صندوق الموت

الجزء السادس عشر

شريف : انت عايز مني ايه انا مش هقدر اعمل اي حاجة تطلب مني .. انا مش كده .. انا معرفش اللي انت عايزه بالظبط بس اكيد عارف انت ايه و اللي زيك مش هييجي ليا من وراه غير المصايب و البعد عن حياتي و ديني كمان و انا مش عايز ده .. انا بمجرد ما اذكر الله قدامك دلوقتي انت هتبقى زيك زي اي حاجة مالهاش معنى .. هتكون ضعيف و مش هتقدر تعمل حاجة مهما حاولت .. بس انا معملتش كده و مش عايز اعمل مش عارف ليه .. بس انا في ايدي اني ااذيك و مش بأذيك في نفس الوقت ليه انت م**م تأذيني و تدمر لي حياتي

الجن : تفتكر كده ايه اللي مخليك مش عارف تعمل الحاجة اللي ممكن تأذيني زي ما بتقول و كمان مخلياك مش عايز .. يعني اللي هو مش هتأذيني لانك مجبر و مضطر .. لأ ده انت مش عااايز تأذيني يعني دي إرادتك انت .. تفتكر ايه السبب

شريف : قولتلك مش عارف و مش عايز حتى اعرف انا عايزك تبعد عني و انا والله هنسى كل اللي حصل ده و كأنه محصلش من الأساس

الجن : انت ليه بتتعامل و بتتكلم و كأن اللي انت بتقوله ده بمزاجك انت .. انت نسيت انك عبد ليه هو و ل اي حد من جنسنا

شريف : عبد ل مين بالظبط

الجن : "قلعة الشيطان" .. فاكرها ؟

شريف ب تذكر : اه دي القلعة اللي المفروض تكون ملكي في اللعبة الملعونة دي

الجن : لكن هي أساسها يرجع لمين .. ركز في اسمها كده

شريف : الشيطان !

الجن : أساس اي حاجة في عالمنا ده بترجع ليه هو و بس

شريف : و انت تبقى مين

الجن : انا من اتباعه انا عبد ليه زيي زيك و ليا الشرف لكن الفرق بيني و بينك كبير جدا .. انا على علم و معرفة ب كل تفصيلة في عالمنا ده .. و عندي قدرات انت عمرك ما تتخيل مدى قوتها و تأثيرها على اي حد و اي حاجة .. انت عمرك ما تتخيل ايه هي القدرات دي اصلا .. لكن للاسف رغم السلطان و كل القوة اللي بمتلكها لكن انا مش قادر اعرف ايه هو المميز اللي فيك اللي مخليه يختارك انت بالذات .. ليه مختارش اي حد تاني غيرك أو حد من اصحابك أو حتى كان اختاركوا كلكوا و خلاكوا من عبيده .. ده حتى بسام رغم أن هو اللي وصلك لينا لكن ده مالوش لازمة بالنسباله .. بسام بالنسباله مش اكتر من أداة هو استخدمها عشان يوصل ل مراده و اللي هو يبقى انت

شريف زي الغريق اللي بيحاول يتمسك ب اي قشاية .. و الغيرة اللي حسها من كلام الجن و طريقته عن الحاجة المميزة اللي خلت الشيطان يختاره هو ب الاخص دوناً عن اي حد تاني .. دي كانت بالنسباله القشاية اللي هيتعلق فيها و قرر أنه يعمل الحاجة اللي مفيش حد ممكن يتخيل أنه يعملها ولا حتى الشيطان نفسه .. و هو أنه يوسوس ل جن من أتباع الشيطان و اللي هو في الأساس جاي عشان يوسوس ل شريف و يقنعه يكون واحد منهم ..

شريف : طب مش خايف أن الحاجة المميزة اللي بتتكلم عنها دي تكون هي نفسها الحاجة اللي تقربني ليه و توصلني لمكانة انت اللي المفروض تكون فيها ..ده انت حتى رغم كل قوتك و قدراتك اللي بتقول عليها مش قادر تعرف ايه هي الميزة دي .. ب الكلام اللي انت قولته ده انا كده هكون بالنسبالك انت و اللي زيك عبارة عن كتاب مقفول محدش فيكوا هيقدر يعرف اي حاجة عني و عن القوة و القدرات اللي هكتسبها و اللي هي عندي اكيد ب الفعل و هما اللي خلوك واقف هنا دلوقتي عشان تحاول تقنعني ب اللي انتوا عايزينه و كمان لو مقتنعتش هتخلوني اعمل كده ب الغصب .. يعني اكيد الحاجة اللي موجودة فيا ده مميزة جدا و استحالة تكون موجودة عند غيري و الا كان زمانكوا لاقيتوا بديلي بدل كل اللي بيحصل ده .. اقلها اصحابي مثلا .. انت ذاتك قولت رغم أن بسام هو اللي وصلكوا ليا لكن هو بيعتبره مسخ و مالوش لازمة .. انا حاليا مش طمعان و مش عايز اكون في مكان تاني غير هنا و مش محتاج اكتر من شغلي و صحابي و اهلي و حياتي الطبيعية .. لكن بصراحة أنا مقدرش اوعدك اني لو دخلت العالم اللي انت بتقول عليه ده اني مطمعش في حاجات كتير و ممكن يكون أهمها الحاجة اللي انت عايزها و بتتمنى تمتلكها كمان ساعتها هتلاقي اللي بيحاربك و يكون لك عقبة في طريقك للي عايز توصل له .. ولا انت ايه رأيك

الجن ب ضحكة كلها شر و صوت عالي جدا لدرجة أن شريف حس ان مامته و باباه اكيد سمعوها : انت فعلا فيك حاجة مميزة .. و بتميزك عن اي حد كان بيبعتني ليه عشان اجنده للعالم بتاعنا .. عارف ايه هي يا شريف

شريف ب استغراب و فضول : ايه هي ؟؟!

