حلال ممنوع

تزوجي أخي

حلال ممنوع

نورا ناصر

فاتن .. شونك معتز وشنو اخبارك طمني مشتاقة والله ..

معتز .. اه شوني بعد ياحبيبية شلوني تعبان وهالكلمة ماتكفي توصف حالتي ..

غريب والغربة دمرتني

.اكوم اكعد واني . اشتاق لايامي بالعراق مشتاق حتى لرزالة ابوية من الصبح اذا اتاخر بالنومة،

مشتاق لجمعتنا اني واخواني ع الاكل مشتاك لطعم الاكل من ايد امي، لضحكة خواتي وزعلهن من الشقة الثگيل،

اما انت اووف انت يافاتن انت بحث اخر مشتاق لايامي وياج وفكرة انو تصيرين لغيري تهاجر افكاري كل ليلة تزعزع اماني وتزرع بيه خوف وتخليني ابجي. انت الوحيدة الي تبجيني يافاتن.

- اووف معتز تدري الي صارلي اني همين حالي مو احسن من حالك ..

- اعرف وجمال حجالي كل شي اني اعرف تصرفت بغباء من جيت عليج اريد اشوفج بس والله فعلا كنت محتاج لشوفتج لان احسها تسندني كنت قاب قوسين او ادنى من ان اسلم نفسي الهم واخليهم يقتلوني واني مظلوم وبريئ بس انت الوحيدة الي وكفتي كبالي ..

- معتز اني اريد اكولك شيء

- كولي ياعشگ الروح ..

- اني مااضمن الك الضروف واهلي يمكن يجبروني ومااكدر اتواصل وياك توقع كل شي واريدك تعذرني.

- لالالا انت شتكولين لاتزيديني قهر فوك قهري ..

- معتز حالي مو احسن من حالك ولاانت المتدمر الوحيد احنا كلنا تدمرنا وياك من امك لابوك واخوانك.

- اعرف حبيبي اعرف والي سوا زهير الي من يومه كلب ومااستغربت فعلته فاتن صح اني بعيد بس هم ماراح ابقى مكتف ايديه واخذ دور المتف*ج ..

- شراح تسوي معتز .. ؟!

- راح احاجي ابويه يخطبج الي انت خو متخافين تجيين يمي واني متهم بالقتل.

- لا مااخاف مدامك بريئ ومظلوم.

- يعني انت مصدگة هالشي؟

- اي طبعا ..

- اوكي لعد اتفقنا ارجوج فاتن لاتضعفين وتستسلمين.

- موشغلة ضعف واستسلام بس كل شي ضدي ابوي عاجز وامي وزهير مساندين بعض وصايرين ضدي.

- اكيد الها الحل حبيبيتي ..

خلصنا كلام عرفت منه عبر لاوروبا وهو بمكان اسمه الكمب ...

نزلت جوة واني ضامة التليفون بطرف كلابيتي

صارت مقابيلي امي تخصرت ووكفت وسدت عليه الطريق ..

امي .. هاا ولج هاي صار ساعة فوك شعندج؟

فاتن .. ماكو ماما اطمئني ..

ظلت تاشر بيديها وكالت والله ادريج ضامة عني شي

هزيت راسي وحجيت بنبرة مليانه بالحزن

(اطمئني) .

طلعت من بتب المطبخ وصرت مقابيل بيت عمي واستحي اروح واذا ماشفت جمال شكووللهم اريد جمال ابد مو راهمه بقيت لازمه الموبايل وواكفة

حسيت شباك انسدت من بيت عمي وبعد دقايق طلع جمال اظاهر شافني من الشباك واكفة ومحتارة.

اجه يمي انطيته الموبايل وراح ..

دخلت لجوة شفت امي بنترة كلتلي شعندج ويا جمييل ولج.

صحت ماما ارحميني الله يخليج ماعندي شي والله ماعندي شي.

وين اروح ياربي ماكو حتى مكان انعزل بي واختلي بنفسي وحزني.

