الجزء السادس

1533 Words

ولع بسام كل الشمع اللي في الاوضة و قعد على الأرض في نص الاوضة و حط الصندوق قدامه و فتحه .. كان فيه برواز في الحيطة اللي قاعد قدامها كان فيه صورة جده .. بسام ركز مع الصورة و عيون جده .. كان حاسس أنه هينطق بس رجع بص للصندوق تاني و مد ايديه جواه عشان يسحب بطاقة و تطلع بطاقة القزم اللي ظهرتله لما بدأوا اللعبة .. دقق في ملامح القزم اوي و هو ق*فان من شكله اوي و رجع بص لصورة جده تاني عشان يبدأ يحس أن الصورة نفسها بتتحرك و فيها حاجة غريبة و كأن حد بيحاول يخرج منها جاله احساس بالخوف و غمض عينيه و بدأ يسمع صوت خطوات بتقرب ناحيته .. قلق لا تكون جدته صحيت و شافت ضوء الشمع في الاوضة داخلتله عشان يفتح عينيه يلاقي فيه كائن غريب بيقرب ناحيته شكله و ملامحه مكنوش واضحين اوي اول ما بسام فتح عينيه و ضوء الشمع عشان كان بيتهز ف مكنش مبين اوي رغم أن مفيش هوا داخل الاوضة ولا منفس عشان يهز الشمع .. شهق بسام شهقة خفيفة كده من الخضة و رجع بجسمه ل ورا و احنا و قاعد على الارض و برضه الكائن ده عمال يقرب منه لغاية ما بقى واضح قدامه و لاقاه هو هو القزم اللي في البطاقة ب شكله المق*ف قام بسام من على الأرض و هو بيحاول يجري لكن بقى عمال يتكعبل و مش عارف يقف على رجله و فجأة القزم ده صرخ صرخة عالية جدا بنبرة غضب .. كان شعره اسود مجعد و عنده طويلة و عينيه جاحظه اوي و لونها اخضر و مليانه وخطوط حمرا و شكلها وحش اوي و كان عمال يبص بيها لكل مكان في الاوضة و عشان يرجع يبحلق في بسام تاني اللي خوفه اللي كان باين عليه مساه تقريبا حالته الغريبة اللي ظهرت عليه بعد ما بدأ اللعبة و الكره و الشر اللي كان بيستحلف بيه ل أصحابه .. بص القزم ل بسام و بدأ يصرخ ب صوت تخين و عالي و قال " انا حر !! " قرب من بسام و لف ايديه حوالين راقبته و بدأ يكلمه و هو بيبرقله : الغل اللي جواك هينهي حياتك " هتتدمر " و سابه و بدأ يمشي ناحية الحيطة بسام بيحاول يبلع ريقه و يقوله استنى عشان يلاقيه اختفى من قدامه فضل متنح للحظة و متفاجئ و مخضوض و خايف و مرة واحدة استجمع قوته و جرى ناحية الصندوق و فضاه و بدأ يدور في البطاقات على بطاقة القزم اللي كانت في ايديه ملاقاهاش دور في الأرض و قال ممكن تكون وقعت منه لما قام يجري لكن ملاقلهاش اثر و فجأة الشمع اتطفى و الاوضة بقت ضلمة كحل و مش شايف منها حاجة غير صورة جده عشان يلاقي شفايف جده في الصورة بتتحرك ب كلام و كأنه عايز يوصله رسالة بس مكنش طالع صوت لحد ما شاف خيال جدته ورا باب الاوضة فضلت واقفة وكأنها بتتصنت عشان تسمع صوت جوا بس مسمعتش حاجة مشيت من قدام الاوضة و سمعها بسام بتخبط على باب الحمام جدته : بسام انت جوا ؟ فجأة بسام يسمع صوته طالع من الحمام و بيرد على جدته الصوت اللي طالع من الحمام : أيوة ثواني و طالع جدته : لا يا حبيبي براحتك انا كنت بتطمن عليك عشان ملاقيتكش في اوضتك .. انا داخله انام و لو فضلت صاحي لادان الفجر ابقى صحيني الصوت : حاضر بسام كل ده قاعد في اوضة جده و سامع الحوار اللي داير بين جدته و الصوت اللي طالع من الحمام على أساس أنه هو و مش عارف مين ده و ازاي .. طب ده حرامي .. حرامي ايه و جه منين و بيعمل ايه في الحمام .. أتأكد بسام أن جدته دخلت اوضتها و فتح الباب بالراحة خالص و راح ناحية الحمام بقى ماسك اوكرة الباب و متردد يفتح و يشوف مين اللي جوا ده ولا يعمل ايه .. عشان يلاقي الاوكرة تحت أيديه بتتحرك و كأن حد من جوا هو اللي بيفتح الباب اتسرع بسام و سابها و بعد عن الباب و بقى واقف مركز مع الاوكرة و هي عمالة تتحرك و كأن حد بيحاول يفتح و مش عارف .. و مرة واحدة الباب اتفتح و بدأ يظهر اللي ورا الباب عشان اول ما بسام يشوفه يقع من طوله و يغم عليه .. على القهوة شريف و حسام و امين بيلعبوا طاولة و بيتكلموا في مواقفهم القديمة و بيضحكوا ضحك مصطنع يغطي على خوفهم اللي حاسين بيه بس كل محاولاتهم دي بتوصل للفشل و بيفتكروا اللي حصل و بينعزلوا عن العالم اللي حواليهم في اقل من دقيقة امين : تفتكروا الصح اننا نكلم بسام و نقا**ه ؟! حسام : و بعد ما نكلمه و نقا**ه ! تفتكر فيه حاجة هتتغير ؟ تفتكر لو روحناله مش هنغرز في المصيبة دي اكتر ؟ انا مبقيتش خايف من اللعبة و اللي حصل بسببها قد ما بقيت خايف من بسام نفسه يا امين شريف ب ثبات : بس انا حاسس إن احنا هنحتاج ل بسام حسام : نععم ؟!! امين ب استغراب من موقف شريف : يعني انت اخر واحد فينا كنت أتوقع أنه يقول كده بصراحة و كنت متأكد انك انت اللي هتعارضني في اللي انا قولته !! ايه اللي خلاك تغير رأيك و كلامك و تقول كده ؟ شريف : لو اللي حصل معايا و انا سايق ده حصل تاني ل حد فيكوا لو ليكوا انتوا الاتنين يبقى ساعتها الموضوع مش هيبقى تهيؤات و لو هيحصلنا اكتر من اللي شوفناه النهارده يبقى احنا كده هنحتاج نقعد مع بسام و نفهم هنطلع من البلوة اللي حطينا فيها نفسنا دي ازاي حسام : و انت شايف أن مش هيبقى فيه حل تاني غير أن احنا نروح ل بسام ؟! شريف : و اومال هنعمل ايه ساعتها ؟! قولي بقى نروح ل دكتور نفساني ولا نجيب ل شيخ الشقة يروشلنا فيها ماية مقري عليها زي الافلام و المسلسلات امين : من غير ما حد يتريق على اللي هقوله .. بس ايه المشكلة أن احنا نعمل كده لو رحنا ل دكتور نفساني يحاول يفهمنا على اللي حصل ده ليه و ايه أسبابه العلمية و بالنسبة برضه ل حوارات الشيوخ دي فيه ناس كتير بتصدق فيها و بتعملها و ممكن تكون الحل للي احنا عايشين فيه ده شريف : هتروح تقول ايه للدكتور النفساني اللي هيكلمك بالعقل و بالعلم اللي درسه ده هتقوله كنا بنلعب ب شوية صور و فجأة لاقينا الصور دي بتتحول ل واقع ولا هتقوله صاحب عمرنا انكشف عنه الحجاب و عرف ايه اللي مكتوب في الورقة اللي اتبعتتلنا