الجن : أني ب الرغم أن أنا اللي جايلك عشان اوسوسلك و اخليك تعمل الحاجة اللي بطلبها منك .. انت اللي بتوسوسلي و كمان بتحاول تقنعني اني ابعد عنك ب منتهى الذكاء .. براڤو يا شريف .. دي اكتر حاجة اثبتتلي أن انت مكانك المناسب هيكون ما بينا احنا .. اتغلبت على خوفك و عرفت ازاي تستجمع قوتك و شجاعتك في انك تقف قدام اقوى جني في العالم السفلي و تتكلم معاه و تخوفه منك

شريف : طب طالما عرفت اخوفك زي ما بتقول يبقى ده معناه انك اقتنعت ب كلامي

الجني : اكيد طبعا .. بس احنا معندناش حد بياخد مكان حد يا شريف .. احنا هناك كل واحد فينا بيكون عارف مكانه فين و ايه هي وظيفته .. متقلقش عليا .. احنا اخر جنس من الأجناس اللي موجودين في كل العوالم الخفية و المرأية اللي ممكن يتخاف عليهم

شريف ب بيدور على تليفونه : طالما مفيش فايدة كده يبقى انا عرفت انا هعمل ايه

الجني واقف بيتف*ج عليه و هو عارف شريف عايز يعمل ايه و بيضحك عليه

شريف وصل ل تليفونه و بدأ يدور على السور و الآيات القرأنية اللي بيستخدموها في صرف الجن و العفاريت .. و اول ما وصل ل سورة يسن و لسه هيشغلها و يقرا معاها فجأة بدأ يترعش و يجيله تشنجات و جسمه كله بقى بيتكهرب و كأن حد موصله ب سلك كهربا عريان و التليفون وقع من أيديه ات**ر .. هو حاسس ب كل حاجة بتحصل و شايف كل نظرة للجني و هو مبسوط ب شكله و حالته و ضحكة الشر و الانتصار باينه عليه لكن كل عضلة في جسمه مشلولة و مش قادر يعمل حاجة حتى أحباله الصوتية كأنها اتقطعت كلها و مبقاش عارف يطلع اي صوت حتى لو مش مسموع .. فضل شريف على الحال ده وقت كبير حس ان قعد في الحالة دي ساعات طويلة جدا من كتر الالم اللي حس بيه و لما الجن قرر يوقف اللي بيعمله .. رفع شريف من على الأرض و كأنه و ماسكه من رقبته رغم أنه ملمسش شريف من الاساس و بدأ يتكلم معاه

الجن : متحاولش يا شريف .. محاولاتك كلها محكوم عليها ب الفشل صدقني .. انت فاكر انك لسه شريف الطبيعي اللي بيروح و ييجي و يشتغل و يعمل كل حاجة اي بني ادم طبيعي بيعملها .. ده مش حقيقي .. عارف ليه .. لانك انت ذاتك مبقيتش بني ادم طبيعي زي ما كنت .. انت بقيت واحد مننا .. يمكن عقلك مش قادر يستوعب ده و عشان كده انت لسه فاكر انك تقدر تتخلص مننا .. لكن احب افهمك انك دخلت و مش هتخرج تاني .. احنا مش بنلعب زي ما انت فاهم .. اللعبة دي هي الحاجة الوحيدة اللي كنا عارفين انها هتوصلنا ليك ب سهولة مش اكتر و من بعدها كانت الوسيلة الاكتر سهولة هما اصحابك .. متحلمش يا شريف انت حياتك اتغيرت .. و انت نفسك اتغيرت ..

و نزل شريف على الأرض تاني بعد ما الجن حدفه ب كل قوته في الحيطة عشان ينزل على ضهره و هو مش قادر ياخد نفسه .. لكن كان بيقاوم و بيحاول يقوم عشان عنده سؤال عايز يعرف إجابته .. قام شريف و هو بيحاول يسند على الهوا و على اي حاجة ممكن تيجي تحت أيديه عشان يسند عليه و يقوم يقف .. فضل يحاول لغاية ما وقف على رجليه و اخد نفسه ب صعوبة و بدأ يتكلم

شريف : صحابي .. صحابي فين .. انا عايز اعرف ايه اللي حصل لهم بالظبط .. ازاي يكون كل ده حصل مع امين و في الاخر الاقي حسام هو اللي نايم مكانه في المستشفى .. طب ازاي ارجع العربية الاقي حسام فيها ؟؟