حلال ممنوع

زواج على ورق

#حلال_ممنوع

نورا ناصر.

فاتن: - معتز انت تخبلت انت شون تتجرأ تكول هالحجي.

معتز: - وانت شون تثقين تزوجين واحد من طرف اخوج وتعرفي كلش زين حقير، شون تخلفين بوعدج اليه. ؟؟!!

- هذا شي والي جاي تطلبه مني شي ثاني الله يخليك معتز شون اعيش ويااخوك اني مافكرت بيها هاي؟

- ولج بس خطوبة وراح يكون مجرد زواج شكلي وعلى ورق وبس انت راح تكونين امانتي يم جمال وتعرفين واني كايلج من قبل جمال يحب بنت خالتي تغريد كايلج هالشي لو مكايلج.

- وانخطبت اله وبعدين شلوون هاا بلله؟ شون حتاخذني انت هاا الناس شتكول اللهم اخذتها من اخوي مخليها امانه عنده شون منطق هذا يامعتز.

- معليج من الناس اني اخلي جمال يجيبج لعندي.

- والله انت مو صاحي حرام عليك هاي يسموها انانية بحقي اتركني اروح لحال سبيلي.

- اوكي فاتن سوي الي يريحج اصلا اني كلب حقير وجبان لو مطالع لو ممنهزم لو مخليهم يكتلوني.

- على كيفك ويا نفسك معتز مو هيجي فدوة.

- اني لو ماخذج ويايه من طلعت لو مهزمج ويايه من جيت عليج للمدرسة لو ماخذج والله قصرت.

فاتن .. سكتت وتحسرت ..

كال فاتن. روحي تزوجي واني ايام واجي يمكم وراح تسمعين بخبر كتلتي.

شهكت .. لا معتز فدوة خلص اني موتفقة الي تريده انت يجرالك بس عفية لسويي هيج معتز خلص اني اقتنعت.

- صدكيني جمال راح يحافظ عليج اني الي ثقة بي.

- اي اوكي هذا هو معتز.

- فاتن اني احس راح يجي يوم وتثبت برائتي عفية والله احبج مجاي اكدر انساج والله.

- ياارب ان شاءالله تثبت برائتك. اني شرايدة.

ختمتها ويا وديت الموبايل الجمال.

اخده مني رفعت راسي باوعت اله كتله سمعت اخوك شديخربط وشيريد.

جمال .. محد گلج تنطينه وعد لو هو معرف يختار!

دنگت راسي واللتافيت ورجعت لبيتناا ..

وراها بكم يوم اجه عمو وكمال ومرة عمو ومنال بنتهم الكبيرة.

دخلو للبيت وكعدوا يم ابوية.

حجه عمي گال: - ابو زهير احنا جايين اليوم نخطب فاتن لجمال.

الكل استغرب واباوع للوجوه احسهم كلهم باردين كلش وباهتيين معبالك جايين يخطبون لا عبالك زيارة عادية.

جمال احسه متوتر او ضايج كلش! ..

قبل ليحجي ابويه نط زهير كال احنا نعتذر منك عمو لان فاتن مخطوبة لولد صديقي وقبل كم يوم اجه شافهه وهي موافقة.

رفعت راسي اباوع بالوجوه لمحت جمال يباوعلي مصدوم. دنكت راسي.

واسمع صوت ابويه يكوول اسكت زهير ابن عمها اولى بيهااا.

زهير .. وصديقي شنو اكوله يابه اني ناطي كلمة.

جمال .. بنتر! وشنو يعني دكوله ابن عمها رايدها لو هاي مدبرها.

حسيت الوضع صار مشحون بالعصبية.

زهير .. لا مااكدر اكوله هيج اني خلص انطيته كلمة وهالخميس العقد واحنا نعتذر منكم ماعدنا نسوان للزواج.

ابوية بصيااح. زهييير لاتنسى اني ابوك وبعدني اشم الهوا مامتت حتى تتحكم بكيفك فاتن لجمال واعتذر لصديقك.

كام زهير بسرعة وطلع من يمنه ..

