KABANATA 6
1282 Words
KABANATA 6
BLAKE
“Hindi ko talaga siya ma-contact,” sabi ko pagkababa ko ng hawak kong cellphone sa ibabaw ng mesa. Nasa canteen ako at kasama ko uli ang mga kaibigan ko habang nagme-merienda.
“Hindi talaga nakita ni Mia ‘yung address ni Tina?” tanong ni Tommy na kumakain ng sandwich.
Umiling ako. “Hindi.”
“May naisip akong ideya at involved ‘tong si Justin,” sabi ni Pete pagkatapos sumipsip ng softdrinks na nasa bote.
“Bakit ako kasali?” Ngumunguyang tanong ni Justin. May nakasabit pang pansit sa gilid ng labi niya.
“Kilala n’yo si Katarina?” tanong ni Pete.
Biglang nasamid si Justin kaya napatingin ako sa kanya. “Okay ka lang?”
Mabilis niyang tinungga ‘yung softdrinks. “Gago ka Pete, ano’ng naiisip mong gawin?” tanong niya pagkatapos uminom.
Wala pang sinasabi ni Pete pero nagpipigil na ng tawa si Tommy at hindi ko maintindihan kung bakit. “Hindi maka-relate si Blake. Ilang linggo ka kasi naming hindi nakasama, kaya hindi mo alam ‘yung tungkol kay Katarina.”
“Sino’ng Katarina?”
“’Yung student assistant sa registrar’s office na patay na patay dito kay Justin,” sagot ni Pete.
“Parang alam ko na ‘yung iniisip mo Pete. Gago ayoko. Ipapain n’yo ‘ko? Gago huwag gano’n.”
“Isang date lang naman, para sa address ni Tina,” sabi ni Pete.
“Gawin mo na para kay Blake,” pangungumbinsi pa ni Tommy.
“Justin, mag-request ka nang kahit ano, ibibigay ko.”
“Pare, ‘pag sinabi ni Blake ‘yan, totoo ‘yan,” sabi uli ni Tommy.
“Sana sa ‘kin na lang nagkagusto si Katarina,” parang naiinggit na sabi ni Pete.
“Kahit ano?” tanong naman ni Justin sa ‘kin.
“Oo, kahit ano.”
“Okay! One year supply ng Spam ‘tsaka Cheetos.”
“Deal!”
Biglang naibagsak ni Pete ‘yung mukha niya pasubsob sa table habang si Tommy naman natatawa. Inangat uli ni Pete ‘yung mukha niya at tiningnan si Justin. “Yon lang request mo? Pagkain pa rin? Hina mo. Sana kotse man lang o condo hiningi mo.”
Binatukan ni Justin si Pete. “Kaibigan ang tingin ko kay Blake, hindi sugar mommy.”
“Pero sino ba talaga si Katarina at bakit parang ayaw nitong si Justin?” usisa ko.
“Maganda si Katarina, sexy at mestisa. Na-meet namin sa bar noong huling gig namin. Crush nga namin ni Tommy, pero ito palang si Justin ang type.”
“Kakaiba siya. Sinasabi ko sa inyo. Ayoko mag-kwento, pero basta kakaiba siya.”
“Paanong kakaiba?” tanong ko.
“Basta!” ayaw talagang mag-kwento ni Justin.
“Pero wala nang bawian sa deal natin ha?”
“Para sa ‘yo Blake, sa Spam at sa Cheetos. Tuloy ang deal.”
Nagpunta kaming apat sa registrar’s office, pero kaming tatlo lang nina Pete at Tommy ang lumapit sa may window, at si Justin, tumayo nang medyo malayo sa ‘min.
“Hi Katarina,” nakangiting bungad nitong dalawa. Totoo nga ang sabi nila, maganda, at sexy si Katarina.
“Hi! Kayo lang?” Mukhang hinahanap niya si Justin. Lumapit pa siya sa may window at tumingin sa kaliwa't kanan.
“Nahihiya kasi si Justin lumapit,” sabi ni Pete. Usapan namin na siya na ang makikipag-usap kay Katarina kaya tahimik lang kami ni Tommy.
“Pakisabi hindi ko na siya kakagatin.” Nanlaki ‘yung mga mata namin sa sinabi niya. Kinagat niya si Justin? Ito ba ‘yung ibig sabihin ni Justin na kakaiba si Katarina? “Huwag na kamo siyang matakot sa ‘kin. Pakisabi rin na miss ko na siya.”