مرت كم يوم واندكت باب بيتنا الداخلية

رحت فتحتها صار مقابيلي عمي سلمت عليه رد عليه ونظراته بيها شي غريب اليه، عمو بعد ما صار الي صار ويا معتز حييل تعب والي يشوفه يكول عنه كبر اكثر من 20 سنة ..

كتله تفضل عمو

- ابوج وين بنتي؟ ؟

- جوة عمو تفضل اود*ك يمه ..

تلكته امي كالت اله تفضل خوية ابو كمال.

سلم على امي ودخل بالهول بمكان ماابوي متمدد.

واني رحت للمطبخ احضر الجاي وظليت افكر بنظرات عمي واتسائل معقولة جاي ينفذ كلام معتز

يعني جاي يخطبني اله!

استحيت اودي الجاي صحت على عادل يودي اله.

بعد اقل من نص ساعة طلع عمي وهو مبين موخالي مبين عليه الزعل او هيج شي.

ظليت افكر معقولة ابوي رفض معتز؟ !

بقيت بس افكر ومعتز ماتواصلت ويا بعد لان طول اليوم اني جوة بالبيت نادرا مااطلع برة بسبب شغل البيت الي كله على راسي.

بهذه الفترة امي اشترت موبايل جابه الها زهير حتى تتواصل ويا اهلها اخواتها واخوانها وتطمئن على بيبي وجدو.

فكرت اخذ رقم معتز واتواصل ويا من تليفون امي

انتظرت جمال يطلع حتى اخذه منه

انتظرته يم الباب ومن طلع من بيتهم

اتحديت خجلي وصحته. جان يريد يروح للدوام مالته. اجه كال هااا؟

ااااريد رقم معتز ..

شتردين منه؟

فاتن ''بحزم''' اريده شسوي بي يعني.

جاوبني ماكو وراح ..

هذا شبي شدعوة عليه؟ فشلني .. دخلت للبيت ..

فد يوم كاعدين ع العشاء ..

نط زهير گال يمه يابه اريد اتزوج ..

امي .. اي يمه ليش لا انت بس أشر واني اخطب الك.

زهير .. يووم المرة موجودة اخت شريكي بالمحل وسام اتعرفي موو؟

امي .. اي يووم شايفته جاي هنا عليك كم مرة.

زهير .. اي وبالمقابل احنا هم ننطيهم مرة.

فاتن .. اشو هذا صخام ظل يباوع عليه

گتله خير اشو عينك عليه ؟!

زهير .. هو منو اكو غيرج هنانه مرة نزوجهيا خو ماازوجه امي؟ !

ابو زهير .. انجب ولك واحجي عدل.

زهير .. العفو يابه بس هاي بنتك لو غ*يه لو غ*يه وحدة من الاثنين.

فاتن .. مااريد اتزوج فكوو مني يااخة.

زهير .. لااشو تتزوجين وغصبا على راسج. انت شنوو بس نفر زايد عن الحاجة هنانه.

فاتن .. لاا بالله لعد منو سوالك الزقنبوت الي جاي تتزقنبه هذا.

زهير .. زقنبوت ابطنج ان شاءالله هسه تجي مرتي. ونستغنى عن خدماتج. وتتزوجيين يعني تتزوجيين.

فاتن .. انتوا شبيكم وياي مااريد اتزوج هي كوة.

عادل .. لاتجبرها زهير الزواج مو بالغصب.

زهير .. لااشو بالغصب وغصبا عليها تتزوج.

عادل .. اي حتى يوميين ويطلكوهاا موو؟

زهير .. اكطع ظهرهاااا اذا تطلك.

فاتن .. باوعت لابويه بنظرة حزن وحجيت بابا احجيلك كلمة.

ابوية .. يابه تينا اذا خوش ولد اتزوجي يابنتي البنية ماالها غير بيت زوجها مدتشوفيني عاجز واخوج يادوب يصرف عليكم وهم من حقه يتزوج.

فاتن .. ليش هسه اني شطالبه شصارفه اشو ملابس صار كومة ممشترية وكله اللبس ويا امي.

اباوع لابوية بعد شوية توكع دمعة من عينه ماردت اكمل حجي واقهره بالزايد.

