صندوق الموت

الجزء الثاني عشر

حسام بياخد شريف من أيديه عشان يجروا على المستشفى عشان يلاقي شريف بيبعد عنه و واقف مكانه

حسام : ياللا يا شريف مش وقت صدامات

شريف : كلم بسام

حسام و هو بيشد شريف من ايديه تاني : و ده وقته انت كمان .. بسرعة يابني خلينا نروح لهم الله يرضى عنك

شريف مهتمش ب كلام حسام و طلع تليفونه و اتصل ب بسام .. جرس و مفيش رد .. اتصل تاني ..

حسام واقف باصصله ز هيتجن من بروده و قال له : لو مش هتمشي معايا انا هروح لوحدي و هسيبك امين بيموت و انت ماسكلي تليفونك .. مش وقت اي حاجة يا شريف ابوس ايدك ياللا

شريف مش باصص ل حسام اصلا و كرر الاتصال اربع مرات و مفيش رد في الخامسة بسام اخير رد عليه

شريف : انا هاجيلك بلليل انا و حسام في الميعاد اللي انت عايزه و هنعملك كل حاجة تطلبها بس امين لأ يا بسام سامعني .. امين لأ .. متحاولش تأذي اي حد فينا اصلا و حاول تفتكر الصحوبية و العشرة قبل ما تعمل اي حاجة تخليك تخسرنا و تخسر نفسك انت كمان .. و قفل

شريف كان بيتكلم ب اندفاع و عصبية و صوت عالي سمع الناس كلها .. حسام واقف بيبصله ب استغراب و في نفس الوقت عينيه على الناس اللي رايحة و جاية و بتتف*ج عليهم .. لكن شريف كان في دنيا تانية مش شايف حاجة و مش بيفكر غير في صاحبه

أوصاف : مش قولتلك أنه مش هيستحمل حاجة على اي حد فيهم و عشان خاطرهم هيعمل اللي هيتطلب منه

بسام : كان بيتكلم بعصبية و خوف حسيت بيه في كل حرف بينطقه

أوصاف : عشان كده امين و حسام لازم ميتأذوش لغاية ما نوصل للي احنا عايزينه .. دول نقطة ضعفه اللي هنعرف تستغلها ضده و نخليه ينفذ اللي هيتقال له من غير مناقشه و كلام كتير

بسام ب نظرته اللي كلها شر و غل : و لسه هيشوف اكتر

عند شريف و بسام بمجرد ما المكالمة خلصت

شريف : اتصل ب نهلة

حسام : مش هتصل ب حد انا عايز اروح المستشفى دلوقتي هتيجي ولا لأ

شريف ب عصبية : بقولك اتصل ب نهلة يا حسام

حسام بيبص ل شريف ب غيظ و استفزاز و بيطلع تليفونه و يتصل ب مراته و خلال ما التليفون بيرن كان حسام بيسأل شريف : انت عايزني اكلمها ليه اصلا

شريف : اول ما ترد اسألها على امين

نهلة ردت : حسام .. كنت لسه هكلمك .. الدكاترة لاحقوا امين و هو كويس دلوقتي و بيقولوا حالته استقرت

حسام ب فرحة : يعني فاق من الغيبوبة ؟

نهلة : للاسف لسه لكن الدكاترة طمنونا على وضعه الحمد لله .. كنا فين و بقينا فين

حسام ب **رة نفس : الحمد لله على كل حال

نهلة : انت مش جاي انت و شريف ولا ايه ؟ انت فين اصلا

حسام : جايين يا نهلة في الطريق بس السكة واقفة قولت اكلمك اتطمن لغاية ما نوصل

نهلة : ماشي خلي بالك من نفسك

حسام : ربنا يستر .. سلام .. و قفل .. و طبعا بص ل شريف ب زعل و عدم فهم في نفس الوقت اللي هو ليه و ايه اللي خلاك تعمل كده

