكم ضاميين شي ..

دخل جمال سلم بس اني مباوعت بوجهه .. بقيت مدنكه

بقينه شويه سوالف وضحك وصبينه جاي وكرزات وكيك ..

صارت عشرة ونص كال يلله احنا نترخص

عادل .. بعد وكت خليك

جمال . تسلم عدول والله ورانه دوامات باجر ..

عادل .. براحتكم ..

فاتن .. اني بقيت كاعدة ماكمت سمعته كال يلله فاتن ..

كرصتني امي بخفية .

. كمت ورحت وراه امشي

طلعنه من الباب وصلنه للمساحة الي بيننا وبينهم كتله جنت اريد ابقى يم اهلي ..

التفتت الي .. والمكان ظلمه خفت منه ابتعدت خطوات للخلف ..

تقرب مني كال مو كلما اكولج على شي تزعلين بسرعه

كبري عقلج شوية ..

جاوبته بحزم اني عقلي جبير حاجي اختك مو هي الي بدت واني ساكته عنها ..

جمال : واني كتلج عوفيها عليه ..

فاتن .. اني احب اخذ حقي بنفسي ..

كمل مشي ف*نه للبيت وصعدنا فوك للغرفة

سد الباب .. كال بعد مااسمع منج الكلام الي كلتي ..

..ياكلام .

انت تعرفين كلش زين ..

حدد اي كلام لان اني حجيت هوايه ..

نزع تيشرته بقى بالكيمونه

تمدد على السرير على ظهره

كال حجيتي هواي كلام بلا معنى وفايدة

خله راسه على المخده وكمل كلامه

وبعد مااريده يتكرر راجعي نفسج خوش .

اريد احجي اخذ المخدة الي بصفه ورفعها كال اريد انام كافي .. نزل المخدة على وجهه ..

للحكاية بقية ..

ياترى راح تسكت بطة ?

?

❤❤❤❤❤❤❤❤❤❤❤