[SHEYMIE]
HALOS hindi ako nakatulog dahil sa pagpupuyat ko sa katatawag sa pamilya ko sa probinsya. Binigyan kasi ako ni Daren ng magandang cellphone kaya nagload agad ako ng unlimited call para makausap ko ng matagal ang mga kapatid at Nanay ko. Natutuwa akong malaman na hindi na sila nagugutom at hindi na rin nawawalan ng baon ang mga kapatid ko kapag pumapasok sa eskwela. Napakasarap malaman ang gano'n nakakawala ng pagod.
Kinatok ko ang kuwarto ni Daren dahil oras na para magjogging siya. Ang sabi kasi niya sa'kin gisingin siya ng ala-kuwatro ng umaga kaya nag-alarm ako para magising ako ng oras na 'yon.
"Daren! Daren!" sunod-sunod na katok ang ginawa ko para lang magising siya.
Ilang saglit pa binuksan niya ito. Kinusot-kusot pa niya ang mga mata niya nang humarap siya sa'kin.
