Gusto kita
“CONSTANCIA?” kitang-kita ko ang gulat sa mga mata ni Nanay nang makita akong inalalayan si Alas na tumayo mula sa pagkakasalampak niya sa sahig.
Napalunok ako at agad binitiwan ang braso ni Alas na napatingin na rin kina Nanay.
“Magandang gabi po–”
“Sino kang talipandas ka at anong ginagawa mo dito?” naniningkit ang mga matang sigaw ni Lolo na kumawala sa pagkakahawak ni Nanay.
Humakbang siya palapit sa amin ngunit dahil sa kalasingan ay nawalan siya ng balanse at muntikan pang sumubsob sa lapag kung hindi siya maagap na nasalo ni Alas.
“Bitiwan mo nga ako!” sigaw ni Lolo na hindi na halos maintindihan ang sinasabi dahil sa kalasingan.
Agad akong lumapit kay Alas at inilayo sa kanya si Lolo na kahit anong pagpupumiglas ay hindi binitiwan ni Alas na ikipinagpasalamat