عادل .. فاتن ماتتزوج غصب مو بكيفك.

زهير .. انجب انت واحترم قراري اني اخوك الجبير ولاتنسى تره انت كلك ملكي هاي ملابسك واكلك وموبايلك ومصاريف جامعتك كلها من لحم كتافي.

أمي .. اشبيج عيني بطه بعدج مشايفه الولد ورفضتي وبعدين تره اني هم مااريد ازعل اختي مني هيه هم تريدها لرائد.

فاتن .. لا رائد ولاغيره اريد ارجع لدراستي

حسوو بيه حراام والله حرراام.

تركت الاكل وگمت.

الايام كامت كوة تمشي .. اروح لبيت عمي اشوف هيا شون ملتهية بدراستها واني حتى الدراسة انحرمت منها.

ارجع لبيتنه محد بحالي احس نفسي عديمة القيمة عند الكل .. كلش تعبت وماكو احد اشكيلة همي وتعبي.

امي حتى تليفونها متثق بيه تخلي بيدي

تخلي بيد نسرين الطفلة الي عمرها 4 سنوات واني لا

ومرات نسرين تتصل ع الارقام الي بتليفونها وتخلص كل الرصيد.

التلفزيون كل شي مابي، الناس كلها شكلت ستلايتات بس احنا لان حضرة زهير يكول بي قنوات موخوش.

حاجيت امي .. ماما اريد اتعلم فد شي اللتهي بي ضايجة انت مو تعرفين تخيطين وعندج مكينة دعلميني هم خلي اساعدكم بالمصرف.

- كالت وهي دتشرب الجاي متخلصين شغل البيت بالاول. !

- شحلص بعد اله اغسل الشارع ..

- أمي ببرود .. گومي نظفي قفص الطيور مابيه اني.

- مااا اني اخاف منهن مو زهير جابهن خلي هو ينضفه.

- لج الفاهية هو اخوج ملتهي يشتغل ويعلف بيج.

- مو جاي اكولج علميني اخيط حتى اخلص من منية زهير هو ابنج لو بي خير يعالج ابوية لو مكيف مسوي نفسه رجال البيت ووانت مساندته لان يصرف عليكم عشتو دخلي يتزوج اذا شفتي منه فلس احمر.

شفتها خلت الا*****ة على الكاونتر و دنگت على نعالهااا .. كمشت كلابيتي من اطرافها وركضت.

من اقري عبدالله يجوون اصدقائه ظليت اقريهم ويا ويوم عن يوم زاد العدد وينطوني فلوس.

ليش ماشافهم زهير وطردهم كلهم الخبيث تعاركت ويا بس مااكدر عليه ايده والض*ب يموتني يريد يخنكني ويمنع عني حتى الهوا اذا يصح بيده حتى اوافق اتزوج.

فد يوم اجت امي وبيدها الموبايل

كالت هاج هاي اميرة بنت خالج تريد تسلم عليج.

استغربت واخذت الموبايل منها.

سلمت عليها شونج اميرة؟

- بخير عمري فاتن انت شلونج؟مشتاقتلج.

- اني اشوق.

- سمعت جاييج خطابة صح هذا الكلام؟

- اي صحيح.

- وموافقة انتِ؟

- لا اميرة مااريد.

- ليش وشعجب مو بطلتي من المدرسة وكعدتي بالبيت. ؟

- اي بس هذا مو معناه اريد اتزوج.

- تردين رائد موو؟

- لا اميرة انت تعرفين من قبل مااريده اني وكايلتلج هالكلام واني اعرف رائد يحبج.

- فاتن رائد قبل فترة هيج سنة وكم شهر اجه هو وابو و خطبني ولان وابويه يعرف امه تريدج ماانطاهم.خاف من المشاكل.

لان عمتي تريدج وكايله لرائد فاتن منذورة الك واذا ماتزوجتها يصير بيهاا شي فهو سمع جايتج خطابة وبلغني احاجيج توافقين بلكي عمتي تفك وابوي يوافق هسه اني تخرجت وكعدت ويجوني خطابة واني رايدته لرائد وهو همينه دتفهمين عليه. ؟

- اي فهمت كلامج كلش واضح اطمئني اني مستحيل اقبل برائد وادري يحبج. واني الي نبهتج على حبه لو نسيتي.