ابو كمال .. هسه نگول مب**ك؟

ابو زهير .. فاتن بنيتكم واحنا اهل وشايفين الف خير.

ابو كمال .. ولازم ناخذ رايها اكيد رايها مهم

هاا فاتن انت شتگولين موافقة؟

فاتن .. عيوني لااراديا راحت ليم جمال باوعتله وهو هم باوعلي. دنكت راسي وهزيته بقبول.

بعد ماراحوا بقيت على كعدتي بالهول ماكو اي احساس،بداخلي سوه انو اني مستسلمة ومابيدي على روحي شي.

طب زهير مثل المخبل وكدام امي وابويه واخواني سحبني من مكاني الي كاعدة بي وكال ولج كومي هسه ياخذج عادل وتروحين لبيت عمي وتكوليلهم اني مموافقة ومااريد جمال افتهمتي لو ادفنج هنا.

سحبت ايدي منه كتله وخرر انت معليك.اني موافقة على جمال وصديقك هذا مااريده.

لزكني راشدي حييل وويا غلط وفشار اشكاال.

كمز عادل دفعه مني ووياها اصوات امي وابوية الي تدعوا للتهدئة .. وهو عبالك ميسمع.

يريد يخلص عليه يريد ياكلني بسنونه لو يكدر.

سحبني عادل بكل قوة .. ركضنه اني وياا للغرفة دخلنه وقفل الباب من جوة.

وزهير يم الباب يعيط ويصيح ويغلط اشكال الغلط.

لحد ماحسينه عليه هدأ شوية وراح بعد سيل من الشتائم والتهديدات.

كعدت على سرير اللهث حاولت اللتقط انفاسي واهدأ روحي المنهارة.

عادل واكف بصفي .. كال فاتن انت متأكدة موافقة على جمال؟

رفعت راسي برعب ومتسائلة بداخلي شنو يقصد عادل بس لايعرف شي عن الاتفاق.

دنگت راسي اريد اجاوبه بدون ميباوع لملامحي حتى لايبين عليه شي.

گتله اي عادل اني موافقة بس انت ليش تسأل؟ !

كعد بصفي كال مو اني سامع ع اساس هو يريد بنت خالته ام شعر احمر تعرفيها.

ارتبكت اكثر واني اعصر بايديه كتله اي بس هسه هو خطبني واني بصراحة مارايدة صديق زهير مااريد اي شي من طرف زهير.

عادل: - بعد انت بكيفج فاتن انتٍ كبيرة وتعرفين مصلحتج والقرار قرارج اولا واخيرا. ومعليج بزهير ولايكدر يجبرج ترة واني هم مراح اخلي يعيرني بعد راح اشتغل منا وجاي بايام العطل وانا رجال واكدر اطلع مصرفي.وهم راح ابقى مساندج ووياج وياج واذا متريديهم اثنينهم هم كولي محد يكدر يجبرج.

بجيت كتله الله يوفقك اخويه ..

عادل .. اني طالع هسه انتِ اقفلي الباب عليج ليدخل زهير خلي تعدي هالليله هاي على خير.واني هم رايح احجي ويا.

هزيت راسي وماحجيت.

طلع واني قفلت وراه الباب.

بقيت بغرفة امي للصبح.

الايام البعدها صرت بس اشوف زهير اروح اختل بالغرفة واقفل الباب.

والي عرفته من امي انو صاحب زهير متفهم الوضع وقابل ينطي اخته بدوني.

بعدها بكم يوم صاحني جمال يم بيتهم رحت اله امشي بهدوء ولازمة طرف ملابسي ومدنكة محاولةً مني اخفاء خجلي وتوتري.

وصلت اله وكفت يمه ودنكت

كال شونج

بس هزيت راسي بايجاب.

جمال .. سمعي بطة ابويه شاك بالموضوع مااريدج تحجين كدامه شي.

رفعت راسي اباوع بعيونه لان ماافتهمت جاوبته شنوو يعني. ؟

- اسمعي ابويه سالني ليش اثنينا خطبناج اني ومعتز كوتله مدام مصارت لمعتز اني اريدها.

بعدني محاجية طلع زهير واجه يمنه

ظل يحجي باستهزاء. بعدها ماصارت الك وجاي تتختل وياها.

