ابق حيا

القصة التانية #انتقام_الاشباح

الفصل الاول

***

اخيرا وبعد 15 سنة في المحاكم والبهدلة بين المحاميين اخير المحكمة حكمت لينا بملكية البيت اللي ورثناه عن المرحوم بابا واللي كان وارثة عن ابوه واللي كان متاخد منة نصب بوضع اليد

واللي عرفناه ان اللي كان واخد البيت ده كان عاملة مقر له لممارسة السحر والدجل وتسخير الجان

بابا قبل ما يموت حاول انة يرجع البيت بالطرق الودية لكنة فشل ولان مكنش له ضهر يحميه ويرجع له حقة المنهوب بابا راح لمحامي ورفع قضية وقدم الاوراق اللي تثبت انة صاحب البيت وانة وراثة عن ابوه

لكن لأن حبال المحاكم طويلة زي ما بيقولو.. القضية مكنتش سهلة وبابا فضل ورا حقة لغاية ما مات بحسرتة علي حقة وحق عيالة اللي مش عارف يطولوا وبعد وفاة بابا ... ماما هي كمان فضلت تجري ورا حقنا وميأستش واخويا وقف معاها لغاية ما **بنا القضية والبيت رجع لينا

ماما جابت شيوخ علشان تنضف البيت قبل ما نسكن وبقي فعلا جاهز للسكن

لمينا هدومنا وحالنا نزلنا علي مصر وسكنا في البيت وبعد شهر بدأت المأساه

البيت عبارة عن اربع ادوار غير الأرضي .. واحنا كلنا قعدنا في الدور الأول. واخويا قال انة هياخد الدور التاني وهيجهزه علشان يتجوز فيه

وكان عايز يقعد من دلوقت في شقتة اللي فوق لكن ماما رفضت وقالت انت تقعد معانا في الشقة ولما تتجوز تبقي اطلع فوق .. انت ونسنا وضهرنا

بعد مافرشنا الدور الأول وسكنا في البيت ... تالت يوم بالظبط اخويا صحي الصبح بيدور علي محفظتة اللي كان سايبها علي طرابيزة التليفزيون ملقهاش قلبنا الشقة عليها لدرجة ان اخويا شال التليفزيون خالص ودور وراه وملاقاش حاجة وبعد ساعة من القلابان انا واختي وماما وهو مخلناش حتة في الصالة الا لما دورنا علي المحفظة وبعد ده كلة اخويا دخل الحمام وخرج لقي المحفظة علي الطرابيزه

اخويا واحنا كلنا تنحنا وكلنا شكينا في بعض ان حد فينا قايم فايق وبيهزر

مرت الأيام ونفس الحركة بدأت تتكرر

فلوس تضيع وبعدين تظهر .. لبس منلقهوش وبعد يومين نلقيه في الدولاب مطرحة ... اصوات غريبة نسمعها .. برغم كل اللي كان بيحصل ده مكناش محدش فينا كان حاطط في دماغة حوار الجن والعفريت ده وفي يوم ماما كان عندها غسيل وطلبت من اختي دلال تغلي مياه علي البوتجاز وتدخلها الحمام علي ما ماما تفك الستاير بتاعة الشباك وفعلا اختي دلال عملت كدة حطت بستلة المياه علي البوتجاز ولما الميا غليت راحت مدخلها الحمام لكنها اتزحلقت البستلة كلها ادلقت في الأرض وعالحمام وربنا سترها ومفيش ميا جت علي اختي بس اللي حصل ساعتها كان غريب جدا اول ما البستلة وقعت من ايد اختي والمياه ادلقت علي الأرض سمعت صوت صريخ ودلال اغمي عليها .. ماما سمعت صوت وقعة اختي وصوت البستلة علي الأرض راحت جريت علي الحمام وشافت دلال مرمية علي الأرض مغمي عليها .. انا في الوقت ده كنا في الشغل ماما اتصلت عليا وقالتلي الحقيني اختك وقعت في الحمام ومغمي عليها ومش عارفة افوقها .. سبت الشغل وروحت جريت علي البيت وعلي ما وصلت كانت اختي دلال فاقت وحكت لينا اللي حصل . وماما افتكرت ان دلال اختي موهومة بسبب الوقعة مش اكتر

بعد الموضوع ده بدأت احس واشعر بحاجات غريبة بتحصل .. اسمع نفس حد جنبي عالسرير وانا نايمة ... في الأول كنت بفتكره نفس اختي .. لكن الموضوع ده اتكرر حتي واختي مش نايمة جنبي لغاية ما في يوم بعد ما الكل راح في النوم وبالظبط

الساعة تلاتة بعد نص الليل صحينا علي صرااخ جاي من الحمام الحقوووني الحقوووني

قومت من النوم مفزوعة علي صراخ ماما صباح اللي كانت واقفة علي قعدة الحمام وهتموت من الرعب والخوف

واخويا وجيه واختي دلال كانوا هما كمان واقفين عند الحمام ومبرقين من المنظر اللي شايفينة قدام عيونهم

