بيت الافاعي

البارت الثاني

البارت الثاني

لقت هبه تليفونها بيرن وكانت متوقعه انه اسامه اللي بيكلمها ويقول لها قال لاهله ايه وعمل ايه معاهم لكن لقيت احمد ابن خالتها هو اللي بيتصل بها ما بقتش عارفه ترد ولا ما تردش .. بس هي لازم ترد وتصارحه بكل حاجه

هبه : الو ازيك يا احمد عامل ايه

احمد : انا كويس الحمد لله انتي عامله ايه يا هبه

هبه : انا الحمد لله كويسه . خير يا احمد ؟

احمد : انا مش عارف اقول لك ايه والله يا هبه بس انا كنت مفاتح خالتي في موضوع كده هي قالت لك عليه ولا لا ..

هبه : موضوع ايه ؟ عملت نفسها كأنها ما تعرفش اي حاجه عشان ما تحرجش نفسها ..

احمد : بصراحه يا هبه انا كنت عاوز اجي انا وماما نتقدم لك ومش عارف ايه رايك في الموضوع ده ..

هبه : بصراحه يا احمد انت فاجئتني وبعدين ما قلتليش ليه من الاول انا متقدملى واحد ثاني وجاي هو واهله يوم الجمعه يتعرفوا علينا ..

احمد : ازاي الكلام ده يا هبه انا قايل لخالتي الموضوع ده بقى لي فتره ومستني منها رد ..

هبه : بس ماما بصراحه ما قالت ليش اي حاجه .. انت انسان محترم والف واحده تتمناك لكن احنا دلوقتي ادينا للناس كلمه انت اللي ماجتش الاول وما ينفعش تخطب واحده واحد اتكلم عليها الاول ..

احمد : ربنا يسعدك ويوفقك يا هبه لو انتي موافقه على العريس اللي جاي ده ربنا يسعدك ويوفقك انا عمري ما هفرض حاجه عليكي انتي غاليه عندي جدا و اهم حاجه عندي انك تكوني سعيده و مبسوطه ..

هبه : ماشي يا احمد شكرا ليك جدا واكيد طبعا لو حصل خطوبه او حاجه انت اول واحد معزوم انت اخويا وما اقدرش استغنى عنك ..

احمد : شكرا ليكي يا هبه يلا مع السلامه .. قفل احمد مع هبه وهو حاسس انه متضايق جدا وكان بيتمنى لها السعاده من كل قلبه لانه بيحبها بجد وقعد يلوم في نفسه انه مصرحهاش من الاول وما كانش يعرف ان في واحد ثاني عينه عليها وعاوز يخطبها لكن هو اتاخر .. هبه ما حطتش الموضوع بتاع احمد ده في دماغها و اتقفل خالص .. قعدت هبه ثاني يوم تجهز اللي هتلبسه والبيت عشان اهل اسامه جايين خلاص يوم الجمعه ولازم تستقبلهم استقبال حلو .. وجه اليوم الموعود اللي اهل اسامه واسامه جايين عشان يتقدم لها لكن هي اتفاجئت ان اللي موجود اسامه وباباه واخته بس .. ومامته ما جتش عشان تشوفها .. سلموا عليهم ودخلوا ومامتها كانت مستغربه هي ليه مامته ما جتش رد اسامه وقال : ماما ما بتقدرش تنزل من البيت عشان تعبانه شويه لكن انتم ممكن تيجوا تشوفوها لو حبيتوا .. قعدوا يتكلموا شويه ويتفقوا وباباه كان شخص كويس .. اخته ما كنتش بتتكلم خالص ولا بتبدى رايها باي حاجه وهبه كانت بتحاول تفتح معاها اي كلام لكن هي كان باين عليها انها انطوائيه ومش بتتكلم كثير لكن هبه الموضوع ده ما ضايقهاش خالص بالع** هي فرحت عشان قالت انها كده مش هتدخل في حياتها ولا هتقعد تتكلم كثير معاهم وعليهم .. اليوم خلص واتفقوا على يوم يجو يقراوا فيه الفاتحه لكن مامت هبه **مت مش هيقروا فاتحه غير لما يروحوا بيتهم الاول ويشوفوهم عاملين ازاي .. بعد ما مشيوا مامت هبه دخلت تتكلم معها جوه وقالت لها : يعني انتي هتقعدي في بيت عيله في الاخر يا هبه هيبقى في مشاكل كثير جدا