تقرب جمال منه گاله اببرود حبيبي زهير بس گولي شبيك وشنو الي يوجعك اطيبه الك.

بعد ماكال هاي الكلمة الاخيرة جمال لملم قبضة ايده وض*ب زهير بو** بنص وجهه.

ض*به مال واحد متحمل هواية وحاقد.

ظلوا يتضاربون اثنينهم طلعت امي وطلع ابوية يزحف زحف وعمو وكمال وعادل وفاككوهم .

صاح زهير اسمعني زين تخطبها منا تتزوجها منا لاتظل تدور ختلات افتهمتتتت؟

مجاوبة جمال وراد يهجم عليه مرة ثانية بس ابو ماخلاه واخذوا وراحوا لبيتهم.

اني حصلت كم صواب وكم راشدي ..

بالليل اجه عمو واتفق ويا ابويه وصاحني وصاح امي. كال جهزوا نفسكم باجر العقد عزمنه الكل احنا.

طلع عمو واني بقيت محتارة ومااعرف شنو المضموم الي.

الليل كله كضيته بجي شسويت بيه معتز حرام عليك.

يوم ثاني اجن بنات عمي واخذني لبيتهم حتى نروح للصالون كالن خل نطلع نوكف برة بينما يجي جمال يوصلنه.

وكفت يم شباك المطبخ وحدي وهنه مناك عني يسولفن.

اسمع صوت مرة عمي تحجي تكول هسه انت شجابرك عليها هاي كله مشاكل ويا اخوها الخبيث يعني تركت بنت خالتك الي الكل يحلف براسها وراس اهلها وراح تاخذ هااي.

سمعته كال يووم الحجي هذا بعد مينحجي خوش.

طلع من المطبخ وصارت عيني بعينه

عيونه جانت تبث كل الحزن.

باوع لاخواته وكال يلله صعدنه بالسيارة ..

وصلنه للصالون كعدت انتظر دوري.

صاحتني الكوافيرة كعدت ع الكرسي بيأس وماكو اي مظاهر فرح ع وجهي.

رفعت وجهي شافت جوة عيني ازرك وكصتي وارمة.

كالت شبيج حبيبتي انت مجبورة ؟

حجيت بقلبي اي والله مجبورة والي جابرني حبيبي.

الكوافيرة. ليش شبيهم اهلج معدهم اكل يوكلوج.

سكتت مابيه حييل حتى احجي.

كالت راح اخليلج خصلات اغطي بيها كصتج لان وارمة.

كتلها شسوين سوي.

ظلت تشتغلني كملت خلصت كالت باوعي لنفسج طلعتي كلش حلوة.

كتلها ميهم ..

جان الفستان وردي منفوش .. شعري طويل لان ماكصيته بعد من عمري 15 لحد هسه عمري 18 شالته الي كله ليفوك وويا طوگ.

كملتني كالن اجه جمال خابرنه

اني يتهيئ الي كالن اجه معتز.

حلقت باحلامي لبعيد طلعت من الصالون

صار مقابيلي جمال هبطت احلامي بيه ورجعت للواقع يمكن هذت اللحظة الوحيدة الي فرحت بيها بذاك اليوم.

صعدتني هيا بالسيارة ليورة ورجعت للصالون

صعد جمال ليكدام وكعد بمكان السايق.

مااعرف شنو الي جبرني احجي بس حسيت اريد انفجر.

كتله صدك شنوو الي جابرك؟

اللتفتلي كال هاا كلتي شي؟

مو عمه تسالك شنو الي جبرك تخطبني وتترك بنت خالتك وحبيبتك؟

جمال .. لان اعرفه اخوية متهور ومجنون ويسويها ويرجع للعراق ومااريده ينقتل خلي بعيد بس عايش ويشم الهوا كافي عليه، كل تصرفات معتز كانت بتهور وجنون حتى بعلاقته ويا المغدور مية مرة كتله اتركه يسبب الك مشاكل مااخذ كلامي على محمل الجد.