- لا مانسيت عمري.

ختمتها وياها. ودموعي نزلت انطيت التليفون لامي ورحت برة انتظر جمال اشوفه اريد احاجي معتز لان بعد مااگدر اتحمل ابد.

بقيت يومين انتظر جمال وماجاي تصدف اشوفه.

وارجع للبيت خايبة.

امي. خالتج تكول حضروا نفسكم راح يجون يخطبوج هالايام.

فاتن .. اكلج يمه هاي خالتي تغرد خارج السرب تره رائد مايريدني.

امي .. جاي اكلج خالتج كالت.

- هو اني راح اتزوجها لو اتزوج ابنها كتلج مايريدني.

- خوش انه اشوف زهير واكووله.

- وعليمن تشوفي وتكوليله هاي النقالات هم نعمة ورحمة للاوادم وقربت المسافات خابري وحاجي.

- خوووش.

راحت خابرته ورجعت وجهه يشمر اللوان.

باوعت الها كتلها هاا شكاال؟

- يكول تسووين فضل اذا تعرسيها انه اعتبرها مثل اختي.

- هاا شگلنه؟ ؟

- ارضي بوسام لعد وخوش ولد.

- بعدني محاجية.

طب زهير كال يلا ولج فاتن اجه وسام واهله يردون يشوفوج.

استغربت كلش كمت على حيلي گتله هيه هاي سواية تسويها انت شبيك مخبل تره حرام عليك الله مايوفقك هيج.

تقرب مني ولزمني من ع**ي حييل كال حجاية زايدة مااريد افتهمتي روحي بدلي وطلعي الهم.

نزلت دموعي ورحت غسلت وجهي لان تعبت واستسلمت.

شلت شعري ليفوك ولبست قميص وردي وبي نقشة سودة وبيضة ووياه تنورة سودة.

اجت عليه امي لان استحي افوت وحدي وطبيت عليهم سلمت بدون ماارفع وجهي. واني مدنكة ورحت كعدت مقابيلهم.

وامي تكرص بيه رفعي راسج وشوفي لابعدين تكولين ماشفته.

رفعت راسي باوعته يطلع بعمر اخوي زهير ملامحه حييل باردة اسمر وشعره خفيف ولحية خفيفة

مرتب وشخصية.

هذا الي لاحظته عليه .. بعدها راحوو وركضت لغرفة امي وقفلت الباب بجيت بجي مصاير يدگوون الباب وماافتح الهم نمت واني على هذا الحال لحد نص الليل گعدت فتحت الباب وطلعت الكل نايمين.

يوم ثاني شفت جمال رحت يمه

- جمال اني ضروري احجي ويا معتز.

جمال ""ببرود"" : اووك ..

وره يومين يلله اجاني .. من شفته كتله وينك تاخرت هالكد. شدعوة؟

جمال .. غير عبيت رصيد اتصال دولي يكلف هواي.

باوعتله باستنكار واخذت الفون منه ودقايق واتصل معتز.

معتز .. شونج حياتي؟

فاتن .. اخخ شوني بعد.

- دزيت ابويه يخطبج الي مقبل عمي يكول ماادزهه هناك ومعتز مااله مستقبل متهم بالقتل.

فاتن .. معتز اني جايه اودعك عفية بعد مااتحمل والله راح اختنگ.كل شي ضدي متقدملي شخص وراح اوافق عفيه اعذرني اني مو من نصيبك اسفة.

معتز .. انت شدتخربطين لج انت الي ومصيرين لغيري.

- مابينه نصيب شسوي اريد تعذرني عفية حباب.

- منو هو هذا الي متقدم الج.

- صديق زهير.

- اي كملي وين شايفج.

- اجه للبيت وطلب يشوفني.

- وطلعتي وشافج هااا؟

- اي غصباً عليه والله.

