HUMUIGIT-KUMULANG isang oras din ang naging biyahe nila bago inihinto ni Lucian ang sasakyan sa tapat ng isang sikat na condominium building, sa pusod ng Makati. Sa taas niyon ay halos hindi na iyon kayang tanawin pa ni Zia, nang tumingala siya mula sa bintana ng sasakyan ni Lucian.
Huminto si Lucian sa mismong harap niyon. Hindi alintana kung nakaharang man ito sa driveway.
Sa harapan at pinaka-entrance ng building ay naroon, at nakatayo ang pagka-laki-laking letrang 'L', na mayroong naka-putong na korona, para sa isang hari. Itim na itim ang kulay ng letra, habang kulay ginto naman ang korona.
LUCIFER.
Iyon naman ang mga letrang nabasa niya na nakadikit sa itaas ng building. Kulay itim din ang mga letra niyon, na sa tantya ni Zia ang hindi bababa sa tatlong metro ang laki, bawat letr
