APOY ANG ISA SA MGA mabisang paraan upang matalo nila ang mga kalaban. Walang silbi ang hawak nilang mga espada. Tatagos lamang iyon sa katawan ng mga halimaw na may putik na pangangatawan. Mas malaki ang maitutulong kung buhangin ang gagamitin nila ngunit wala siyang kapangyarihan na gumamit niyon. Kahit nga ang espadang gamit niya hindi niya alam kung paano paaapuyin.
Sumisingkit din ang mga mata ni Rocco dahil sa hindi kaaya-ayang amoy na sumusuot sa kanyang ilong. Habang padagdag nang padagdag ang halimaw na putik, lalong bumabaliktad ang sikmura niya dahil sa masangsang na amoy na nanggagaling sa mga kalaban. Mas masahol pa ang amoy niyon sa imburnal, patay na daga o nabubulok na pagkain. Parang amoy na naagnas na tao at inuod.
Sanay na siya sa mga masangsang na amoy sapagkat hind