تعبان كبير اسود واقف قدام باب الحمام

اخويا وجيه ماسك عصاية كبيرة وكل ما يجي يض*ب التعبان. .. التعبان يهجم عليه

المنظر خلاني كنت كنت هموت من الرعب

صوات وصريخ امي وصريخ اختي دلال اللي هي كمان مرعوبة وزعيق من اخوي وجيه عمال يقول ل اختي ابعدي شوية انتي

عم عبده بواب العماره اللي جنبنا لقي باب البيت الحديد مفتوح طلع جري فاكر ان في حرامي في العمارة وطالع بسكينة كبيرة عاملة زي سكاكين الجزرين

الباب بيخبط جامد روحت فتحت

وبصوت مليان خوف ورعب الحقنا ياعم عبده في تعبان كبير في الحمام

عم عبده اول ما شاف التعبان

وقف هو كمان زي العاجز واخويا اخد منة السكينة بسرعة وراح ضارب التعبان فصل راسة عن جسمة

التعبان فضل يتلوي علي الأرض بتاع ربع ساعة وبعدها راح ميت

عم عبده نزل جاب شوال فاضي وحط فيه التعبان ونزل رماه في صندوق الزبالة اللي علي اول الشارع

وانا وماما نضفنا الحمام وغسلناه واحنا خايفين ومرعوبين وبعد ما خلصنا خرجنا قعدنا في الصالة

ماما وانا واختي مكناش قدرين نقف علي رجلينا من الرعب والخوف اللي شفناه في الليلة السودة دي

وكلنا خوفنا ننام في اوضنا ليكون فيه تعبان تاني في الشقة ويطلع يقرصنا

فضلنا صاحيين لغاية ما النهار طلع

وماما قالت لازم اشوف حد يكون بيطلع التعابين من البيوت يجي ويشوف التعبان ده جه منين

انا :: هو التعبان ظهر ازاي قدامك .. طلع منين يعني

ماما :: معرفش يابنتي انا كنت قاعدة ف حمام حسيت ان عنينا غفلت ثواني وحسيت نفسي بنزل في بير طويل ملوش ارار ولسة هخبط في الأرض فتحت عنيا وانا مفزوعة وشفت التعبان ده واقف بيبصلي زي ما انتوا شايفين .

انا :: يعني انتي نمتي وانتي ف الحمام

ماما :: الظاهر كدة يابنتي بس اللي مستغربالة الباب كنت انا قفلاه بالترباس من جوا ولما فوقت وفتحت عنينا الباب كان مفتوح

اختي :: يا ماما ... انتي هتخوفيني ليه

ماما :: ده اللي حصل

... اعرفكم بعيلتي

ماما :: صباح 45 سنة ارملة من عشر سنين من بعد وفاه ابويا امي رفضت تتجوز وعاشت حياتها لينا احنا وبس

انا :: صافي ده اسم الدلع لكن اسمي الحقيقي صفاء 21 سنة حاصلة علي دبلوم تجارة وشغالة في كوافير حريمي

اختي :: دلال 19سنة بردو دبلوم تجارة وشغالة في عيادة خاصة مع دكتور اطفال في نفس الشارع وبتنزل الشغل كل يوم ماعدا الأحد و الأربع الساعة 7بعد المغرب وبترجع علي 11 بالليل

اخويا وجيه 23سنة وفاتح ورشة المونتال علي قده وبيساعد ماما في مصاريف البيت مع المعاش اللي بتقبضوا كل اول شهر

حياتنا يعني متوسطة الدخل ومبسوطين .. كلنا بنحب بعض

اخويا خطب مره وبعد فترة اكتشف ان اللي خاطبها سمعتها مش كويسة ف راح فشكل الخطوبة وقرر انة لما يحب يخطب تاني هيخطب واحدة من البلد

اصلنا من الأرياف من قرية تبع المنصورة

الساعة سبعة الصبح والنوم غلبنا كلنا وكل واحد فينا دخل نام في الأوضة بتاعتة وصحيت علي عشرة الصبح علي صريخ اختي

خرجت من الأوضة جري وقولت اكيد فيه تعبان تاني لكن لقيت اختي مغمي عليها والأرضية بتاعة الحمام غرقانة دم .. ولا كأننا دبحين دبيحة في الحمام

امي واخويا هما كمان خرجوا علي صوت اختي وانا قعدت جنب اختي بحاول افوق فيها

اخويا جري علي المطبخ جاب بصله وشممها لاختي لغاية ما فاقت وهي بتعيط وبتشاور عالحمام ... وبتقول التعبان صاحي التعبان صاحي

ماما :: ايه الدم ده كلة وجه منين

انا:: مفيش تعابين ياحبيبتي مفيش

دلال :: لا موجود مامتش انا شفتة بعنيا

انا :: شفتي ايه يعنيكي بس يا دلال ما اخوكي قتلة امبارح قدامنا

وجيه :: غريبة فعلا ... الدم ده جه منين

ماما :: انا لازم انزل دلوقت اشوف حد يجي يشوف البيت ده

انا :: هتروحي فين بس يا ماما دلوقت ثم انتي تعرفي حد بيطلع تعابين

ماما :: لا معرفش بس هسأل يابنتي كدة فيه حاجة غلط

انا :: خلاص بس استهدي كدة البت دلال تعبانة ومش ناقص كمان نخوفها

وجيه :: انا هسأل كدة علي اي حد بيطلع تعابين يمكن القي حد

********,*