الملاك السجين

"الملاك السجين" الجزء الرابع عشر

في بيت اسر .. باباه و مامته قاعدين في البلكونة بيشربوا شاي و بيتكلموا .. دخل اسر عليهم و شكله مش مبسوط اوي و قال لهم ..

اسر : انا عايزة اتكلم معاكوا في موضوع مهم

نبيل : ايه ده انت منزلتش رحت شغلك ! و بعدين قول صبح علينا الاول طيب

اسر : معلش يا بابا مش حاسس اني قادر اتكلم في حاجة تانية دلوقتي غير الموضوع اللي عايز اكلمكوا فيه

نبيل : طب اقعد طيب .. ولا هتتكلم و انت واقف كده

مديحة : لو هتتكلم في الموضوع اللي في بالي ف خليك فاهم ان مجرد النقاش فيه مرفوض تماما

اسر بيقعد : لا مفيش حاجة اسمها مرفوض .. انا راجل كبير مش عيل صغير عشان يتحددلي اتكلم في ايه و متكلمش في ايه

نبيل : بالراحة يا اسر اهدى شوية يابني دي والدتك مينفعش الأسلوب ده

اسر : ولا ينفع حياتي اللي انا موقفها و مش عارف اخد فيها الخطوة اللي هتفرحني بقية عمري عشان خاطر شوية طموح مش سليم ماما بتفكر فيه .. انا ظروفي زي الفل .. شقتي عندي و شغلي عندي و مركزي فيه كويس و مرتبي يخليني اعرف افتح بيت و اتنين كمان لكن انا مش عايز غير بيت واحد بس .. حتى العربية موجودة و مستقبلي متأمن كويس اوي .. حضرتك شايل لي اللي يكفيني و انا كمان شايل ل نفسي اللي يخليني اعمل المشروع اللي يعجبني لكن انا مرتاح و حابب شغلي و مش عايز اسيبه و و ربنا كارمني احلى كرم يعني مش محتاج ل حد يوصلني أو يعليني انا راضي و مبسوط ب وضعي و حالي ده جدا .. انا كل الإمكانيات اللي محتاجها عشان استقر موجودة عندي .. ف من حقي افهم ايه اللي معطلني و مخليني لغاية دلوقتي مش عارف اروح أخطب الإنسانة اللي اختارتها و اللي بحبها جدا .. حد يفهمني ؟

مديحة : انا افهمك .. اول حاجة طريقتك اللي بتكلمنا بيها دي مفيش راجل كبير و محترم و بيفكر أنه يتجوز و يفتح بيت و يكون مسؤول عن زوجة و اولاد و يتكلم مع مامته و باباه كده .. تاني حاجة انت عايش سن مش سنك حاطط نفسك في عمر المراهقة و بتتصرف ع** ما بتقول .. انت وقت ما تقرر تتجوز و تفتح بيت عقلك هو اللي هيحركك عشان هو ده اللي بيفكر و بيد*ك القرار الصح .. لكن انت راكن عقلك ده طول الوقت على جنب و قلبك هو اللي شغال بس .. احنا ادرى ب مصلحتك اكتر منك .. و مش هقولك احنا لأ انا هقولك اني أنا اللي ادرى ب مصلحتك لأن باباك زي عملتك كده و بيفكر ب نفس طريقتك .. تقدر تقول لي البنت اللي انت هتموت عليها دي هتضيفلك ايه في حياتك أو هتفيدك ب ايه ؟

