"Sweetheart?"
Napalingon ako sa pinto nang marinig ko ang pagtawag ni Ace. Naroroon na siya, nakatayo at palipat-lipat ang tingin sa akin at sa picture na nasa sahig.
"Aah..." Hindi ko malaman ang sasabihin ko at ano ba ang dapat kong isipin.
Hindi nga ako nagkamali na may ugnayan sila ng babaeng ilang beses ko nang nakasalubong sa labas ng condo unit niyang ito. Napaka-sweet nila sa larawan habang naka-heart pose at nakasuot ng couple shirt. Sa mga shirt nilang suot ay naka-print din doon ang larawan nilang dalawa.
Ano ang ibig sabihin nito?
Dahan-dahan siyang lumapit sa akin at dinampot ang larawan sa sahig. Nangangatog ang mga tuhod ko at binabayo ng malakas ang dibdib ko. Ni hindi ko man lang siya nakitaan ng kahit anong pagkagulat o takot o kung anuman sa kanyang mukha at kilos.