فاتن .. سكتت محجيت شي اجن منال وهيا وانطلقنا لاستوديو التصوير واخذنا كم لقطة. ورجعنا لبيتنا كعدت واجو المعازيم، دخل جمال وكعد يمي.

صارت مقابيلي تغريد حبيبة جمال عيونها حمرة بلون الدم تباوع لجمال بتوسل وقهر **رت قلبي.

ووياها نظرات اهلها كانت كلها قهر.

جمال نظراته الها مثل الواحد الي يطمئنها.

اشفقت على نفسي شسويت بنفسي اني مااعرف.

لبسني الحلقة والذهب ببرود ووياها برود مشاعرنا.

خلص اليوم واليوم الي بعده ومرت ايام بين مشاكل زهير واللحاح بابا وعمو بتعجيل الزواج.

رحت حاجيت جمال احنا ملازم نتزوج انتوا مو كلتوا بس خطوبة ماطلعت امانه هااي؟ !

جمال .. زواج وله خطوبة نفس الشي كلها باطله لان لااني اريدج ولاانت ترديني دتفهمين عليه احنا راح نعيش مثل الاخوان اوكي.

واجه يوم العرس وهم تغريد موجودة وصارت مقابيلي وعيونها مو البجي دم احمر اريد اعرف شنو الي جابرها تجي.

زفونا للغرفة جابولنا العشا مردت اتعشا اني بس جمال اكل واني كاعدة ع السرير.

بالبدلة ،راح صاح لهيا ساعدتني بفتحها.

وهو نام ع السرير. ..

بدلت وخلصت اريد بس يمشي الوقت مديخلص ابد

فتحت الكنتور طلعت فراش فرشت الي جوة بصف الجرباية.

كلما يتحرك جمال اموت خوف منه.

اريد بس الوقت يخلص ويطلع الصبح واطلع من هالغرفة لان احس نفسي بسجن وجمال سجاني.

الساعة

انها الساعة 1 ليلآ حيث الضلام يحيط بي من كل جانب هنالك الم يسار ص*ري هنالك شيء يتحطم داخلي

لا اعلم ماهو ربما مرآة الامنيات

وربما نافذة على بصيص من الامل

وربما قلب طفلة حائر يستدل على قارعة الطريق

حطامهٌ يؤلمني جدآ لا اعرف سوى نوع من الدواء انه النوم اشعر بقلبي يتقطع من الالم ماذا جرى تحركي ياعقارب الساعة اضهري لي الفجر بشريني ببزوغ فجر جديد كأن هنالك حبال تجر عقارب الساعة الى الخلف لا يمضِ الوقت يدي ترتجف

ادفن نفسي تحت اللحاف وأنتحب، متسائلًة ماذا يحدث لي

ماذا جرى لي احضن كلي احضن بعضي لايفي حضني بي لا يعطيني الامان المطلوب اغمس نفسي في السرير نامي يا رقـة نامي ياصغيرة

الان تشرق الشمس نامي لا تفكري بمن حولك لا تسترقي النضر الى ساعة هاتفك لاتفكري في الوقت اتركي التفكير ا**تي يانفسي

سأرى كم من الوقت مضى انها الساعة الواحدة وخمسة عشر دقيقة يا الله كل هذا الالم بجزء من الساعة كم علي ان اتحمل يا الله يارب اعني على تحمل هذا الالم اسمع اصوت صراخ تعلو بداخلي ولكنها غير قادرة على ان تتخطى حنجرتي لدي رغبة شديدة في البكاء ولكن إبت دموعي ان تنهمر لدي رغبة شديدة في الصراخ ولكن إبى صوتي ان يخرج معلنآ تضامنه مع الكون ضدي لمن اشكي سأضع يدي على ص*ري واتلو القرآن بسم الله الرحمـٰـن الرحـيم الم نشرح لك ص*رك اللهم اشرح لي ص*ري بدأت دموعي تتساقط كأنها اعلنت خضوعها الى خالقها يارب قلبي متعب جدآ لا احد يشعر بي سواك يارب يدي ترتجف وقدمي ثقلت اللهم ان كانت ساعة موتي فأحسن خاتمتي اشعر كأنني سأحمل على كتف احدهم في صندوق خشبي

ضني بربي كبير اضن أنه لن يعذبني فيكفي عذاب الدنيا علي

ضني بربي سيرحمني لانه رحيم يارب خفف وهون واشفي قلبي اللهم وسع الحبال اللتي تلف على رقبتي.