اسر : يعني ايه هتفيدني ب ايه !! المفروض انها تتجوزني و تستتني في البيت و تنزل هي تشتغل و تصرف عليا ولا تجيبلي ڤيلا ولا قصر ولا شركة و تكتبهم ب اسمي !! هو مين اللي المفروض يصرف على التاني ؟ مين اللي المفروض يأمن مستقبل التاني ؟! هو حضرتك اللي بتصرفي على بابا ؟ طب حضرتك اتجوزتي بابا أو هو اتجوزك عشان خاطر مصلحة ! اومال لو مكنتوش متجوزين عن حب و عارفين و مجربين اللي انا حاسس بيه كنتي عملتي ايه .. انا بحب فرح مش عشان اسباب انا بحبها زي ما هي كده ب الحلو اللي فيها و الوحش اللي فيها و بحب الوحش قبل الحلو كمان .. ده غير صفاتها الكتير اللي متتعدش .. بنت محترمة و عاقلة و متعلمة و زي القمر و بنت ناس و عارفة قيمتي و مقدراني كويس جدا و اهلها مستواهم الاجتماعي ميقلش عن مستوانا ف ليه مرفوضة انا مش فاهم .. اي حد في الدنيا هيكون شايفها بنت و زوجة مناسبة جدا و اي حد هيعرف انك رافضة بنت ب المواصفات دي هيستغربك يا ماما .. ده حتى حضرتك محاولتيش تقوليلي قابلني بيها و تدي نفسك فرصة تشوفيها و تعرفيها .. و انت متأكد أن لو ده حصل حضرتك هترتاحي لها اوي و هتندمي على رفضك ليها ده طول الوقت .. فرح متستاهلش كده .. متستاهلش أنها تترفض ولا تستاهل مني اني استندل معاها و اسيبها و اروح أخطب أو اتجوز واحدة غيرها .. لأ و كمان الواحدة اللي احنا بنتكلم عليها دي لا عمرنا شوفناها ولا نعرفها اصلا .. ايه اللي يخليني ابيع واحدة بحبها و بتحبني و شارياناي و انا كمان شاريها و عندها استعداد تستناني و تستحمل كل ظروفي من غير ما تشتكي أو تقول كلمة عشان اشتري واحدة معرفهاش و معرفش هل هي عندها اصل و هتحبني و هتكون باقية عليا و هتستحملني في كل ظروفي و حالاتي زي البنت اللي بحبها ولا لأ .. ايه اللي يجبرني على كده ده غير أن احنا مش متأكدين إذا كان ممكن يحصل بينا ارتباط ولا لأ .. مش متأكدين اصلا إذا كان هييجي علينا يوم و نشوفها ولا الواحد هيعيش و يموت و هو عارف أنه عنده بنت خالة المفروض أن أنا كنت اتجوزها و اقاسمها في ورثها و اسيب عشانها احسن واحدة في الدنيا و في الاخر مشوفهاش اصلا .. ايه يا امي عايزة تعملي فيا كده ؟ عايزة توجعيني و تظلميني و كمان تخليني اظلم معاكي بنت مالهاش ذنب ولا ليها دعوة ب كل اللي حضرتك عايزاه و بتفكري فيه ده ؟!

مديحة : انت شايف ان انا بظلمك يا اسر ؟ خوفي عليك و اني بدور على مصلحتك و عايزاك تكون احسن واحد في الدنيا ده بتسميه ظلم !!

اسر : اومال اسميه اييه ؟! يا ماما هو انا مش ابنك و المفروض اني اهم عندك من اي حاجة في الدنيا و انك تكوني عايزة تشوفيني مبسوط و بالي و قلبي مرتاحين ؟

مديحة : ......

نبيل : يا مديحة فكري كويس .. ابنك بيحب البنت دي و صدقيني انا اللي بقولك أن لو هو مبيحبهاش و عمره ما شافها لكن انا اعرفها مكنتش انا اللي سيبته غير لما يتجوزها من كتر ما هي بنت جميلة و مؤدبة و تتحب من اول ما تشوفيها .. بنت بريئة و قلبها ابيض مش زي بنات اليومين دول خالص .. ادي نفسك فرصة تشوفيها و تتعرفي عليها و على أهلها و انا واثق انك هتغيري رأيك ده خالص

اسر : يا ماما انا مش هكون فرحان غير معاها هي و بس .. و غلاوتك عندي انتي و بابا انا مفيش اي حاجة تهمني في الدنيا كلها قدكوا و قد رضاكوا عني و اكبر دليل على كلامي ده اني لسه لغاية دلوقتي معملتش اللي المفروض يتعمل عشان خاطرك و عشان انا مش عايزة اعمل حاجة غير لما تكوني مشاركاني انتي و بابا فيها .. لكن انا مش هقدر استنى و اصبر اكتر من كده بصراحة أنا حاسس اني هخسرها بسبب البطئ اللي انا فيه ده و مضطر غصب عني اني اخد خطوة حتى لو انتوا مش موافقين .. انا هقابل مامتها بكرة .. و على فكرة فرح معندهاش علم ب ده هي لو عرفت مش هتوافق عشان هي حاطه موافقتكوا انتوا في المقام الأول و قبل موافقة أهلها ذات نفسهم .. يعني مش واحدة طماعة و أنانية و مش بتفكر غير في نفسها و في مصلحتها و بس لأ و عشان كده انا لازم اقدر كل ده و اعمل حاجة عشانها تثبتلها اني باقي عليها فعلا .. و انا بتمنى و ياريت اللي بتمناه ده يحصل .. بتمنى اني ماخدش الخطوة دي و انتوا معترضين عليها ..

مديحة بعد لحظات **ت : قابلني ب البنت ..