BIANCA
Nakarating ng terminal ang bus na sinakyan namin ni Mateo, eksaktong alas-siyete ng umaga. Laking pasasalamat ko na ligtas kaming bumaba at walang kahit anong nangyaring hindi maganda sa biyahe namin.
Hindi pa rin ako makapaniwala na may nahanap akong ipakikilalang boyfriend sa best friend ko. Natatawa akong nakatingin kay Mateo na abala sa kausap niya sa cellphone.
Naririnig ko pang sinabi niya sa kaibigan na kinabukasan na lang daw siya dadalaw at may importante raw siyang gagawin.
Hindi ko akalaing sasakay ako sa bus na single, tapos bababa akong may instant boyfriend na ipapakilala mamaya sa kaibigan ko, kahit kunwari lang.
Nai-imagine ko tuloy ang magiging reaksyon ng bruhang si Sheng. Siguradong magugulat siya, dahil wala naman siyang alam na may tinanggap akong manlilig