الخاطرة بقلم الكاتبة رقة ..

فاتن .. صراع طويل وتفكير والم هواية وبكل لحظة اتصور الي نايم ع السرير هو معتز واريد اروح يمه بس اندار واباوعله اشوفه جمال اصحى من تخيلاتي وارجع انطي ظهر متغطية بس شرشف خفيف ومفتوح مكيف بالغرفة وباردة كوه كدرت انام ...

بعد ما غفيت حسسيت بحركة فوكاية ... كمت بسرعة شفت جمال يمي ولازم البطانية ... فزعت كمت مخروعة وارجف خفت منه كتله هاا جمال شتريد احنا شنو اتفقنا ؟؟

حسيته عصب عكد حواجبه ونزل جسمه يمي وكرفص كبالي ...

جمال ... اعرف كلش زين اني وميحتاج كل شوية تذكريني بهالكلمتين تره اعرف احسن منج واكثر مفهوم ؟

هزيت راسي شفته ماوخر من يمي خليت ايدي على ص*ره كتله يلله وخر عني كافي تره خوف*ني

مااستجاب ماوخر سحبني من زنودي بثنين ايدي وخلاني ع السرير

انصدمت اكثر وزاد خوفي ورجفي يربي شيريد هذاااا!!!

كال كملي نومتج هنانه وتغطي بالبطانية لتتمرضين .

هزيت راسي وكتله اي ودفعته من ذراعه ..

وخر عني راح فتح باب الغرفة وطلع

باوعت للشباك بعدها الدنيا ظلمه

كنت بوقتها نعسانه حييل وتعبانه بسرعة استسلمت للنوم

للصبح حسيت بحركة فتحت عيوني وكعدت شفته يم الكنتور ناطيني ظهره ومخلي الخاولي على رقبته

وظهره عاري ومالابس بس برمودا

تمطيت لملمت رجليه صار صوت بالفرشة والسرير اندار عليه شعره مبلل ونازلة خصلات ع جبينه .

كال صباح الخير بطة .. وضحك ورد كمل كلامه

اشو نافشة ريشاتج ؟؟

كتله بعصبية شنوووو ؟

اندار ع الكنتور يطلعله ملابس متجاهل كلامي وردة فعلي

كال امج جوة ..

كمت من السرير بسرعة .. رحت لميز المراية شفت شعري مكفش وشي صاعد ليفوك .. يااشكد عيب من هيج يكولي نافشة ريشاتج .

عدلتهن بحركات سريعة وعشوائية

اللتفتلي كال اطلعي اريد ابدل ملابسي

تخصرت اله كتله متبدل لازمتك .

لزم كمر سرواله كال ابدل كدامج ؟

باوعتله بصدمة كتله لااا عزززه وشمرت نفسي ع السرير رفعت الفرشة والبطانية وصرت جواهن .

سمعت ضحكته ...

من جوة البطانية كتله انوب بدل بالحمام ..

جمال .. ممتعود ابدل بالحمام ..

صحت عليه خلصت ؟؟

جمال :- اي خلصت طلعي من العش مالتج ...

طلعت شفته ديمشط شعره ..

رحت للكنتور اخذت ملابس لزمتهم بيدي

كتله ماكو احد بالحمام اروح اسبح ؟

باوعلي واندار اخذ العطر من الميز ..

كال روحي هذا الحمام تركوا اللنا عشتو عود عرسان وكذا ..

ظل يخلي عطر .. ريحته طيبه بس اني لان من الصبح وبطني خالية مامتريكة مااحب اشم العطر تلعب نفسي منه

كتله اووي لعبت نفسي شنو من عطر هذا تره قوي كولش .

ترك العطر وندار الي رفع ايديه مثل الي بحالة استسلام

كال بسم الله الرحمن الرحيم تره كولشي ماسويتلج حتى من هسه تتوحمين .