سمعته ض*ب شي قوي.

بعدها كال

- والله مااخليج اصيرين لغيري والله

ودي الموبايل الجمال بسرعة.

سديته واخذت الموبايل وطلعت برة انتظر جمال ودموعي تكت.

من شافني اجه جمال انطيته الموبايل بدون مااباوع عليه گتله هااك وبعد من يكولك يريد يحاجيني لتجيبه الي وكوله خل ينساني.

اريد اروح لزمني من ايدي ..

باستغراب كال شكوو وشنو صار بينكم؟

هزيت راسي باستنكار وركض للبيت.

مااعرف شون مرت كم يوم بين سهر ودموع والم وتانيب ضمير وكل شي احس،حياتي مقلوبة راسا على عقب والتعب ماخذ جزء كبير من روحي.

مشتتة وضايعة ومحتارة.

ورغم الهدوء المحيط بيه احس اكو ضجيج بداخلي

مثل ماكنة كبيرة وتطحن حجارة قوية هيج احس.

امي وزهير راحو يشوفون اخت وسام الي خطبني حتى يتفقون ع الخطوبة.

طلبوا مني اروح رفضت. بقيت بالبيت وحسيت الهوا يخنكني. طلعت ورحت وره البيت واتذكرت ايام مستحيل ترجع بعد وظليت ابجي ونزلت كل ماعندي من دموع.

واني كاعدة ومدنكة راسي وابجي ب**ت وقلبي يتقطع من الالم.

سمعت صوت يصيحني .. بطه

رفعت راسي جمال.

درت وجهي كتله هاا جمال شنوو تريد واذا على معتز كووله مااحجي وياا لهنا وبس.

اشو هذا اجه يمي عصبي كرفص كبالي باوعت اله بخوف .. صك اسنانه وعيونه تتجادح شرار.

كال كلمة مااسمع منج وراح تنفذين الكلام الي يكووله الج بالحرف الواحد مدام انت نطيتي وعد خلص هذا هو ابقي على وعدج اله ،مدام انت مو كدها ليش مو من الاول ماصار الي الي صار وكتيله مااريدك جان هسه هو ناسيج.

كمت على حيلي وباوعت اله گتله ووعدته وهسه شنوو الي صااار هااا كوله خلي ينساني تعبت بعد مااتحمل.

جمال '' بعصبية '' لج وهو بالغربة ديفكر بيج خبلة يريد يجي للعراق بسببج ويكول ميهمني اذا انقتل خلي انقتل المهم ماتصير لغير.

فاتن .. من بين دموعي وخوفي ورجفة جسمي گتله لاعفية جمال قنعة ميجي.

جمال .. انت اتعرفين اذا اجه شنو راح يصير؟

- هزيت راسي بدون فهم.

كمل كلامه جمال وكال .. يعني يسيل نهر من الدم اله اول مااله تالي دتعرفين شنوو يعني؟ ؟

- مستمرة ابجي گتله اني شنوو الي بيدي اسوي عفية اني ضعيفة واهلي مسيطرين عليه وجسمي خرب من الض*ب والله.

جمال .. هاج حاجي وافهمي منه.

فاتن .. اخذت الموبايل من جمال وهو راح وكف بعيد عني اباوعله احسه محتار وضايع مثلي تماما.

دك الموبايل باوعت للشاشة مجاي اشوف شي من شدة الدموع المتجمعة بعيوني فركتهم.

كوة لمحت اسم معتز على شاشة الموبايل، وبأيد ترجف فتحت خط.

وخليته على اذني وگلت الوو معتز.

معتز .. فاتن اني اريد اجي للعراق مااريدج تصيرين لغيري.

فاتن .. لاعفية معتز لتجي فدوة لعمرك.

معتز .. لعد لتتزوجين ..

فاتن .. شهگت مو بيدي معتز والله.

- اني عندي الحل ..

- شنوو؟

- اتزوجي جمال اخوية.

فاتن ..'' بصدمة '' شنووو انت تخبلت؟ !!!!

للحكاية بقية.

أسفة بس النت جان فاصل.