هبه : يا ماما بيت العيله في شقه منفصله وانا هابقى في حالي وهما في حالهم وانا مالي بيهم اصلا لكن ما ينفعش اقول له سيب اهلك وروح على بيت ثاني كده يكرهوني من قبل ما اتجوز .. ما هو واخوه موجود معاهم ومراته كمان موجوده اكيد لو كان في مشاكل مثلا كانت هتبقى مراته مطلقه مثلا او ما كنتش استحملت الوضع .. واضح ان مامته ست كبيره وتعبانه بدليل انها مقدرتش تيجي النهارده معاه الزياره

مامت هبه : على العموم انا مش هاخد اي خطوه في الموضوع ده غير لما نروح نشوف بيتهم عامل ازاي ومامته هي كمان عامله ازاي عشان انا مش عارفه ليه قلبي مش مطمن و مقبوض كده ..

هبه : انتي قلبك مقبوض بس يا ماما عشان كنتي عاوزه اني اتخطب لابن اختك وده مش هيحصل انا مش هاتجوز غير الانسان اللي انا بحبه وبيحبنى ..

مامت هبه : انا ما غصبتش عليكي حاجه يا بنتي انا كل اللي يهمني مصلحتك وعلى العموم انتي اللي هتتجوزي وانت اللي هتعيشي ولو انتي قادره تسكني في بيت عيله وتقبلي بالوضع ده ما فيش اي مشكله احنا هنروح لهم بعد بكره ونشوف الموضوع ده .. عدي يومين وجه اليوم اللي هيروحوا فيه عند بيت عيله اسامه وصلوا عالبيت و كان عباره عن عماره كبيره في مكان كويس نوعا ما بداوا طلعوا على فوق الدور الاول كان بيت مامت اسامه وباباه .. اسامه واخته استقبلوهم بره ومامته ما كانتش ظاهره خالص دخلوا قعدوا ما كانش في احد قاعد غير اخت اسامه ... هبه كانت قاعده مستغربه جدا مامته ازاي ما خرجتش تشوفهم وراحت قايله لي اسامه في ودنه : امال فين مامتك

اسامه : ماما هتيجي دلوقتي ما تستعجليش .. بعد حوالي نصف ساعه مامته خرجت والمفاجاه انها مش ست كبيره ولا حاجه وكانت ماشيه ولا باين عليها انها تعبانه زي ما قالوا انها ما جتش عشان هي تعبانه ولا باين عليها اي تعب .. هبه اول لما شافتها قامت من مكانها عشان تسلم عليها لكن مامت اسامه مادتهاش اي اهتمام وقعدت مكانها وقالت اهلا وسهلا نورتوا .. كانت طول القاعده مش بتبص لي هبه خالص و باين عليها انها متضايقه جدا ومش موافقه على الجوازه .. قعدوا يتفقوا ويقولوا احنا علينا ايه وهما عليهم ايه والشقه بتاعه اسامه كانت فوق مامته على طول والدور اللي فوقيه ساكن فيه اخوه متجوز ومعاه ولد وبنت لكن مامت هبه في نصف القعده قالت لهم ان لو في امكانيه انهم ياخذوا شقه ثانيه بعيد عن بيت العيله يكون افضل عشان ما يحصلش مشاكل .. ساعتها لقوا مامت اسامه شكلها اتغير خالص وبدات تتكلم وتقول لها : احنا ما عندناش حد بياخذ شقه بعيد عن بيت العيله وهو ده اللي متاح عندنا لو موافقين موافقين مش موافقين نفض الموضوع من اوله عشان ما تقولش بعد الجواز بتعملوا مشاكل .. مامت استغربت جدا من رد فعلها خصوصا انهم عندهم في البيت وما ينفعش تتكلم معاها بالطريقه دي .. قعدو حوالي ساعه في خلال الساعه دي مامت اسامه ما حطت لهمش حتى كوبايه عصير ولا جايبه اي حاجه عشان تقدمها لهم .. قعدوا يتكلموا وبعد ساعه استاذنوا انهم يمشوا وقالوا هنبقى نرد عليكم .. هبه وهي ماشيه كانت متضايقه جدا من مامت اسامه حتى ما سلمتش عليها بسبب المعامله اللي هي عاملتها لهم والطريقه بتاعتها .. روحت البيت ومامتها قعدت تتكلم وتقول لها مش قلت لك ان مش شرط يكون الشخص كويس اهله كويسين حماتك من اولها باين عليها انها بتدخل في كل حاجه ما لهاش فيها وعاوزه تعمل معاكي مشاكل ..