كتله اوووو انت شكد قليل ادب .. وطلعت من الغرفة

الحمام صاير بنهاية الممر فوك رحت دخلت سبحت وطلعت رجعت للغرفة ..

شفته مجان موجود .. قفلت الباب وبدلت لبست صاية بيضة ع اطراف اكمامها ذهبي وع الخصر كمر قصير ذهبي حلوة ولونها ناصع . نشفت شعري بالسشوار .

شلت نص والباقي مفتوح ونزلتلي خصلات على جبيني .

خلصت ترتيب بس ماخليت مكياج ماعرف ولا عمري مخليه بنفسي

وكفت يم باب الغرفة فتحتها من القفل بس استحي انزل ..

ثواني واندكت الباب وانفتحت دخلن هيا ومنال

كلت بقلبي اي الله جابجن ..

سلمن عليه بوسني وباركن الي بس نظراتهن غريبة

احس عدهن كلام لحد مانطقت منال ..

منال .. هاا شونه العرس حلوو وتغمز

فاتن .. ارتبكت كتلها اي اي

منال .. يعني كلشي تمام خلصتوا كل شي ..

فاتن .. مااعرف شنو احجي بلحظتها بس اهز راسي وهنه ظلن وحدة تباوع للثانية ..

كتلها امي جوة ؟

كالت اي يلله ننزل .. بس تعاي اشوو انت ممخلية مكياج ؟

- مااعرف اخلي ممخلية من قبل ..

منال .. هيا مكيجيهاا اني اروح اشوف حمودي ابني خاف يتوكح ..

هيا ... يلله ماشي .. اكعدي فاتن ..

كعدت وظلت تمكيجني خلتلي مكياج خفيف بس حيل حلو حمرة وردية هادئة ظلال ع الجفن بس لمعة وردية وظلت تبيرمن شعري كالت احسن حتى يبرز هيج عادي .. واني كاعدة ع الكرسي كبال ميز التواليت الي صاير بصف الباب .. دخل جمال صارت عيني بعينه صفن بيه لحظات .. نزلت عيني خجلت منه كلش .. البارحة ماشافني بالمكياج كضيتها مدنجة وابجي ..

خلصت وطلعنا من الغرفة احنا الثلاثة

شفت كمال وبلقيس سلموا عليه وانطوني فلوس ..

نزلنا جوة .. شفت مرة عمو بوستها وطشت عليه جكليت كالت بس مااكدر اهلهل لان معتز ماموجود .

باعت لجمال بوسته ، باس ايدها وراسها

كلتله ليش مالبست الدشداشة البيضة الي جبتها الك هسه انت عريس وهاي صباحيتك حلوة عليك ..

جمال :- يمه شسالفة اللبس دشداشة بيضة شنوو مطهر؟

كلهم ضحكواا .. طلعت امي من الصالة ركضت عليها بوستها ودموعي نزلن من وحدهن .. وهيه هم ظلت تبجي

كمال... ولج لو ماهما هنانه يمنه جان شسويتي ..

جمال .. خليها عايشة اللحظة ..

كمال .. ولك اسمع جاي تشكيك لامها اعترف شسويت الهاا ؟؟

جمال.. والله اني رجال حباب وفقير ومؤدب كولشي مااسويت ..

كمال .. لا تحلف جذب ولك ..

فاتن .. خطية كمال مصدك عباله زواجنة حقيقي ..

دخلنه للصالة سلمت على عمو وباسني على راسي شفت ابوي كاعد ع للكرسي المتحرك رحت اله بوسته وزدت بجي وهو هم دمعن عيونه وظل يبارك الي .. وبوست اخواني عادل وعبود ونوسة بس زهير الحاقد ومااجه ..

بعدها راحوا اهلي ومقبلوا يبقون ع الغدا ..

تغدينا وخلصنا ، صعدت فوك ارتاح ..

جمال مااصعد كله يم جماعته واصدقائه ..

فرشت بالارض وتغطيت خفت لايجي جمال ويريد ينام غفيت شوية عوضت سهر البارحة .. حسيت اكو حركة بالغرفة بس ماافتحت عيوني ورجعت نمت ..