شريف فهم نظرة صاحبه طبعا بس سأله الاول : امين كويس ؟

حسام : اه .. لسه مافقش من الغيبوبة لكن الدكاترة قالوا إن حالته مستقرة الحمد لله

شريف : الحمد لله .. تعالى بقى نقعد في القهوة اللي هناك دي

حسام : انت هتشلني .. قهوة ايه و نيلة ايه اللي نقعد عليها .. ده بدل ما تطير على صاحبك تطمن عليه

شريف : تعالى نقعد في القهوة عشان اجاوب على الكام سؤال اللي بيدوروا في دماغك الاول و بعدين نروح ل امين

حسام بنفاذ صبر : طيب

وصلوا القهوة اللي على اول الشارع اللي فيه بيت جدة بسام .. و قعدوا و بدأ حسام كلام

حسام : اتفضل بقى فهمني

شريف : انت بجد مفهمتش !

حسام : بقولك ايه انت قولتلي عايزنا نقعد عشان تفهمني مش عشان ترد على سؤالي ب سؤال .. تمام

شريف : ماشي يا عم .. دلوقتي احنا اي مصيبة حصلت لنا لغاية دلوقتي سببها ايه و سببها مين

حسام : سببها بسام و الصندوق المنيل بتاع جده ده

شريف : و كل التوتر اللي احنا عايشينه ده مبدأش يحصل غير بعد ما قفلت اللعبة و فهمت بسام أن اللي اتعمل ده مش هيتكرر تاني .. و هو استحلف لا يخلينا نرجع له تاني و احنا اللي نطلب كمان اننا نكمل المخروبة دي صح ؟

حسام : أيوة

شريف : ما هو ده معناه أن هو بيحاول يعمل لنا المشاكل دي كلها عشان منلاقيش حل قدامنا غير اننا نرجع نكلمه تاني و نخليه يطلعنا من اللي الوحلة اللي احنا فيها .. و فعلا ده اللي حصل .. ادينا رحنا لغاية عنده ب رجلينا و وافقنا على اللي طالبه مننا .. و لما كلمك و قالك أن الاتفاق اتغير و المقابلة هتكون في بيت جدته و انا رفضت لاقينا نهلة بتتصل تبلغنا أن امين بيموت و بمجرد ما انا كلمته و قولتله موافق و انت رجعت كلمت نهلة لاقيتها بتقولك أن امين بقى تمام و وضعه اتحسن .. اكيد دي مش صدفة يعني و اكيد كل اللي بيحصل ده بسام و الست اللي قابلناها فوق دي هما اللي وراه

حسام : عندك حق انا بس تفكيري اتشل ب مجرد ما سمعت اللي نهلة قالته مجاش في بالي اي حاجة غير اني اطلع اجري على المستشفى و الحق أودع صاحب عمري اللي بيموت .. بعد الشر عنه بقى .. بس انت شايف ايه الصح

شريف : اننا نقبل ب اللي هيتطلب مننا لغاية ما نلاقي حل تاني .. انا معنديش استعداد حد فينا يحصل له حاجة يا حسام انتوا اخواتي و انا ماليش غيركوا و مش هقدر اخسر حد منكم .. كفاية عليا خسرتي ل سالي .. انتوا اللي باقيين لي من بعدها يا عم .. انا لو متأكد أن محدش ممكن يتضرر من الليلة دي كلها غيري انا بس والله ولا كان فرق معايا اي حاجة و كنت فضلت عند قراري و اني مش هلجأ ل بسام تاني ولا كنت هفكر اكمل اللعبة الملعونة دي من الأساس .. بس للاسف انتوا كمان محطوطين معايا في وش المدفع و انا مش هقبل ليكوا الأذى

حسام : ربنا يخلينا ل بعض و يديم المحبة و يبعد عننا الشر و امين يقوم بالسلامة و نتطمن عليه .. و يهدي بسام قبل ما يخسر نفسه

شريف : يارب يا صاحبي .. ياللا بينا بقى نطلع على المستشفى عشان نكون عند التاني ده الساعة 11 زي ما قال

حسام : ماشي