هبه : ما تحكميش على الشخص يا ماما من اول مقا**ه وبعدين احنا لسه ما نعرفهاش كويس بلاش نظلمها من اولها كده ..

مامت هبه : باين عليها نظراتها لنا وانها مش موافقه على الجوازه وفي واحده ثانيه في دماغها عاوزه تجوزها لابنها ..

هبه : زيك كده بالضبط لانك عايزه تجوزيني ابن اختك لا يا ماما انا مش هتجوز غير اللي قلبي اختاره وبعدين انا هاتكلم مع اسامه واشوف الموضوع ده وهشوف مامته فعلا مش موافقه على ولا ده كلام وبيتهيألنا .. دخلت هبه اوضتها كانت من جواها متضايقه جدا بس مش عاوزه تبين قدام مامتها عشان الموضوع ما يخلصش قبل ما يبتدي وقالت انها تتكلم مع اسامه وتشوف ايه اللي حصل دد مسكت تليفونها و اتصلت ب اسامه

اسامه : ازيك يا هبه وصلتي البيت

هبه : ايوه وصلت الحمد لله انا بس عاوزه اسالك على حاجه يا اسامه انت لما جيت عندنا ودخلت بيتنا اهلي عاملوك ازاي حد منهم كشر في وشك او ما سلمش عليك

اسامه : لا طبعا انتي عيلتك ناس محترمين وانا بحترمهم ما فيش حد خالص ضايقني ليه بتقولي الكلام ده

هبه : اصل مامتك اول ما دخلت ما سلمتش عليا مع اني كنت رايحه عشان اسلم عليها وبعدين قاعده طول ما هي قاعده متضايقه ومش عاوزه تتكلم ولما ماما اتكلمت راحت مزعقه جامد واحنا كنا في بيتكم هو ده اسلوب انها تتكلم مع ماما بيه ..

اسامه : على فكره يا هبه ماما طيبه جدا بس مندفعه في الكلام لما تعرفيها هتحبيها جدا ..

هبه : انا والله من كلامها قلت انها شايفه لك حد ثاني ولا حاجه وقلت اكلمك اسالك على الموضوع ده عشان انا مش عاوزه ابدا حياتي بمشاكل من اولها ..

اسامه : مشاكل ايه بس يا هبه انتي بتتوهمي بحاجات مش موجوده وبعدين ماما عمرها ما فرضت عليا اني اتجوز اي احد من عيلتنا وكلهم بعتبرهم اخواتي دي حتى فرحت جدا لما عرفت اني عاوز اخطب

هبه : طب تقدر تقول لي يا اسامه وما تفهمنيش غلط هي ما جتش معاك هنا ليه انت قلت لي انها تعبانه وانا شوفتها انها كويسه وما فيهاش اي حاجه

اسامه : انا فعلا كذبت عليكي في الموضوع ده بس ماما مش متعوده تروح عند حد ما تعرفهوش فهي استنيت لما انتوا تيجوا الاول وبعد كده هتبقى تجيلكم اكيد ما تفهمنيش غلط بس هو ده اسلوبها .. هبه لما سمعت الكلام ده بدا تقلق من مامته وشكت ان كلام مامتها هو اللي صح لكن ما رضيتش تنهي الموضوع وقالت تكمل للاخر و يمكن تطلع ظالمه مامت اسامه وهو ده فعلا هو اسلوبها

هبه : على العموم يا اسامه ان شاء الله هنبقى نقا**ها ثاني كثير وهعرف فعلا لوكان ده اسلوبها ولا هي مش متقبلاني من دلوقتي يا اسامه لو هي مش متقبله الجوازه دي يا ريت تقول لي عشان مرجعش اندم بعد كده

اسامه : شيلي الاوهام من دماغك ما فيش اي حاجه من اللي انتي فاكراها دي خالص انا هاقفل معاكي دلوقتي وهرجع اكلمك ثاني .. قفل اسامه مع هبه وهي قاعده تفكر جات لها رساله غريبه على التليفون

يتبع