للعصر كعدوني البنات كالن كومي بدلي ورتبي نفسج اجونه خطار .. نزلت سلمت خطار جاي وخطار طالع

من بينهم خالة معتز ام تغريد .. كعدت واني مقابيلها نظراتها الي خالية من الحقد بس بيها غيرة ضوجتني كلش

بقت شوية وبعدين كامت واني بقيت بمكاني

ظليت افكر وين راحت اكيد راحت لحبيب القلب

واجه على بالي قبل كم سنة من شفتهم ع البلكون سوه وشون جان حاضنها ..

افكاري السودة خلتني اطلع من الصالة وظليت ادور .. رحت للمطبخ مجان اكو احد سمعت صوت كلام .. طليت من الشباك شفتهم بالحديقة الخلفية يحجون وهي تفرك بعيونها مثل الي تمسح الدموع .. ياالله شكد تبجي هااي ..

اه يامعتز شكم قلب **رت واولهم قلبي ..

طلعت من المطبخ وصعدت فوك

كل ضوجة الدنيا بيه ..

ملخت التراجي من اذني احس توجعت وشمرتهن ع الميز والسوارات والكلاده وكل شي شمرته ..

باوعت لوجهي فتحت شعري نزل ع اكتافي تمنيت بهاللحظة اكصه مثل قبل ولادي ..

مديت ايدي للمجر دااطلع المكص ..

دخل جمال جفلت .. ظليت اباوعله بخوف

كال شكوو شبيج ؟؟

ببرود حاجيته ماكوو

جمال .. شكو بعد عايفة الخطار وكاعدة هنا وحدج ..

درت ظهري ، مشيت وكعدت السرير رفعت راسي باوعتله جاوبته بنفس النبرة السابقة.. البركة بيك انت ممقصر ..

جمال .. شتقُصدين ؟!!

فاتن .. عزااا انتبهت على نفسي هسه يكول مضغوطة حاولت اغطي على غلطتي

كتله انت اكعد يمهم مو هما اقاربك ..

جمال ... اشو انت متعرفين تحجين مو هاي الاصول المفروض تكعدين يمهم غير هم جايين يشوفوج .

فاتن .. ديالله هو العرس كوله مو على حسب الاصول وخليت رجل على رجل ..

جسر حسرة وتقرب يمي درت وجهي عليه شفته عاكد حواجبه وعيونه مظلمة .. تقرب ووصل يمي فصل رجليه عن بعض وكال

جمال .. اشوو انت كلش وكحة ومتعرفين تحجين عدل

فاتن .. وكفت على حيلي كتله انت معليك بيه ..

جمال .. احترمي من تحجين

بعد ممكمل كلامه واندكت الباب.. خزرني وراح فتحها .. سمعت هيا تكوله بابا يصيحك اجو جماعتك

باوعلي وبعدة مخنزر ومعصب بسرعه درت وجهي..

فتح الباب بقوة وطلع بسرعة ..

شيريد مني هو هم مصدك اني مرته والله يا الله ..

رفعت شعري .. كلت خلي انزل احسن خاف يجي مااريد ابقى ويا بمكان واحد ..

صار لليل تعشينا .. ام تغريد راحت بعد العشا ..

صعدت ليفوك .. رحت غسلت ونظفت اسناني

ورجعت للغرفة .. لبست تراك بصلي فاتح برمودا

طلعت فراش وجاي افرشه جوة ..

شفته دخل انطيته ظهر كلت اووو بس لا يفتح موضوع العصر والله صرت اضوج انجمع ويا بمكان واحد ..

اجاني صوته ..

بطه نامي ع السرير واني انام جوة ..

بدون ماللتفت اله .. حاجيته ول**ني يرجف ومتوترة .. كتله لا اني مااحب انام ع السرير ماارتاح

حسيته اجه يمي .. خله ايديه على كتفي ودارني اله

كلش ارتبكت من قربه مني دنكت راسي ومارفعتها ..

بس اسمع شنو يحجي .. كال بطة لتخافين واطمئني

انت امانه عندي واني مستحيل اجبرج على شي او اذيج اوكي ؟

هزيت راسي .. بقبول ورغم كمية الحنان الي بلمساته وكلامه بس لسه خايفه منه ومامطمئنة كلش اخاف من قربه ..

