الجزء العشرون

1316 Words

شريف زق الباب بالراحة و دخل و هو متوتر و قلقان لا يلاقي أوصاف أو بسام في وشه ساعتها هيقول لهم ايه .. فضل ماشي على أطراف صوابعه و بيحاول يبعد عن اي حاجة ممكن يخبط فيها عشان ميطلعش صوت لغاية ما وصل قدام باب الاوضة و قبل ما يفتحه لاقى الباب بيتفتح لوحده .. بس المرة دي فيه حد فتح الباب بس كان واقف وراه و مش باين غير خياله من الباب .. شريف خايف يدخل هو مش عارف ده خيال مين .. و حاول يرجع خطوة ل ورا بس حد زقه جامد عشان يدخل الاوضة و الباب اتقفل على طول بس ملاقاش حد .. وقف شريف في نص الاوضة و بيبص حواليه شريف ب صوت واطي جدا : و بعدين يعني .. هفضل واقف مش فاهم حاجة كده كتير ؟ مفيش رد و مفيش حد ظهر ل شريف .. فضل يتمشى في الاوضة و يشوف كل حاجة فيها و يمسكها و يركز فيها و يسأل نفسه الراجل ده كان بيعمل ايه ب الحاجات دي .. لغاية ما عينيه وصلت ل صورة جد بسام .. هي صورة بني ادم طبيعي زيه زيينا .. بس نظرته و تكشيرته و كل تفصيلة في شكله محسسة شريف ب الخوف .. شريف بيوجه كلامه للصورة : ما انت لازم تكون ورا كل اللي بيحصل ب شكلك ده .. زمانك بتولع في نار جهنم دلوقتي .. مش خسارة فيك .. انت سبب كل البلاوي دي يا اخي مش عارف ادعي عليك ب ايه اكتر من اللي بيحصل فيك دلوقتي .. كانت فيه حاجة بتمنع شريف أنه يذكر اسم ربنا في كل كلمة بتتقال .. بيبقى عايز يوكل أمره لله و يقول حسبي الله و نعم الوكيل في اللي كانوا سبب اذيته لكن مبيقدرش يقول كده .. كأن الكلمة بتتمسح من دماغه و مش بيفتكرها .. ف بيلاقي كلامه بقى بيتلخص في أنه يتمنى للي بيأذيه نار جهنم و العذاب .. كلها حاجات بعيد عن ربنا .. الجن بقى واقف يضحك على شريف اللي بقى بيستبعد في كلامه ذكر الله و كان مبسوط و شمتان و حاسس أنه فعلا قدر يستولى على شريف و على عقله و دينه و معتقداته .. شريف كان سامع الضحكة و بص حواليه عشان يشوف مين اللي بيضحك كده لكن مكنش شايف حد ولا عارف سبب الضحكة دي ايه .. رجع بص للصورة تاني لاقى الجن هو اللي في الصورة و هو اللي بيضحك .. اتخض شريف و من خضته رجع ل ورا بسرعة عشان يتكعبل و يقع وصوت هبدته على الأرض كان عالي و واضح أن أوصاف تسمعه من اوضتها .. قامت أوصاف راحت على اوضة بسام اللي لاقته نايم و رايح في سابع نومة و مش حاسس ب الدنيا .. لفت وشها ناحية اوضة جوزها و حست أن فيه حد فيها .. راحت على الاوضة و هي بتتسحب و بتفتح الباب و دخلت لكن مش لاقيه أن فيه حاجة في الاوضة تقول أن حد موجود فيها .. كل حاجة في مكانها و طبيعية و النور مطفي مفيش حاجة .. لكن هي كانت حاسة بوجودهم فيها .. و عشان دي حاجة هي متعودة عليها طلعت تاني و قفلت الباب وراها و رجعت اوضتها و نامت شريف بقى متفاجئ أنها دخلت الاوضة و هو فيها و واقع قدامها على الأرض و الشمع اللي منور الاوضة .. كل ده هي تجاهلته و خرجت من الاوضة ازاي و كانت بتتعامل و كأنها مش شايفة حاجة .. عشان شريف يلاقي الجني واقف قدامه و بيقوله متقلقش هي مشافتش حاجة شريف : و طالما خليتها متشوفش حاجة ليه سمعتها صوت الوقعة و خليتها تيجي لغاية الاوضة و تدخل و انا فيها و تنشف دمي الجني : مكنتش اعرف انك هتتخض كده لما تشوفني .. المفروض انك اتأقلمت على ظهوري ليك في اي لحظة و في اي مكان شريف بيقوم من على الأرض و بيغير الكلام : اديني جيت اهو .. ايه المطلوب مني ؟ الجني : المطلوب ده مش انا اللي هبلغك بيه المرة دي شريف ب استغراب : اومال مين اللي هيبلغني ؟! الجني : هتعرف .. كلها ثواني شريف : مش فاهم ايه لازمتها يعني اللفة دي كلها .. ما تعرفني و خلاص الجني بقى متدايق من استهتار و استخفاف شريف معاه في الكلام : انا بنفذ اللي بتأمر بيه و بس .. و ياريت تبطل كلام و أسئلة شوية شريف : سكت .. اديني مستني الجني فجأة غمض عينيه و بدأ يتكلم : احضر .. وصل رسالتك و انصرف .. فتح عينيه و هو مركز على الشخص اللي ظهر و قاعد على الكرسي اللي ورا شريف .. شريف بقى باصص للجني و نظرته و مستغرب من تركيزه في مكان معين ..عشان يبص شريف وراه يلاقي الشخص اللي كان الجني بيأمره ب الحضور و بقى قاعد قدام عينيه فجأة يكون عم ناجي حارس العمارة .. شريف واقف مصدوم شريف : ازاي ؟ الجني : من غير ازاي شريف : يعني ايه من غير ازاي .. ايه اللي وصل عم ناجي ل هنا ؟ الجني : ما انت بتكرهني ف اكيد مش هتحب اني كمان اديلك أوامر عشان تنفذها .. ف قررنا نجيبلك حد انت بتحبوا يمكن ده يقنعك ب اللي مطلوب شريف : عشان يقنعني ولا عشان تهددوني بيه ؟ الجني : في الحالتين هتنفذ اللي هيتقال .. بس احنا شايفين أن كده احسن .. و متقلقش مش شرط أن ناجي هو اللي يجيلك كل مرة شريف : مش عايز حد تاني .. و ياريت بعد كده انت اللي توصل لي المطلوب و انا هنفذه الجني : هنشوف شريف : عم ناجي مش هيجراله حاجة صح ؟ الجني : هنشوف شريف : طب ازاي هو اللي هيبلغني .. هو مش المفروض أنه في المستشفى و داخل في غيبوبة الجني ب جدية : ده سؤال تسأله ل أكبر جني في العالم السفلي شريف : طيب .. ياريت تخليه يبلغني ب المطلوب عشان ترجعه من مكان ما جيبته انا مش عايزه يفضل موجود هنا كتير الجني بيوجه كلامه ل ناجي : وصل رسالتك و انصرف عم ناجي بمجرد ما سمع الجملة نظرته اتغيرت و عينيه اتقلبت و صوته اتحول ل صوت غريب و وحش جدا و كأن اللي بيتكلم شيطان .. شريف بقى باصص له ب خوف .. خوف منه و خوف عليه في نفس الوقت و زعلان أن هو كان السبب أنه يوصل الراجل الطيب ده ل كل اللي هو فيه دلوقتي عم ناجي : المقبرة .. محدش يقدر يفتحها غيرك .. و اختفى عم ناجي من قدامهم شريف : مقبرة ايه ! الجني : مقبرة الكنز .. المقبرة اللي أوصاف و جوزها بيحاربوا بقالهم سنين و بيعملوا كل اللي يقدروا عليه عشان يفتحوها لكن للاسف مش المطلوبين شريف : افهم من كده أن أنا اللي مطلوب الجني : إجابة سؤالك هتلاقيها ف كلام عم ناجي شريف : طب هي فين المقبرة دي و هفتحها أمتى و ازاي الجني : بص تحت رجلك شريف بص شاف السجادة اللي في الاوضة اللي مرسوم عليها ذئب شكله ب*ع شريف : و بعدين ؟ الجني : تحت رجلك .. المقبرة تحت رجلك شريف : تحت رجلي ! يعني هي هنا .. في شقة أوصاف و جوا اوضة جوزها و معرفوش يفتحوها الجني : مش معنى قربك من الحاجة انك تقدر تمتلكها شريف : طب هو المفروض أن انا افتح المقبرة دي دلوقتي يعني ؟ الجني : استحالة .. انا بقولك مقبرة كنز .. هتتفتح دلوقتي ازاي .. احنا هنبدأ طقوس فتحها من دلوقتي شريف : و طقوس فتحها دي هتكون عبارة عن ايه ؟ الجني : شيل كل الحاجات اللي حوالينا دي على جنب و خلي الأرض فاضيه خالص شريف مردش لكن بدأ يشيل كل الحاجات زي ما اتطلب منه و فضى الأرض تماما .. و شال السجادة .. و بدأ الجني يقرأ تعاويذ و طلاسم مش مفهومة ل شريف لكن كانت بتأثر عليه جسديا و كان حاسس ان فيه مية حد ماسكه و مكتفه و بيشوك جسمه كله لغاية ما غاب شريف عن وعيه و وقع على الأرض لكن مفضلش ثابت مكانه .. فضل شريف يتقلب و هو مش حاسس ب اي حاجة لغاية ما وقف مرة واحدة و كانت عينيه مقلوبة و بدأ يقول كلام ب لغة غريبة لكن الجني كان فاهمها .. و وقتها عرف الجني ان المكان اللي شريف وقف فيه ده هو نقطة بداية الحفر للمقبرة ..

Free reading for new users

Scan code to download app

App Store Google Play

Facebookexpand_more