و هو اصلا مكنش قاعد جنبنا ولا باصص ناحيتنا حتى ولا هتقوله أن صاحبنا ده اتحول و بقى حد تاني غير اللي احنا نعرفه و معاشرينه بقالنا سنين و اتغير في اقل من ساعة و لما تحكيله اللي انا شوفته و انا سايق تفتكر هيشوفك و يشوفنا ازاي ؟! حسام : يا اما بنتعاطى حاجة يا اما شلة متخلفين مش لاقيين حاجة يعملوها ف بيعملوا مقالب في بعض يا اما مرضى نفسيين و بيجيلنا تهيؤات شريف : اسم الله عليك طب ما انت مركز اهو أومال ليه محسسني انك مش فاهم انا ليه بقول هنحتاج ل بسام حسام : لأ فاهم بس كان قصدي أن احنا ممكن نلجأ لحد تاني غير بسام و ممكن يكون عارف و فاهم اللي بيحصلنا ده اكتر من بسام امين : انت فيه حد معين في بالك يعني ؟! حسام : حاجة زي كده شريف : مين ؟ حسام : جدت بسام ! امين : بس بسام قال أن جدته متعرفش أنه دخل الاوضة دي اصلا .. احنا كده ممكن نعمل للواد مشكلة انت مشوفتش كان مرعوب ازاي و هو بيحكي عن جده و عن الاوضة و ازاي دخلها من ورا جدته يعني الست دي لو كان الحوار عادي بالنسبالها اكيد كانت هي اللي فتحت الاوضة دي من نفسها ونضفتها و خليتها جزء من الشقة كمان عشان ترضي فضول اللي حواليها خصوصا انها لو مكنتش تعرف عنها حاجة و كانت دخلتها بعد موت الراجل كانت هتلاقيها اوضة عادية زي اي اوضة زي ما بسام وصفها ف مش هتشغل بالها اوي كده ب أنها تفضل مفتوحة شريف : كلامك صح بس انا فيه حاجة مزولاني .. طالما الاوضة دي مهمة اوي كده و محدش بيقربلها ازاي بسام لاقى المفتاح بالسهولة دي زي ما قال ده كأن حد قاصد أن بسام يلاقي المفتاح عشان يفتح الاوضة و يدخلها .. بعد اللي بسام كان بيحكيه عن جده و علاقته بالاوضة مظنش أن الراجل ده كان سايب مفتاحها في مكان قريب من الايد اوي كده .. تفتكروا اللي انا بفكر فيه ده صح ولا غلط ؟! امين : وارد جدا اللي انت بتقوله ده بسام نفسه كان متفاجئ لما لاقى المفتاح بسهولة كده و في المكان ده حسام : طب لو كلامك صح يا شريف تفتكر مين اللي قاصد يحط مفتاح الاوضة في مكان قريب من بسام ؟ يكون جده مثلا حس أنه قرب يخلع ف حطه في المكان ده ؟! شريف : أو جدته مثلا ! امين : طب انتوا ليه شايفين أن حد حط المفتاح في المكان ده عشان بسام هو اللي يلاقيه .. ما هو بسام عنده اخوات تانيين و ممكن يكون اللي حط المفتاح في المكان ده قاصد أن حد تاني فيهم غير بسام هو اللي يلاقيه .. او ممكن يكون الراجل حاطه في المكان ده عشان مراته هي اللي تلاقيه و تاخده مثلا حسام : ما المفتاح ده لو كان محطوط ليها هي كان زمانها شالته .. اللي ساب المفتاح ده قاصد أن حد يلاقيه بس مظنش أنه يقصد حد من اخوات بسام دول كلهم بنات و اكيد هما أجبن من أنهم يدخلوا الاوضة دي بعدم علم جدتهم .. صدقني المقصود هو بسام ..

Free reading for new users

Scan code to download app

App Store Google Play

Facebookexpand_more