رجع كمل كلامه كال اني اعتبرج اختي او بنتي لان اني اكبر منج بهواية اني جنت اشيلج من انت صغيرة ..

مجاوبت منه وخرت كتله اريد انام ..

كال اخذي راحتج ..

رحت نمت وتغطيت .. اسمع صوت التلفزيون

على حسه غفيت بعد ماتعب عقلي من التفكير بنفسي بمعتز بحياتي المستقبلية شون راح اكمل احس نفسي بدوامة ماضي مؤلم حاضر مشتت مستقبل مجهول .

مرت كم يوم الخوف بدأ يتلاشى جمال ابد مااذاني بس يضحك عليه وارد عليه ..

معتز ابد محاجيته من اخر مرة احترمت الورقة الي تربطني بجمال . .

هيا بدت امتحانات الوزارية اشوفها تقرا وبداخلي انقهر ع دراستي الي فرطت بيها ..

بالنهار اللتهي بالشغل ومرات اروح يم امي اساعدها وارجع ..

جمال شغله محلل .. بالنهار بالمستشفى العصر يشتغل بمختبر .. وبالليل بالبيت ..

بعد العشا خلصت غسل مواعين ويا سلوى وصعدت فوك غسلت ونظفت اسناني .. ورحت للغرفة شفت جمال متمدد ع السرير ويباوع ع التلفزيون مطلع مصارعة من دخلت باوعلي بنظرات خاطفة واندار يباوع تلفزيون ..

رحت اخذت ملابس من الكنتور .. ورحت للحمام بدلت كلبيتي لبست تراك وطلعت رجعت للغرفة ..

رحت اخذت الريموت كونترول وكلبت التلفزيون على غير قناة ..

كام من مكانه كاال ولج !! منو سمحلج تكلبي مو كدامج داتف*ج ؟؟

وكفت كباله بصف التلفزيون وايدي على خصري كتله اريد اباوع هذا المسلسل متابعته ..

كام من مكانه واخذ الريموت كونترول من ايدي ورجعه ع المصارعة ..

وراح للسرير تمدد كال ببرود شوفي بالنهار مو يعيدو اني بس بالليل هنا اريد اباوع ..

جاوبته اني بالنهار جوة ومااصعد فوك ..

جمال .. صعدي شوفي ..

ظليت انفخ بعصبية ورحت للميز اللهي نفسي بالمكياج واركع بالغراض باوعت للمراية شفته يباوعلي كتله مو ع اساس دتباوع مصارعة ..

كام نزل جوة كعد .. كال بطة تعالي هناا وياشر ع الكاع

كتله مااريد ..

كال تعااي كتلج ..

رحت كعدت بمكان مااشر الي ..

انطاني تليفونه كال هاج خابري اهلج ..

ههههه العصر يمهم اني ..

حك لحيته كال صديقااتج ماعندج صديقات ؟

فكرت باميرة بس ماعندي رقم خالو كلش متشوقة اعرف اخبارها .. جاوبته عندي صديقات بس مااعرف رقمهم ..

كال راح اطلعلج لعبة واعلمج عليها .. اللتهي بيها بينما اشوف المصارعة لان مااكدر افوتها اني .. وانت رتبي وضعج بالنهار وشوفي المسلسل ..

خوش ...

اخذت الموبايل جان اسمه الشمعة لونه فضي ..

جان راقي بوقته .. طلعلي لعبة اسمها سكاي فورس

طيارة واقاتل بيها ظليت اضحك بداخلي يعتبرني طفلة خررب عود يسكتني يعاملني بالسياسة شنوو انت جمال ..

اخذت التليفون وصعدت ع السرير .. ظليت اللعب شوية ومليت .. طلعت منها ..

كتلني الفضول ادور بالفون .. اشوف شنو يحجي ويا معتز او تغريد ..

ظليت ادوس واباوع اله شفته مندمج ويا المصارعة

ورحت ابحوش بالمسجات والرسائل .. !!!!

يتبع ....