Academia Obscura | The Last Question

Chapter 4

Hindi mapakali si Jean matapos mabasa ang impormasyon tungkol sa "Academy Obscura" sa papel na napulot niya. Wala siyang ibang mahanap na impormasyon tungkol dito online, at sa kabila ng kakaibang pakiramdam, parang may humihila sa kanya na pumunta at alamin kung ano ang mayroon sa paaralang ito. Kaya kinabukasan, nagpasya siyang pumunta sa lugar na nakasulat sa flyer.

Pagdating niya sa address, nagulat siya sa nakita, isang tahimik na gusaling mukhang mas modernong unibersidad. Malinis at simple ang fasad nito, walang anumang kakaiba. Sa pagpasok niya, marami siyang nasalubong na mga estudyante na may kanya-kanyang mga grupo, ang ilan ay seryosong nag-uusap, ang iba naman ay tahimik na naglalakad, tila walang pakialam sa kanyang presensya.

Habang papalapit siya sa lobby, isang bagay ang nakakuha ng kanyang pansin. Sa mesa sa gilid ng entrance ay nakalatag ang ilang mga card. Isa sa mga card ay may nakasulat na, “Para sa mga bagong dating: Sagutin ang tanong na ito bilang unang hakbang.”

Agad na binasa ni Jean ang tanong: "Kung bibigyan ka ng pagkakataon na malaman ang lihim ng bawat tao, gagawin mo ba ito, kahit na may kapalit?"

Napatigil siya, tila pinipiga ang kanyang isipan sa kahulugan ng tanong. Wala siyang alam tungkol sa paaralang ito, kung bakit naroon ang mga estudyante, at kung ano ang maaaring kahulugan ng “kapalit.” Pero alam niyang para sa kanya, may misteryo sa lugar na iyon na gusto niyang malaman.

Sumulat siya ng maikling sagot sa card at inilagay sa loob ng isang dropbox sa tabi ng mesa, tulad ng nakasulat sa direksyon. Matapos iyon, sinundan niya ang direksyon sa card na nagsasabing pumunta sa "Student Affairs Office" upang makapagpatuloy.

Habang naglalakad siya, naramdaman niyang may ilang estudyanteng lihim na sumusulyap sa kanya, para bang alam nilang bago siya sa lugar at sinusuri ang bawat kilos niya. Nang marating niya ang opisina, naroon ang isang staff na seryoso ang tingin. Iniabot nito ang isang maliit na envelope na tila naghihintay na ang pangalan ni Jean ang tawagin.

Sa loob ng envelope ay may isang pangalawang tanong na mas mahirap pa sa una "Handa ka bang talikuran ang iyong dating buhay para sa isang bagay na maaaring hindi mo na mabawi?"

Napalunok si Jean, ang mga kamay niya'y bahagyang nanginginig. Alam niyang iba ang lugar na ito, hindi basta eskwelahan. Bawat tanong ay tila nagpapahiwatig ng mga bagay na hindi niya ganap na nauunawaan. Ngunit may nagtutulak sa kanya na sagutin ang bawat isa, at alamin ang kasagutan sa mga misteryong bumabalot sa Academy Obscura.