“Miss ka na rin niya. Nahihiya lang talaga siya.”
Napangiti siya. Halatang kinikilig. “Okay.”
“Uhm… Katarina, gusto mo bang maka-date si Justin? Kaya kong gawin ‘yon para sa ‘yo.”
“Talaga?!” Namilog ang mga mata niya sa tuwa. "Gusto ko 'yon! Paano?"
“Pero, may ire-request sana ako sa ‘yo.”
“Ano ‘yon? Kahit ano.”
“Ito kasing kaibigan namin na si Blake, gusto niyang malaman kung saan nakatira ‘yung ex-girlfriend niya. Ang alam lang kasi namin, ‘yung probinsya pero ‘yung buong address, hindi na. Baka naman pwede mong silipin d’yan sa computer mo.”
“’Yon lang? Easy.” Nag-type na siya agad sa keyboard ng computer. “Ano'ng buong name?”
“Cristina R. Javier,” sagot ko.
Nag-type siya uli at pagkatapos ay hinarap sa ‘min ‘yung monitor. “Ito ba?”
"Siya nga!” Makikita kasi sa screen ‘yung student information at picture ng estudyante. Nilabas ko ‘yung phone ko at kinunan ko ng picture ‘yung screen. “Thank you! Thank you so much!”
“Yung date ha?”
“Oo! Kaming bahala,” sagot ni Pete bago kami umalis.
“Justin, sabihin mo lang kung saang restaurant mo gusto kumain para sa date n’yo. Pati hotel sagot ko, kung may iba pa kayong gustong gawin, bahala kayo. Kotse? Gamitin mo kotse ko. Kahit ano’ng kailangan mo, ibibigay ko sa date n’yo.”
“Blake, posas meron ka?”
“Ha?” Bakit kailangan niya ng posas? Pero kung kailangan niya, bibilhin ko rin para sa kanya.
“Loko. Ano’ng balak mong gawin kay Katarina?” tanong ni Tommy.
“Ako wala, pero siya baka may gawin sa ‘kin.”
“Masyado na ‘kong curious d’yan sa Katarina mo Justin. Totoo ba? Kinagat ka niya?” tanong ko.
“Paano n’yo nalaman?!” gulat na tanong ni Justin.
“Siya mismo nagsabi. Sabi pa nga niya, huwag ka na raw matakot sa kanya kasi hindi ka na niya kakagatin. Pre, ginawa kang lechon?” natatawang sabi ni Pete.
“Gago ka talaga Pete!”
“Ano ba kasing nangyari?” tanong ni Tommy.
Mukhang nag-aalangan magkwento si Justin. “Ganito kasi. Noong huling gig natin nawala kami ni Katarina ‘di ba? Tapos pagbalik ko dumudugo na labi ko.”
“Sabi mo napaaway ka, kasi may bumastos kay Katarina. Nasuntok ka kamo.”
“Hindi totoo ‘yon, Tommy. Nagsinungaling ako.”
“Si Katarina, sumuntok sa ‘yo?” tanong ni Pete.
Pareho kaming napatingin ni Tommy kay Pete. “Pete ang slow mo,” sabay pa naming sabi.
“Bakit?” nagtataka niyang tanong, tapos bigla siyang napamura nang ma-realize niya. “S-si Katarina. Siya nagpadugo ng labi mo dahil…”
Tumango si Justin. “Kakaiba siya, guys. Gigil na gigil siya sa ‘kin.” Tumingin si Justin sa ‘kin. “Kaya Blake, kapag may nangyaring masama sa ‘kin. Ikaw nang bahala sa mga magulang ko. ‘Yung mga alaga kong pusa at aso, ampunin mo sila. Pete, alam mo ‘yung password sa laptop ko. Paki-delete ‘yung browsing history ko.”
“Para kang tanga Justin. Kapag kinagat ka uli, kagatin mo rin,” sabi ni Pete.
“Minsan mga idea mo Pete, sablay. Dito lang sa address ni Tina ka tumama eh,” sabi ni Tommy. “Basta Justin, malaki ka na. Lalaki ka. Alam mo na dapat mong gawin.”
“Oo naman. Uy, Blake, sa eat all you can kami kakain ha?”
Natawa ako sa bilin ni Justin. Hindi ko malaman kung ayaw niya ba talaga o gusto sa date nila ni Katarina.
- Writer
