Hindi namalayan ni Shayna na nakaidlip siya kaya gulat na gulat siya nang ginising siya ng ilang malalakas na pagkatok sa pintuan ng kuwartong kinaroroonan niya.
Napabalikwas pa siya ng bangon at pagkatapos ay nagmamadaling tumayo. Nagawa naman niyang ayusin ang kanyang buhok bago niya buksan ang pinto. Bumungad ang guwapo ngunit nag-aalalang mukha ng kanyang among lalaki.
"Shayna! Akala ko ay kung napano ka na," puno pa rin ng pag-aalalang sambit ng kanyang Sir Carson.
"Naku, Sir. Pasensya na po. Nakaidlip po kasi ako."
Nilakihan ni Shayna ang pintuan ng kuwarto at pinapasok ito. Nakakahiya naman kung hanggang pintuan lang ito gayong ito ang magbabayad sa kuwartong tinutuluyan niya ngayon.
"Pasok po kayo, Sir," pag-iimbita niya rito. Natigilan naman ito at napangiti sa kanya bago
